धनगढी- सीमा विवादका क्रममा भारतीय पक्षबाट गोली चल्दा मारिएका कञ्चनपुरको पुनर्वासका शहीद गोविन्द गौतमको परिवारलाई आर्थिक सहयोग प्रदान गरिएको छ। नेपाली कथानक चलचित्र ‘काँडेतार’ को च्यारिटी शोबाट उठेको रकम गोविन्दका बुबा खेमलाल गौतमलाई दिइएको हो।
परिवारको आर्थिक अवस्था नाजुक भएको र गोविन्दको सम्मान स्वरुप रु ५० हजार रकम घरमै पुगेर हस्तान्तरण गरिएको काँडेतारका निर्माता-निर्देशक तथा कलाकार नवल खड्काले बताए।
चलचित्र काँडेतारको कथावस्तुले पनि आफ्नो भूमिको रक्षा गर्नुपर्ने र सीमा क्षेत्रमा काँडेतार बनेर उभिनु पर्ने उनले बताए। कञ्चनपुर पुनर्वासका शहीद गोविन्दले पनि आफ्नो सीमा सुरक्षा गर्ने क्रममा नै वीरगति प्राप्त गरेकाले देशका लागि ज्यू-ज्यान दिनेहरुको सम्मान र सम्झना स्वरुप सहयोग रकम हस्तारतण गरेको खड्काले बताए।
२०७३ फागुन २६ गते स्थानीय कारगिल डाँडा नजिकै कल्भर्ट निर्माणका क्रममा भएको विवादपछि भारतीय सीमा सुरक्षा बल ‘एसएसबी’को गोली लागेर गोविन्दको मृत्यु भएको थियो।
यो अवधिमा सो क्षेत्रको सीमा विवाद त समाधान भएन नै, गौतमको परिवार पनि छिन्नभिन्न भएको छ। सरकारले गोविन्द गौतमलाई शहीद घोषणा गरे पनि उनको बलिदान, आफ्नो भूभाग रक्षार्थ सो क्षेत्रका बासिन्दाले गर्दै आएको संघर्ष र उनीहरुको चिन्ताबारे राज्यका तर्फबाट खासै चासो राखेको पाइँदैन।
रकम बुझ्ने क्रममा शहीद गोविन्दका पिता खेमलालले आफ्नो छोराको सपना पूरा भएको हेर्न चाहेको बताए। छोराको मृत्यु भएकोमा भन्दा पनि समस्या ज्यूँका त्यूँ रहेकोमा दु:ख लागेको उनको भनाइ थियो। ‘छोरा त मरेर गइहाल्यो, समस्या उस्तै छ,’ उनले भने, ‘हामी बाँचेकाहरु पनि ढुक्कले बस्न सक्ने अवस्था छैन। कुन बेला आएर भारतीयले उठाउने हो, फेरि अर्को कसैले ज्यान दिनुपर्ने हो कि भन्ने चिन्ता कायमै छ।’
आज पनि सीमा विवाद कायमै रहेको उल्लेख गर्दै उनले भने, ‘छोराको सपना अधुरो छ, छोरा पनि मारियो, सीमा विवाद पनि जस्ताको तस्तै छ। सीमा विवाद समाधान भइदिए पनि छोराले प्राण उत्सर्ग गरेको खेर गएन भनेर चित्त बुझाउने ठाउँ हुन्थ्यो ।’
सीमा विवाद समाधान गरेमात्र यस क्षेत्रका नागरिक सुरक्षित हुने र आफ्नो छोराप्रति पनि सम्मान हुने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
