काठमाडौं- एम्बुलेन्सबाट थुतेर हत्या गरिएका सशस्त्र प्रहरी बलका सहायक निरीक्षक थमन विकको हत्या सम्बन्धी मुद्दामा अन्तिम बहस सकिएको छ। जिल्ला अदालत महोत्तरीमा केही दिनदेखि बहस चलिरहेको थियो।
जिल्ला अदालतकी श्रेष्तेदार नुतन झाका अनुसार निवेदक, सरकारी वकिल र जवाफी बहस सकिएको छ।
‘बहस सकिएको छ। निवेदक, सरकारी वकिल र जवाफी बहस समेतपछि फैसला आउला,’ झाले भनिन्, ‘श्रीमान्हरु छलफलमा हुनुहुन्छ। सम्भवत: आजै फैसला आउन सक्छ।’
न्यायाधीश उद्धवप्रसाद भट्टराईको इजलासमा मुद्दा पेसी परेको थियो। उक्त मुद्दामा नेकपा एमालेका निलम्बित सांसद लक्ष्मी महतो कोइरी समेत संलग्न भएको अभियोगपत्रमा दाबी गरिएको छ। नेपाल सरकारको जाहेरीले जिल्ला अदालतमा कर्तव्य ज्यान र आगो लगाएको दुई मुद्दा जिल्ला अदालतमा दर्ता भएको थियो। २०७२ फागुन २७ गते जिल्ला अदालत महोत्तरीमा मुद्दा दायर भएको थियो।
मधस आन्दोलनको क्रममा सशस्त्र प्रहरीका असई विकको हत्या भएको थियो। सो हत्याको आरोपमा सांसद कोइरी, अभिराम शर्मा, कौशलकुमार यादव, रामशंकर मिश्र लगायतका २८ जना प्रतिवादी रहेका छन्। तीमध्ये जलेश्वर कारागारमा प्रदीप साह, सञ्जय साह र पवन कापर लगायत पुर्पक्षको आदेशमा थुनामा छन् । तर कोइरी भने जिल्लाबाट धरौटीमा छुटेका थिए । पछि उच्च अदालतले फैसला उल्ट्याए पनि उनी फरार रहँदै आएका छन्।
२०७२ भदौ २५ गते मधेस आन्दोलनका क्रममा आन्दोलनकारीको निर्घात कुटपिटबाट गम्भीर घाइते विकलाई अस्पताल लाने क्रममा एम्बुलेन्सबाट पनि थुतेर हत्या गरिएको थियो। हत्या लगत्तै उनकी पत्नी शोभाले किटानी जाहेरी दिएकी थिइन्। सोही जाहेरीका आधारमा सरकारले मुद्दा दायर गरेको थियो। तर हत्याको आरोप लागेका कोइरीलाई नेकपा एमालेले जनता समाजवादीबाट पार्टी प्रवेश गराउँदै टिकट दिएको थियो। नेकपा एमालेले टिकट दिएपछि गत मंसिर ४ गते भएको प्रतिनिधि सभा सदस्य चुनावमा कोइरी महोत्तरी–१ बाट निर्वाचित भएका थिए।
उनले पुस ७ गते सांसदको शपथ खाए। केही समय संसद्मा उपस्थित पनि भए। तर प्रहरीले पक्राउ गरेन।
नेपाल प्रहरी प्रधान कार्यालयले कोइरीले शपथ लिएकै दिन पुस ७ गते उनलाई लागेको हत्या अभियोगबारे प्रतिनिधि सभालाई लिखित जानकारी गराएको थियो। त्यस दिन उनले दिउँसो १ बजे शपथ लिएका थिए भने दिउँसो २ बजे प्रहरीको पत्र संसद्मा पुगेको थियो।
तर, कोइरी फरार रहेको पत्र संसद् सचिवालयमा पठाएपछि गएको वैशाख १९ गतेदेखि उनी निलम्बित भएका थिए।
कसरी भयो घटना?
२०७२ सालको मधेस आन्दोलनका बेला मधेसी जनधिकार फोरम महोत्तरीको नेतृत्वमा लक्ष्मी महतो कोइरी थिए।
२०७२ भदौ २५ गते सीमा सुरक्षा कार्यालय जलेश्वरमा कार्यरत सशस्त्र प्रहरीका सहायक निरीक्षक विकको बिभत्स हत्या भयो। झडपमा घाइते भएका विकलाई उपचारका लागि जनकपुर लैजाने क्रममा एम्बुलेन्सबाटै थुतेर धान खेतमा लखेटी–लखेटी हत्या गरियो।
उनको हत्याको नेतृत्व कोइरीले नै गरेको अभियोगपत्रमा दाबी गरिएको छ। उनीसहित २८ जनालाई हत्याको संलग्नता भएको अभियोगपत्रमा दाबी छ।
तर, उक्त मुद्दामा जिल्ला अदालत महोत्तरीले २०७६ असोज २ कोइरीलाई १ लाख धरौटीमा छाड्ने आदेश दियो। यो आदेश लगत्तै उनी फरार भए। सरकारले जिल्लाको आदेश बदर हुनुपर्ने माग गर्दै उच्च अदालत जनकपुरमा निवेदन दियो।
उच्च अदालत जनकपुरले २०७७ मंसिर १९ गतेको आदेशले फैसला उल्ट्यायो र थुनामा राख्न भन्यो। तर उनी फरार नै रहे। उनले जसपाबाट राजनीतिक भविष्य नदेखेपछि एमाले प्रवेश गरे अनि टिकट पाउँदै उम्मेदवार बने अनि जित हात पारे।
पार्टी बदलेर महोत्तरी–१ मा उनले वारेसमार्फत उम्मेदवारी दिएका थिए। पक्राउ पर्ने डरले उनी खुलेर प्रचार प्रसारमा पनि सहभागी भएका थिएनन्।
उनी माओवादी केन्द्रका उम्मेदवार गिरिराजमणि पोखरेललाई पराजित गर्दै प्रतिनिधि सभामा विजयी भए।
मतगणना र विजयी घोषणा सभामा पनि कोइरी देखा परेनन्। उनले निर्वाचित भएको प्रमाणपत्र पनि वारेसमार्फत नै बुझेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1785139095.jpg)
-1764146706.png)
