काठमाडौं– नक्कली कागजात बनाएर विदेश पठाउने गरेको आरोपमा बहालवाला प्रहरीसहित ९ जना पक्राउ परेका छन्। काठमाडौं उपत्यका अपराध अनुसन्धान कार्यालयको टोलीले विभिन्न मितिमा ९ जनालाई पक्राउ गरेर आइतबार सार्वजनिक गरेको हो।
विशेषगरी भिजिट भिषामा विदेश जाने व्यक्तिहरुका शंकास्पद कागजातहरु देखिएपछि त्रिभुवन अन्तराष्ट्रिय विमानस्थल प्रहरी सुरक्षा कार्यालयले अनुसन्धानका लागि भन्दै अपराध अनुसन्धान कार्यालयमा १ हजार ३२ थान कागजात पठाएको थियो।
ती कागजात भेरिफाई गर्ने क्रममा नक्कली भेटिएपछि नक्कली कागजात बनाउने ९ जनालाई पक्राउ गरिएको अपराध अनुसन्धान कार्यालयका एसएसपी तथा प्रमुख सोमेन्द्रसिंह राठौरले बताए।
विमानस्थल सुरक्षा कार्यालयले पठाएकामध्ये २९६ थान कागजात क्रस चेक गर्ने क्रममा नक्कली रहेको खुलेको हो। बाँकी कागजात भने क्रस चेक गर्न बाँकी नै रहेको एसएसपी राठौरले बताए।
नक्कली प्रहरी रिपोर्ट, नक्कली श्रम स्वीकृत, प्लस टुको सर्टिफिकेट, नक्कली नाता प्रमाणित कागजातहरु, कोभिडको नक्कली रिपोर्ट, नक्कली बैंक स्टेट मेन्ट, लगागतका कागजातहरु क्रस चेकको क्रममा भेटिएको प्रहरीले जनाएको छ।
पक्राउ पर्नेहरुमा नवलपुर मध्यबिन्दु नगरपालिका–५ का ४५ वर्षीय जयराम श्रेष्ठ, गोरखाको सिरानचोक गाउँपालिका–८ कि ३४ वर्षीय भक्तबहादुर थापा, गोरखाको बारपाक सुलिकोट गाउँपालिकाका २१ वर्षीय विपिन ढकाल, सुलिकोट–४ का २३ वर्षीय अजित फेवाली, उदयपुरको बेलका नगरपालिका–१ का ३० वर्षीय आशिष श्रेष्ठ, काभ्रेको पाँचखाल नगरपालिका–३ का २८ वर्षीय जीवराम तामाङ, काठमाडौं–३२ का २३ वर्षीय साइरस विशंखे, काठमाडौं–१ का ३८ वर्षीय दीपक केसी, सल्यानको कालिमाटी–३ का ४२ वर्षीय बलबहादुर रावत छन्।
पक्राउ परेकामध्ये जीवरामले विदेश जान चाहनेहरुसँग सम्पर्क गरी कुन–कुन कागजात चाहिने रहेछ भन्दै बुझ्ने गरेका थिए। त्यसपछि कागजात बनाउन लाग्ने रकमदेखि टिकट बुकिङ र होटल बुकिङको काम गर्ने गरेको खुलेको छ।
दीपक केसीलेलाई भने भक्तबहादुर थापाले ह्वाट्स एपमा सम्पर्क गरी राहदानीको फोटो पठाई नक्कली कागजात बनाउन अर्डर दिने र प्रतिव्यक्ति १० हजार रुपैयाँ लिने गरेको खुलेको एसएसपी राठौरले बताए।
त्यसपछि दीपक केसीले बलबहादुरलाई सम्पर्क गरी ह्वाट्स एपमै विभिन्न व्यक्तिहरुबाट संकलन भएको राहदानीसहितको कागजात पठाइ ५ हजार रुपैयाँका दरले नक्कली कागजात बनाउन अर्डर दिने गरेका थिए।
बलबहादुरले नै भिषा, हवाई टिकट, श्रम स्वीकृत, बैंक स्टेटमेन्ट, चारित्रिक प्रमाणपत्र लगायतका कागजातहरु इडिटिङ गरी लागोसमेत राखी नक्कली कागजात बनाउने गरेको खुलेको छ। आशिष, जीवराम तामाङले नक्कली कागजातका लागि सेटिङ मिलाउने गरेको खुलेको छ । जिवराम भने विमानस्थलमा कार्यरत प्रहरी जवान हुन्।
अजित फेवालीले श्रम स्वीकृतको नक्कली कागजात बनाउने गरेको पाइएको प्रहरीले जनाएको छ। पक्राउ परेका अर्का व्यक्ति साइरस भने ग्राफिक डिजाइन एण्ड प्रिन्टिङ सर्भिसका सञ्चालक रहेको खुलेको छ।
यो कीर्ते प्रकरणको अनुसन्धान अझै जारी रहेकाले थप व्यक्तिसमेत पक्राउ पर्नसक्ने प्रहरीले जनाएको छ। पक्राउ परेकामध्ये एक जना भने पूर्वआर्मीसमेत रहेको पाइएको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
