काठमाडौं– वैदेशिक रोजगार विभागअन्तर्गतको ईपीएस कोरिया शाखाको ललितपुरको ग्वार्कोस्थित कार्यालय अगाडि केही युवाहरु शुक्रबार बिहानदेखि नै प्रदर्शनमा थिए।
रोजगार अनुमति प्रणाली (ईपीएस)अन्तर्गत रोजगारीका लागि कोरिया जान नपाउने भएका युवाहरु विरोध प्रदर्शनमा उत्रिएका थिए।
मध्याह्न हुँदै गएपछि भने प्रदर्शन उग्र बन्यो। ईपीएस कोरिया शाखाको कार्यालय अगाडि भेला भएका युवाहरु मुख्य सडक (चक्रपथ) तिर सोझिए। उनीहरुले सडकमा यातायातका साधनहरुको आवागमन अवरुद्ध पारे।
केही सार्वजनिक गाडीहरुमा ढुङ्गा प्रहार भयो। सडकमा समेत ढुङ्गा–मुढा तेर्स्याएर विरोध गर्न थाले। यहीबीचमा मन्त्रीले प्रयोग गर्ने नम्बर प्लेट भएको बा २ झ ५८६१ नम्बरको गाडी बालकुमारी पुलनजिक पुग्यो।
प्रदर्शनमा उत्रिएकाहरुले गाडी रोके। टायरको हावा फुस्काए। त्यसबीचमा गाडीमा रहेका चालकसहित व्यक्ति बाहिर निस्किए। त्यसपछि प्रदर्शनमा उत्रिएकाहरुले गाडीमा आगो लगाइदिए।
आगो लगाइएको गाडी भौतिक पूर्वाधार तथा यातायातमन्त्री प्रकाश ज्वालाको भएको बुझिएको छ। गाडीमा आगजनी हुँदा भने मन्त्री ज्वाला त्यसमा सवार थिएनन्।
मन्त्री ज्वालालाई पार्टी (नेकपा एकीकृत समाजवादी)को बैठकमा छाडेर सिंहदरबार फर्किरहेका बेला गाडीमाथि आगजनी भएको बुझिएको छ। ‘मन्त्रीज्यूलाई पार्टीको बैठकमा छाडेर सिंहदरबार फर्किरहेका बेला गाडीमा आगजनी भएको हो,’ यातायातमन्त्री ज्वालाका सञ्चार विज्ञ जीवन वीसीले भने।
मन्त्री ज्वालाको गाडीमा आगजनीसहितको उग्र प्रदर्शनलाई नियन्त्रणमा लिन प्रहरीले केही राउन्ड हवाई फायर समेत गरेको थियो। हवाई फायरका क्रममा केही प्रदर्शनकारी घाइते भएका बताइएको छ।
प्रहरीले बालकुमारी क्षेत्रबाट कम्तीमा ७ जनालाई नियन्त्रणमा लिएको बताएको छ। जिल्ला प्रहरी परिसर ललितपुरका एसएसपी सिद्धिविक्रम शाहले नियन्त्रणमा लिइएका ७ जनामध्ये ३ जना घाइते भएकाले उनीहरुलाई उपचारका लागि अस्पताल भर्ना गरिएको जानकारी दिए। अन्य ४ जना भने हिरासतमा रहेका बताइएको छ।
अस्पताल भर्ना भएकामध्ये १ जनाको ज्यान गएको छ। किस्ट अस्पताल लगिएका १ जना किशोरको मृत्यु भएको हो। मृत्यु हुनेको पहिचान खुल्न सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778155080.jpg)
-1764146706.png)
