काठमाडौं– नक्कली डकुमेन्ट बनाएर भिजिट भिसामा हुने मानव तस्करीमा पाँच वटा एअरलाइन्सको संलग्नता रहेको प्रारम्भिक अनुसन्धानमा खुलेको छ। काठमाडौं उपत्यका अपराध अनुसन्धान कार्यालयले गरेको अनुसन्धानमा क्रममा पाँच वटा एअर लाइन्सको संलग्नता खुलेपछि थप अनुसन्धान प्रक्रिया अघि बढाइएको छ।
अपराध अनुसन्धान कार्यालय स्रोतका अनुसार अहिलेसम्म नेपाल एअरलाइन्स, एअर अरेबिया, फ्लाई दुबई, हिमालय एअर र अल जजिरामार्फत् सेटिङमा भिजिट भिसामातर्फ मानव तस्करी हुने गरेको खुलेको छ।
भिजिट भिसामा जानका लागि दुबैतर्फको टिकट अनिवार्य हुनुपर्ने व्यवस्था छ। जसकारण नेपाल फिर्ता हुने टिकट नकाटी एअरलाइन्सको सेटिङमा नक्कली टिकट बनाएर नेपाली युवा–युवतीलाई विभिन्न मुलुक पुर्याइएको पाइएको अपराध अनुसन्धान कार्यालयले जनाएको छ।
नेपाल फिर्ता हुने नक्कली टिकटको आधारमा नेपाली युवा–युवतीलाई भिजिट भिसामा विभिन्नु मुलुक पुर्याएवापत एअरलाइन्सहरुले प्रतिव्यक्ति १० हजार रुपैयाँदेखि १५ हजार रुपैयाँसम्म लिने गरेको पाइएको प्रहरी अनुसन्धानबाट खुलेको छ।
नक्कली डकुमेन्टमा सेटिङ मिलाएर भिजिट भिसामा मान्छे पठाएको आरोपमा यसअघि अपराध अनुसन्धान कार्यालयको टोलीले दुई जना नेपाल वायु सेवा निगमका कर्मचारीलाईसमेत पक्राउ गरिसकेको छ। पक्राउ परेका वायुसेवा निगमका वरिष्ठ सहायक अरविन्द्र यादव, नेपाल एयरलाइन्सकै छैटौं तहमा कार्यरत कर्मचारी होम पोखरेल निलम्बनसमेत भइसकेका छन्।
अन्य एअरलाइन्सको भूमिकासमेत शंकास्पद देखिएको र नक्कली डकुमेन्टको आधारमा सेटिङमा मान्छे ओसारको देखिएपछि थप एअरलाइन्ससमेत अहिले प्रहरीको अनुसन्धानमा परेका छन्। ‘नेपाल एअरलाइन्सका कर्मचारी त हामीले पक्राउ गरिसकेका छौं। यसमा अन्य एअरलाइन्सको समेत संलग्नता देखिएपछि थप अनुसन्धान अघि बढाइएको छ,’ अपराध अनुसन्धान कार्यालयका एसएसपी सोमेन्द्र सिंह राठौरले भने।
यो प्रकरणमा अध्यागमनका शाखा अधिकृत नरवीर खड्का, नेपाल एअर लाइन्स र नेपाल वायु सेवा निगमका कर्मचारी, कन्सल्टेन्सी सञ्चालकदेखि प्रहरी र एजेन्टसहित अहिलेसम्म ३४ जना पक्राउ परिसकेका छन्। अनुसन्धान जारी रहेकाले थप व्यक्ति पक्राउ पर्ने प्रहरीले जनाएको छ।
मानव तस्करको गिरोहले नक्कली कागजात बनाएर भिजिट भिसामा विदेश पठाउनका लागि एजेन्ट, ट्राभल एजेन्सी, कन्सल्टेन्सी, एअरलाइन्सलाई प्रतिव्यक्ति १० देखि १५ हजार रुपैयाँ बुझाउने गरेको र अध्यागमनका कर्मचारीदेखि प्रहरीसम्म ४० देखि ५५ हजारसम्म दिई सेटिङ मिलाउने गरेको अनुसन्धानबाट खुलेको छ।
सरकारले भिजिट भिसासम्बन्धी प्रावधानलाई कडाई गरेपछि मानव तस्करको गिरोहले अध्यागमनका कर्मचारीदेखि प्रहरी, कन्सल्टेन्सी सञ्चालक, एअरलाइन्ससम्मका कर्मचारीलाई घुस खुवाएर नक्कली डकुमेन्टमा विदेश पठाउँदै आएका थिए।
भिजिट भिसासम्बन्धी कार्यविधि २०७९ अनुसार भिजिट भिसामा घुम्न जानका लागि वार्षिक ४ लाख आम्दानी देखिने र कर प्रणालीको दायरामा आएको देखिने विवरण पेस गर्नुपर्ने, दुबईकै लागि पनि कम्तीमा २ लाख बैंक डिपोजिट हुनुपर्ने, दुईतर्फी हवाई टिकट हुनुपर्ने, होटलको वेबसाइट खुल्ने गरी होटल बुकिङको प्रमाण पेस गर्नुपर्ने हुन्छ।
तर, यी सबै डकुमेन्टहरु नक्कली बनाउने र विमानस्थलमा सेटिङ गरेर गिरोहले खाडी मुलकमा पुर्याएरर नेपाली नागरिकलाई अलपत्र पार्दै आएका छन्। नेपाली महिलाहरुलाई खाडीको मुलुकहरुमा घरेलु कामदारमासमेत प्रतिबन्ध लगाइको छ। तर मानव तस्करको गिरोहले सेटिङमा खाडीको मुलुकमा नेपाली महिलाहरुलाई पठाएर घरेलु कामदारको रुपमा कामसमेत लगाउँदै आएको छ।
मानव तस्कर गिरोहले नक्कली प्रहरी रिपोर्ट, नक्कली श्रम स्वीकृत, प्लस टुको सर्टिफिकेट, नक्कली नाता प्रमाणित कागजातहरु, कोभिडको नक्कली रिपोर्ट, दुईतर्फीको नक्कली हवाई टिकट, नक्कली बैंक स्टेटमेन्ट लगागतका कागजातहरु बनाउने र त्यहाँ खटिएका अध्यागमनका कर्मचारीदेखि प्रहरीसम्मलाई रकम बुझाएर भिजिट भिसामा मानव तस्करी गर्ने गरेको खुलेको छ। पक्राउ परेकाहरुविरुद्ध संगठित अपराध र लिखतसम्बन्धी कसुरमा अनुसन्धान भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1748593223.png)
-1748872907.png)
