काठमाडौं– सुन तस्करीका नाइके भारतीय नागरिक विमल पोद्दार अवैध हुण्डी र क्रिप्टोको धन्दामा संलग्न भएको खुलेको छ। प्रहरीको केन्द्रीय अनुसन्धान ब्यूरो (सीआईबी)ले गरेको हुण्डीको अनुसन्धानमा पोद्दारको संलग्नता खुलेको हो।
सुन तस्करीका नाइकेमध्येका एक चुणमणि उप्रेती ‘गोरे’ समूहमा आबद्ध भएर सुन तस्करी गरेका पोद्दार पछिल्लो समय हुण्डी र क्रिप्टोको धन्दामा लागेका हुन्। गोरे समूहमार्फत् ३८ क्वीन्टल सुन तस्करी भएको प्रकरणमा २०७५ सालमा पोद्दार समेत प्रतिवादी थिए। मोरङ अदालतले पोद्दारलाई पुर्पक्षमा पठाएको थियो। पछि उनी उच्च अदालतबाट १० लाख धरौटीमा रिहा भएका थिए।
पछि जिल्ला अदालत मोरङले उनलाई सफाइ दिएको थियो। जिल्ला अदालत मोरङको उक्त फैसलाविरुद्ध सरकारी वकिल कार्यालय उच्च अदालत विराटनगर पुगेको थियो। अहिले उक्त मुद्दा उच्च अदालत विराटनगरमा विचाराधीन छ। पोद्दारलाई सम्पत्ति शुद्धीकरण विभागलेसमेत छानबिन गरे पनि उनले पुहँचको आधारमा उनीविरुद्ध मुद्दा दर्ता नभएको जानकारहरु बताउँछन्।
काठमाडौंको डिल्लीबजारमा रहेको द एड्रेस लाउन्जका सञ्चालकसमेत रहेका पोद्दार भने अहिले फरार छन्। काठमाडौंको बागबजारका रुपेश श्रेष्ठलाई पक्राउ गरेर सुरु गरेको अनुसन्धानले यो प्रकरणमा पोद्दारकोसमेत संलग्नता खुलेको थियो।
गत मंसिर २१ गते त्रिभुवन अन्तर्राष्ट्रिय विमानस्थलमा १४ किलो सुन तस्करीमा पक्राउ परेका चन्द्र घले र मीनकुमार घलेकोसमेत पोद्दारसँग कनेक्सन देखिएको थियो।
सीआईबीको अनुसन्धानमासमेत घलेले पोद्दारसँग मिलेर सुन तस्करी गरेको भन्दै बयानसमेत दिएका थिए। घले समूहले नेपालमा पछिल्लो १० वर्षदेखि सुन तस्करी गर्दै आएको अनुसन्धानबाट खुलेको थियो।
घले समूहमै रहेर सुन तस्करी गरेका डीबी (दानबहादुर) गुरुङ र जोन (जीवनकुमार) गुरुङसँगसमेत पोद्दारको संलग्न्ता देखिएको थियो। जसकारण पोद्दार हुण्डी र क्रिपटोमार्फत् नभई अझै सुन तस्करीमासमेत संलग्न हुनसक्ने देखिएको सीआईबी स्रोत बताउँछ।
सुन तस्करीको पैसासमेत उनीहरूले हुन्डी र क्रिप्टोमार्फत् विदेशमा लेनदेन गरेको हुन सक्ने प्रहरीका अनुसन्धान अधिकारी बताउँछन्।
पोद्दारले मात्रै गरे क्रिप्टोमार्फत् २ अर्ब ३१ करोडको कारोबार
सीआईबीको अनुसन्धानले फरार रहेहका विमल फोद्दारले मात्रै क्रिप्टोका दुई वटा फरक–फरक आईडीमार्फत् दुई अर्ब ३१ करोड २६ लाख ४२ हजारभन्दा बढीको कारोबार गरेको देखिएको छ।
सीआईबीले दिएको जानकारी अनुसार उनले एउटा आईडीबाट १० करोड ४ लाख ९६ हजार २७० अमेरिकी डलर (एक अर्ब ३९ करोड ६३ लाख ५९ हजार ७ सय ३३ रुपैयाँ) र अर्को आईडीबाट ६८ लाख ८७ हजार ५९२ अमेरिकी डलर ( ९१ करोड ६२ लाख ८३ हजार २ सय २५ रुपैयाँ)को कारोबार क्रिप्टोमार्फत् गरेको देखिएको हो।
पोद्दारले पक्राउ परेका रुपेश श्रेष्ठसँग ह्वाट्सएपमा क्रिप्टोका दुईवटा वालेट एड्रेस पठाउन लगाएर कारोबार गरेका थिए। पोद्दारले अमेरिकादेखि नेपाल र भारतसम्म अन्तरेदेशीय सञ्जाल विस्तार गरी संगठित रुपमा क्रिप्टोमार्फत् हुण्डीको कारोबार गरेको सीआईबीले जनाएको छ।
एकै परिवारका पाँच जना हुण्डी र क्रिप्टोमा
