काठमाडौं– अछामको ढकारी गाउँपालिका-१ घर भएका ३० वर्षीय नवराज बुढा अहिले चितवनस्थित बीपी कोइराला मेमोरियल क्यान्सर अस्पतालमा छन्। ब्लड क्यान्सर देखिएपछि उपचारका लागि उनी केही समय अगाडि चितवन पुगेका थिए। तर उपचारका लागि आर्थिक अभाव झेलिरहेका उनी भन्छन्– उपचार गर्न पैसा नपुगे त मर्छु होला, है!
आर्थिक रुपमा नवराजको पारिवारिक स्थिति पहिल्यै नाजुक हो। गाउँमै खेती–किसानी र ज्याला मजदुरी गरेर परिवार पाल्ने उनी केही समय रोजगारीका लागि भारत पनि गए। स्वास्थ्यमा समस्या देखिएपछि पहिले नै आम्दानी बन्द भएको थियो। आफन्त र गाउँलेबाट ऋण लिएर उपचारका लागि भन्दै चितवनसम्म पुगे। गाउँबाट ल्याएको पैसा क्यान्सरको सुरुवाती परीक्षणमै सकियो।
नवराजकी श्रीमती गीता चिन्तामा छन्। क्यान्सरपीडित श्रीमान्को उपचारसँगै ५ वर्ष नकटेका २ सन्तानको लालन–पालन र स्कूल पढाइको खर्च कसरी जुटाउने भन्ने अर्को पीडा पनि छ।
‘श्रीमान्को उपचारमा सबै पैसा सकियो। उपचार पुरा हुन सकेको छैन। माग्ने ठाउँमा पनि मागि सक्यौं। अब त माग्ने ठाउँ पनि बचेन। भगवानलाई पुकार्नुबाहेक अब हामीसँग कुनै बिकल्प छैन। त्यसैले सकेको सहयोग गरेर मेरो सिन्दुरको रक्षा गरिदिन म सबै नेपाली दाजुभाइ तथा दिदीबहिनीमा आग्रह गर्दछु,’ पीडा भरिएको बोलीमा उनले आग्रह गरिन्।
उपचारका लागि पैसा सकिएपछि नवराज घर फर्किएका छन्। उनी यतिबेला गाउँमा सरसापट मागिरहेका छन्। तर, सक्ने जति सबैले सहयोग गरिसकेकाले अब उनको माग्ने ठाउँ पनि छैन।
‘म त आर्थिक अभावमा उपचार नपाएरै मर्छु कि भन्ने लाग्न थालेको छ। श्रीमती र साना लालाबालाको अनुहार मात्र मनमा घुमिरहेको हुन्छ। मलाई केही भइहाल्यो भने उनीहरू कसरी बाँच्लान्? कसरी जीवन चलाउलान् भन्ने चिन्ताले पिरोलिरहेको हुन्छ,’ उनले भने।
उनी आफ्नो जीवन बचाइदिन आग्रह गर्छन्। त्यसका लागि अछामको ढकारीस्थित सिजन बैंकको आफ्नो नवराज बुढा (Navaraj Budha) नामक 0790100000121010 नम्बरको खातामा रकम जग्मा गरिदिन आग्रह गर्दछन्। उनले त्यसरी प्राप्त सहयोगले आफ्नो जीवन बाच्ने र सहयोगीहरूप्रति सामाजिक सञ्जालमार्फत् कृतज्ञता ज्ञापन गर्ने बताएका छन्। उनलाई 9845967186 मा सम्पर्क गरेर समेत सहयोग गर्न सकिने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
