काठमाडौं- नक्कली डकुमेन्ट बनाएर भिजिट भिसामा हुने मानव तस्करीबारे नयाँ तथ्य फेला परेको छ। काठमाडौं उपत्यका अपराध अनुसन्धान कार्यालयले गरेको अनुसन्धानका क्रममा नयाँनयाँ रहस्य खुल्दै गएका छन्।
पक्राउ परेका व्यक्तिहरुबाट बरामद भएको मोबाइलबाट थप अनुसन्धान गर्ने क्रममा हप्ता–हप्ता दिनमा मोबाइल नै परिवर्तन हुने गरेको नयाँ तथ्य फेला परेको छ। हालसम्म पक्राउ परेका ३२ जनामध्ये अध्यागमन र वायु सेवाका कर्मचारीमाथिको अनुसन्धानका क्रममा उनीहरुले एक–एक हप्तामा मोबाइल परिवर्तन गर्ने गरेको पाइएको हो।
प्रहरीले पक्राउ गरेको अवस्थामा मोबाइलमार्फत सम्पूर्ण गतिविधि लिक हुन सक्ने भन्दै उनीहरुले एउटा मोबाइल बढीमा एक हप्ता मात्रै प्रयोग गर्ने गरेको पाइएको अपराध अनुसन्धान कार्यालयका एसएसपी सोमेन्द्र सिंह राठौरले बताए।
पक्राउ परेकाहरुको मोबाइलमार्फत थप अनुसन्धान गर्ने क्रममा उक्त तथ्य खुलेको हो। हालै पक्राउ परेका विमानस्थलको अध्यागनका शाखा अधिकृत नरवीर खड्काले समेत एक–एक हप्तामा मोबाइल परिवर्तन गर्ने गरेको खुलेको हो।
आफूले प्रयोग गर्ने एउटा मोबाइल स्थायी भए पनि तस्करका एजेन्टसँग कुराकानी गर्न भने उनीहरुले छुट्टै मोबाइल प्रयोग गर्दै आएका थिए। मोबाइल र सीमकार्ड समेत तस्करका एजेन्टले नै अध्यागनका कर्मचारीलाई उपलब्ध गराउने गरेको पाइएको छ।
बढीमा एक हप्तासम्म एउटा मोबाइल र सीमकार्ड प्रयोग गरेपछि उक्त मोबाइल उनीहरुले पानीमा फाल्ने गरेको अनुसन्धानबाट खुलेको छ। एक महिना अघिदेखि यो गिरोहका सदस्यहरु पक्राउ पर्न थालेपछि एजेन्टले थप विवरणहरु खुल्न सक्ने भन्दै विमानस्थलमा कार्यरत कर्मचारीलाई हरेक हप्ता नयाँ मोबाइल र सीमकार्ड उपलब्ध गराउँदै आएका थिए।
सेन्ट्रल कलेक्सन गरेर रकम बाँडफाँट
पक्राउ परेकाहरुको अनुसन्धानबाट अध्यागमनका कर्मचारीले भने सेन्ट्रल कलेक्सन गरेर रकम बाँडफाँड गर्ने गरेको पाइएको छ। एक जनालाई अवैध तरिकाले भिजिट भिसामा बाहिर पठाए वापत ५० हजार रुपैयाँ अध्यागमनका कर्मचारीहरुले लिने गरेका थिए।
अध्यागमनका शाखा अधिकृत नरवीर खड्काकै संयोजकत्वमा विमानस्थलमा यात्रु सहजीकरण समिति थियो। उनै खड्का रहेको समितिले भने यात्रुहरुलाई सहजीकरण गर्नुको साटो प्रतिव्यक्ति ५० हजार रुपैयाँका दरले रकम उठाएर बाँडफाँट गर्ने गरेको खुलेको छ। ‘यात्रु सहजीकरण समितिभन्दा पनि यो त उठ्ती-पुठ्ती समिति जस्तो देखियो। रकम उठाउने र भागबण्डा लगाउने गरेको देखिन्छ,’ अपराध अनुसन्धान कार्यालयका एक अनुसन्धान अधिकृतले भने।
बाल्टिक होटलमा अध्यागमनका अधिकृत नरवीरले बुझे एक करोड
