काठमाडौं– नक्कली भुटानी शरणार्थी बनाएर अमेरिका लागायत देशमा लैजाने भन्दै नेपाली नागरिकबाट करोडौं रकम उठाएर भएको ठगी प्रकरणका मुख्य अभियुक्त सन्देश शर्मालाई नख्खु कारागार पठाइएको छ।
यसअघिसम्म केन्द्रीय कारागार सुन्धारामा रहेका शर्मालाई उच्च अदालत पाटनको फैसला आएसँगै नख्खु कारागार पठाइएको हो। केन्द्रीय कारागारका जेलर ललित बस्नेतले शर्मालाई नख्खु कारागार पठाइएको बताए।
यही प्रकरणका मुख्य अभियुक्त केशव दुलाल र सानु भण्डारीलाई यसअघि नै सुरक्षा थ्रेट भन्दै केन्द्रीय कारागारबाट नख्खु पठाइएको थियो। उनीहरुपछि अहिले शर्मालाई पनि नख्खु कारागार पठाइएको हो।
६ जना रिहा, टेकनाथ रिजाल जेलमै
उच्च अदालत पाटनका न्यायाधीशद्वय जनक पाण्डे र प्रकाश खरेलको संयुक्त इजलासले भुटानी शरणार्थी प्रकरणमा जोडिएकामध्ये ६ जनालाई धरौटीमा रिहा गर्न आदेश दिएको थियो।
जिल्ला अदालत काठमाडौंको फैसला उल्टाउँदै पुर्पक्षमा थुनामा रहेकामध्ये ६ जनालाई धरौटी लिएर छाड्ने आदेश भएको थियो। जसमध्ये पाँच जना धरौटी बुझाएर रिहा भएका छन्।
धरौटीमा छाड्न आदेश दिइएकाहरुमा भुटानी शरणार्थी नेता टेकनाथ रिजालदेखि पूर्वगृहमन्त्री समेत रहेका नेपाली कांग्रेसका नेता बालकृष्ण खाणका पीए नरेन्द्र केसीसम्म थिए। रिजालसँग १५ लाख, केसीको हकमा १० लाख, हरिभक्त महर्जनसँग १५ लाख, मुस्लिम आयोगका अध्यक्ष शमशेर मियासँग १० लाख, एमाले नेता तथा पूर्वउपप्रधानमन्त्री समेत रहेका बहालवाला सांसद टोपबहादुर रायमाझीका छोरा सन्दीप रायमाझीसँग ३० लाख र रामशरण केसीसँग १५ लाख रुपैयाँ धरौटी माग गरिएको थियो।
उनीहरुमध्ये ५ जनाले धरौटी बुझाएर रिहा भएका छन्। तर टेकनाथ रिजालले धने धरौटी नबुझाएकाले थुनामै रहेको जेलर बस्नेतले बताए। रिजालले यसअघि नै यति धेरै धरौटी तिर्न आफूसँग रकम नभएको बताउँदै आएका थिए।
यी बाहेक आशिष बुढाथोकीलाई साधारण तारेखमा रिहा गर्न आदेश दिइएको थियो। जसअनुसार बुढाथोकी पनि रिहा भएका छन्।
रिहा भएका सबैलाई सम्पत्ति शुद्धीकरण विभाग र अख्तियार दुरुपयोग अनुसन्धान आयोगमा समेत उपस्थित गराइएको थियो। उनीहरु ६ जना नै दुबै ठाउँबाट समेत रिहा भएका छन्।
भुटानी शरणार्थी समस्या समाधानका लागि भन्दै तत्कालीन गृहमन्त्री रामबहादुर थापाको पालामा ०७६ जेठमा एउटा कार्यदल गठन गरिएको थियो। गृह मन्त्रालयका पूर्वसहसचिव बालकृष्ण पन्थीको संयोजकत्वमा विज्ञको रुपमा गणेशबहादुर केसी र सदस्य सचिवको रुपमा गृहका तत्कालीन शाखा अधिकृत दीपकप्रसाद न्यौपाने सदस्य थिए।
तर पन्थी नेतृत्वको कार्यदलले मिलेमतोमा नेपाली नागरिकलाई भुटानी शरणार्थीको सूचीमा राखेको खुलेको थियो। अमेरिका लैजाने र त्यस बापत मोटो रकम असुल्ने उद्देश्यसहित ४२९ जनालाई भुटानी शरणार्थीको सूचीमा समेटिएको थियो।
तीमध्ये केही नक्कली भुटानी शरणार्थी थिए। पछि बालकृष्ण खाण गृहमन्त्री भएपछि त्यो प्रतिवेदन समेत कीर्ते गरेर अनुसूची थप्दै थप व्यक्तिहरूको नाम राखिएको पाइएको थियो।
नक्कली शरणार्थी बनाएर मोटो रकम असुल्ने योजनामा तत्कालीन गृहमन्त्री बादलका सुरक्षा सल्लाहकार इन्द्रजित राईदेखि अन्य नेता तथा गृह मन्त्रालयकै उच्च तहका कर्मचारीको संलग्नता रहेको पीडितहरूले बताएका थिए।
नेपाली नागरिकलाई नै भुटानी शरणार्थीको सूचीमा राखिएको विषय सार्वजनिक भएपछि उक्त प्रतिवेदन गुपचुप पारिएको थियो। गुपचुप पारिएको उक्त प्रतिवेदन पछि गिरोहको हातमा पुगेको थियो।
उनीहरूले त्यही प्रतिवेदनमा ४४६ जना नेपाली नागरिकको नाम समेट्दै उनीहरूलाई अमेरिका लैजाने भनेर रकम उठाएर ठगी गरेका थिए।
यो ठगी प्रकरणमा ३० जनालाई प्रतिवादी बनाउँदै मुद्दा दायर भएको थियो। हाइप्रोफाइलसहित विभिन्न मितिमा १८ जनालाई पक्राउ परेर मुद्दा चलाइएको थियो।
ठगी, संगठित ठगी, राज्य विरुद्धको कसुर, लिखतसम्बन्धी कीर्ते र एकीकृतको कसुरमा काठमाडौं जिल्ला अदालतमा मुद्दा दर्ता गरिएको थियो।
काठमाडौं जिल्ला अदालतले १६ जनालाई पुर्पक्षका लागि थुनामा पठाउने आदेश भएको थियो। जिल्लाको आदेशविरुद्ध परेको पुनरावलोकन निवेदनको सुनुवाइपछि फैसला सुनाउँदै उच्च अदालत पाटनले थुनामा रहेका ६ जनालाई धरौटी लिएर तारेखमा राखी मुद्दाको पुर्पक्ष गर्न भनेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_Tr387xuecJ-1778130428.jpg)
-1764146706.png)
