काठमाडौं- भारतीय नागरिकहरुलाई अमेरिका पठाउने भन्दै काठमाडौं ल्याएर बन्धक बनाएर राखेको आरोपमा एक जना नेपाली सहित पक्राउ परेका ९ जना भारतीय नागरिकलाई प्रहरीले सार्वजनिक गरेको छ।
जिल्ला प्रहरी परिसर काठमाडौंले बिहीबार पत्रकार सम्मेलन गरेर ९ जनालाई सार्वजनिक गरेको हो। प्रहरीले सार्वजनिक गरेको विवरण अनुसार पक्राउ पर्नेहरुमा अब्दुल रहिम, इन्दुसिंह यादव, चरण जित सिंह, अशोक कुमार, मनिष कुमार मल्होत्रा, निपुन गुप्ता, मोहम्मद सविर मिया र नेपाली नागरिक रामचन्द्र शर्मा छन्।
उनीहरुले काठमाडौंको रातोपुलमा ११ जना भारतीय नागरिकलाई बन्धक बनाएर राखेका थिए। प्रहरीले बन्धक बनाएर राखेकाहरुको उद्धार गरेको थियो भने ८ जनालाई पक्राउ गरेको थियो। पीडित र पीडक दुवै भारतीय भारतीय नागरिक रहेको परिसर काठमाडौंका एसएसपी भुपेन्द्र खत्रीले जानकारी दिए।
उनीहरुलाई अमेरिका पठाउने भन्दै काठमाडौंको रातो पुलस्थित एक घरमा ल्याएर बन्धक बनाएर राखिएको थियो। बाहिर समेत निस्कन नदिई घरभित्रै उनीहरुलाई थुनेर राखिएको थियो। कोही आएर सोधिहालेमा सिरक डस्ना बनाउने मान्छे हो हामी भनेर जवाफ दिन भन्दै भारतीय मानव तस्करहरुले उनीहरुलाई सिकाएका थिए।
भारतीय मानव तस्करको गिरोहले भनेको नमाने उनीहरुलाई पाइपले पिट्दै यातना समेत दिने गरेको पीडितहरुले बताएका छन्। यो विषय बाहिर लगे जे पनि हुनसक्ने भन्दै धम्की समेत दिने गरिएको खुलेको छ। अमेरिका पठाउने भन्दै उनीहरुसँग ४० देखि ४५ लाख रुपैयाँ लाग्ने भन्दै ठगी गरिएको पाइएको प्रहरीले जनाएको छ।
नेपाल ल्याएर उनीहरु करिब एक महिनादेखि बन्धक बनाएर राखेको प्रहरी अनुसन्धानबाट खुलेको छ। उनीहरुबाट विभिन्न देशका मुद्राहरु, पासपोर्टहरु तथा नक्कली कागजात, रबर स्ट्याम्प समेत बरामद गरिएको एसएसपी खत्रीले बताए।
मेक्सिन तथा ब्राजिलियन समय सेट गरिएका घडीहरु पनि बरामद गरिएको छ। पीडितहरुलाई झुक्याउनका लागि त्यसो गरेको पाइएको प्रहरीले जनाएको छ।
मानव बेचबिखन तथा आसोरपसार अन्तर्गतको कसुरमा म्याद थप गरेर अनुसन्धान अघि बढाइने प्रहरीले जनाएको छ।
रेस्क्यु गरेकाहरुलाई होटलमा राखिएको प्रहरीले जनाएको छ। प्रहरी वृत्त गौशाला र परिसरको टोलीले यो अपरेशन गरेको थियो। बन्धक बनाएर राखेको भन्ने सूचना आएपछि टेक्निकल र ह्युमन इन्टेलिजेन्सको प्रयोग गरेर यो अपरेशन गरिएको प्रहरी अधिकारीले बताएका छन्।
पीडितहरु सबै दुबई, कतार भारतबाट हवाईमार्ग हुँदै काठमाडौं आएका थिए। यो गिरोहका सदस्यहरु केही मेक्सिकोमा र केही भारतमा समेत हरेको पाइएको छ।
काठमाडौं आइसकेपछि ३ हजार डलर र पासपोर्ट बुझाउनुपर्ने भनिएको थियो। कसैलाई दोहा हुँदै कसैलाई मेक्सिको हुँदै अमेरिका पठाउने भनिएको थियो।
उनीहरुलाई विश्वासमा पार्नका लागि सबैजसो कागजताहरु नक्कली बनाएको समेत पाइएको छ। मेक्सिमो रहेको भन्ने खालको ब्याकग्राण्ड बनाएर भिडिओ कल गरेर समेत विश्वासमा पार्ने गरेको पाइएको एसएसपी खत्रीले बताए। उनीहरुले त्यसका लागि तथा फेक लोकेसन देखाउन विभिन्न एपहरु समेत प्रयोग गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