हाल पक्राउ परेका अध्यागमनका अधिकृत नरवीरले एक करोड रुपैयाँ निमा छिरिङ ट्राभल्सका सञ्चालक मनोज छिरिङ लामाबाट बुझेको खुलेको छ। मनोज उनका साला तथा उक्त ट्राभल्सका कर्मचारी पदम लामा पक्राउ परेपछि उक्त रहस्य बाहिर आएको हो।
उनीहरुले नरवीरमार्फत नै आफूहरुले नक्कली डकुमेन्ट बनाएर ३ सय जनालाई भिजिट भिसामा विदेश पठाएको बताएका छन्। त्यसवापत एक करोड रुपैयाँ नरवीरलाई दिएको पनि बयान उनीहरुले दिएका छन्।
विमानस्थल अगाडिको होटल बाल्टिक इनमा गएर उनीहरुले नरवीरलाई रकम बुझाउने गरेका थिए। मंसिर २६ गते २ लाख रुपैयाँ घुस लिदै गर्दा खड्का पक्राउ परे। पैसा लिँदै गर्दा रंगेहात फेला परेका खड्कालाई प्रहरी टोलीले पक्राउ गर्न लाग्दा पैसा समेत च्यातेका थिए।
प्रहरीले पक्राउ गर्दा खड्काको मोबाइलमा भिजिट भिसामा बाहिर जाने ६६ जनाको नाम लिस्ट समेत फेला परेको थियो। उक्त नामअनुसारका व्यक्ति भए सेटिङमा भिजिट भिसामा जान दिने ती बाहेककालाई भने फर्काउने गरिएको थियो।
तस्करका एजेन्टले विभिन्न पाँच वटा एअरलाइन्समार्फत सेटिङमा विदेश पठाउने गरेको खुले पनि अहिलेसम्म भने नेपाल वायु सेवा निगमका कर्मचारी मात्रै परेका छन्। अन्यको हकमा अनुसन्धान भइरहेकाले केही दिनमै थप व्यक्ति पक्राउ पर्ने प्रहरीले जनाएको छ।
आन्दोलन गर्ने चेतावनी
गृह मन्त्रालयकै कर्मचारी पक्राउ परेपछि विमानस्थलस्थित अध्यागमनमा खटिएका कर्मचारीहरु भने प्रहरीको अपरेसनप्रति असन्तुष्ट जनाउँदै आन्दोलन गर्नेसम्मको चेतावनी दिएका छन्।
निजामती नियमावली विपरीत कामकाजमा खटिएका कर्मचारीलाई प्रहरीले पक्राउ गरेको भन्दै उनीहरुले असन्तुष्ट जनाएका हुन्।
आन्दोलन गर्नेसम्मको चेतावनी दिएपछि गृह मन्त्रालयको आइतबार यसबारे बुझ्ने प्रयास समेत गरेको थियो। अपराध अनुसन्धान कार्यालयका एसएसपी राठौरले फौजदारी कसुरको प्रमाण पर्याप्त भएकाले पक्राउ गरिएको भन्दै गृहमा रिपोर्टिङ समेत गरेका थिए।
प्रहरी टोलीले निजामती कर्मचारीको कसुरबारेको प्रमाण समेत देखाएपछि भने उनीहरु हच्किएको स्रोतले नेपाल लाइभलाई बतायो। त्यसो त पक्राउ परेका अधिकृत खड्का सत्ताको बागडोडर सम्हालेको माओवादी केन्द्रका प्रदेश सांसद विमला केसीको ज्वाईं नाता पर्ने व्यक्ति समेत रहेको पाइएको छ। जसका कारण पनि प्रहरीमाथि अहिले दबाब आइरहेको छ।
अहिलेसम्म यो प्रकरणमा प्रहरीले ३४ जनालाई पक्राउ गरेको छ। अपरेसन अझै जारी रहेकाले पक्राउ पर्नेको संख्या थप बढ्ने बताइएको छ। संगठित रुपमा नेटकर्व नै बनाएर नक्कली डकुमेन्ट बनाउँदै भिजिट भिसामा मानव तस्करी गरेको पाइएपछि प्रहरीले लिखतसम्बन्धी कसुरका साथै संगठित अपराधको कसुरमा पनि मुद्दा चलाउने तयारी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