हुण्डी र क्रिप्टोमा पोद्दारसहित १७ जनालाई प्रतिवादी बनाएर मुद्दा चलाइएको छ। जसमध्ये एकै परिवारका पाँच जनाको संलग्नता देखिएको सीआईबीले खुलाएको छ। रुपेश, उनकी श्रीमती रचना शर्मा, भाइ दिपेश श्रेष्ठ, भान्जा अंशुल श्रेष्ठलाई प्रतिवादी बनाइएको छ।
अर्का भान्जा आयुष श्रेष्ठकोसमेत कारोबारमा संलग्नता पुष्टि भए पनि ठेगाना प्रस्ट हुन नसकेको भन्दै उनलाई प्रतिवादी बनाइएको छैन। ठेगाना खुलेका बखत प्रतिवादी बनाउने भन्दै अन्यलाई मुद्दा चलाइएको छ।
२ खर्ब ८४ अर्ब ४ करोडको मुद्दा न्यायाधीश खनालको इजलासमा
क्रिप्टो करेन्सीमार्फत् २ खर्ब ८४ अर्ब ४ करोड रुपैयाँभन्दा बढीको हुण्डीका कारोबार भएको भन्दै दायर भएको राष्ट्र बैंक अन्तर्गत कसुरको मुद्दा जिल्ला अदालत काठमाडौंका न्यायाधीश दुर्गाप्रसाद खनालको इजलासमा परेको छ।
थुनछेक बहस भएपछि पक्राउ परेकाहरुलाई पुर्पक्षमा थुनामा राख्ने वा धरौटी तथा साधारण तारेखमा रिहा गर्ने भन्ने आदेश आउने छ। यो प्रकरणमा काठमाडौं बागबजारका ४८ वर्षीय रुपेश श्रेष्ठ, काठमाडौं थापाथलीका ३५ वर्षीय आशिष अग्रवाल, बाग्लुङ नगरपालिका–७ घर भइ सामखुसी बस्ने ४८ वर्षीय मीनबहादुर जिसी र झापाको गौरादह नगरपालिका–४ का ४५ वर्षीय झानिन्द्रप्रसाद खतिवडालाई पक्राउ गरेर मुद्दा चलाइएको छ।
बागबजार घर भइ अमेरिका बस्ने रुपेशका भाइ ४४ वर्षीय दीपेश श्रेष्ठ, अमेरिका नै बस्ने रुपेशका भान्जा ४३ वर्षीय अंशुल श्रैष्ठ, रुपेशकै श्रीमती ४५ वर्षीय रचना शर्मा, नुवाकोटको विदुर नगरपालिका–४ का २७ वर्षीय सरद भट्टराई, धादिङको गल्छी गाउँपालिका–२ घर भएका २५ वर्षीय वीरेन्द्र मगर, भारतीय नागरिक विमल पोद्दार, दाङको बबई–६ का २४ वर्षीय बिगल सिंह शर्मा, सिन्धुलीको कमलामाई–६ का ४६ वर्षीय ओमकुमार श्रेष्ठ, स्याङ्जाको पुतलीबजार–४ का दीपश शर्मा, रामेछापको उमाकुण्ड–१ का फुन्सोक लामा, नवलपरासीको देवचुलीका ६९ वर्षीय गोविन्दप्रसाद श्रेष्ठ र रामेछापको मन्थली–१० का ५३ वर्षीय रुदे तामाङलाई फरार प्रतिवादी बनाएर मुद्दा चलाइएको छ।
सीआईबीले गत मंसिर १७ गते सुरुमा बागबजारबाट रुपेश श्रेष्ठलाई पक्राउ गरेको थियो। त्यतिबेला उनको घरबाट ८९ लाख ६९ हजार नेपाली रूपैयाँ, अमेरिकी डलर ७ हजार २६, ल्यापटप ३ थान, सिपियु ६ थान, टेलर मेसिन १ थान, सीसीटीभी एनभीआर १ थान, मोबाइल ८ थान, राहदानी २ थान, नागरिकता १ थान र विभिन्न मिति तथा व्यक्तिको नाममा काटिएका बैंक चेक ६४ थान बरामद गरेको थियो।
उनै रुपेशबाट सुरु भएको अनुसन्धानले २ खर्ब ८४ अर्ब ४ करोड रुपैयाँभन्दा बढी हुण्डीको कारोबार देखिएको भन्दै १७ जनालाई प्रतिवादी बनाएर मुद्दा चलाइएको छ।
श्रेष्ठले नेपाल राष्ट्र बैंकसँग इजाजतपत्र नलिई विद्युतीय माध्यम क्यासएप जस्ता मोबाइल एप्स प्रयोग गरी हुण्डी, अनलाइन गेम्बलिङ, क्रिप्टो तथा अवैध रूपमा विदेशी विनिमय कारोबार गरेको खुल्न आएको सिआइबीले जनाएको छ।
प्रतिवादीहरुलाई कारोबार गरेको देखिएको रकम २ खर्ब ८४ अर्ब ४ करोड २५ लाख ८ हजार ७५४ रुपैयाँ बराबरीको बिगो भराउन माग दाबी गरिएको छ। सोही अनुसार सजायसमेतको मागदाबी गर्दै मुद्दा दायर गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768807389.png)
-1764146706.png)
