काठमाडौं- सेल्स गर्लको रुपमा सुनचाँदी पसलमा काम गर्न राखिएकी एक युवती ६० लाख भन्दाबढीको गरगहना र कार लिएर फरार भएपछि प्रहरीले पक्राउ गरेर मुद्दा चलाएको छ।
बैतडीको सिगास गाउँपालिका–८ घर भई काठमाडौं तारकेश्वर–३ जितपुर बस्दै आएकी २४ वर्षीया युवती स्मारिका बोहरालाई पक्राउ गरेर प्रहरीले चोरी सम्बन्धी मुद्दा चलाएको हो। कोलकत्ता घर भएका भारतीय नागरिक बुद्धदेव मैतीको जाहेरीको आधारमा पक्राउ परेकी बोहराविरुद्ध अहिले जिल्ला अदालत काठमाडौंमा चोरीसम्बन्धी मुद्दा दर्ता भएको छ।
आफू कलकत्ता गएको बेला पसलको चाबी हराएको भन्दै अर्को चाबी बनाउन लगाएर पसल फोडेर सेफमा राखिएका गरगहना र नगद तथा आफ्नो कार समेत चोरी भएको भन्दै मैतीले प्रहरी वृत्त जनसेवामा जाहेरी दिएका थिए।
न्यूरोडमा रहेको न्यू दीप ज्वेलर्सका मालिक मैती गत वैशाखमा कोलकत्ता गएका बेला उनको पसलमा चोरी भएको थियो। कोलकत्तामा रहेका बेला मैतीलाई आफ्नो पसलका एक कामदारले सटर खोलेर सेफ समेत फोडेर गरगहना तथा नगद लिएर स्मारिका बोहरा भागेको भन्दै जानकारी दिएपछि जाहेरी दिएको मैतीले बताएका थिए।
प्रहरी अनुसन्धानबाट स्मारिकाले चाबी बनाउने मान्छे पसलमा ल्याएर अर्को चाबी बनाउन लगाई सटर खोलेर सेफ समेत फोडेर गरगहना र नगद चोरी गरी लगेको खुलेको छ।
स्मारिकाले नगद र गरगहना गरी ६७ लाख र ४० लाख रुपैयाँ पर्ने मैतीको कार समेत गरी १ करोड ७ लाख रुपैयाँ बराबरको धनमाल लिएर फरार भएको जाहेरी परेपछि प्रहरी वृत्त जनसेवाले करिब १ महिनाअघि स्मारिकालाई पक्राउ गरेको थियो।
अनुसन्धानको क्रममा स्मारिकाले चोरी गरेको पुष्टि भएपछि उनीविरुद्ध अहिले चोरीको कसुरमा जिल्ला अदालत काठमाडौंमा मुद्दा दर्ता भएको छ। कार भने चोरी गरेको नदेखिएको र स्मारिकालाई चढ्न दिएका दिएकाले गरगहना मात्रै चोरी भएको निष्कर्ष निकाल्दै ६७ लाख रुपैयाँ बिगो मागदाबी गर्दै मुद्दा दायर भएको छ।
यता स्मारिकाले भने आफूले चोरी नरेको दाबी गर्दै प्रहरीसमक्ष बयान दिएकी छिन्। भारतीय नागरिक मैतीसँग आफ्नो विवाह समेत भएको र पछि कुटपिट गर्न थालेपछि बस्न नसक्ने भएर जिल्ला अदालत काठमाडौंमा डिभोर्सको मुद्दा समेत हालेको बताएकी छिन्।
उक्त मुद्दा अहिले पनि विचाराधीन अवस्थामा रहेको उनको भनाइ छ। डिभोर्सको प्रक्रिया चलेपछि भन्सार छलीको आरोपमा केही समयअघि मैती आफैं वीरगञ्जमा पक्राउ परेका थिए। आफू पक्राउ पर्नुमा स्मारिकाको हात रहेको आशंका गर्दै सोही दुश्मनीको बदला लिन आफूमाथि झुटो आरोप लगाइएको स्मारिकाको दाबी छ।
यद्यपि, इन्कारी बयान लिएपछि विभिन्न घटनाक्रम तथा प्रमाणहरुको आधारमा स्मारिकाले चोरी गरेको निष्कर्ष प्रहरीले निकाल्दै उनीविरुद्ध मुद्दा चलाएको छ। स्मारिकाको लक्ष्मी बैंकको खातामा समेत स्रोत नखुलेको ४० लाख रुपैयाँ देखिएपछि उक्त खाता समेत अहिले रोक्का गरिएको छ।
स्मारिकाले मुलुकी फौजदारी अपराध संहिता २०७४ को दफा २४१ को उपदफा (१) र (२) बमोजिमको कसुर गरेको भन्दै सोही अनुसारको सजाय मागदाबी गरिएको छ। जसअनुसार चोरीको बिगो बराबरको मागदाबी र तीन वर्षसम्म कैद र ३० हजार रुपैयाँसम्म जरिवाना हुने व्यवस्था छ।
अपराध पीडित संरक्षण ऐन २०७५ को दफा ४१ अनुसार पीडित राहत कोषमा क्षतिपूर्ति शुल्क समेत भराउन माग गरिएको छ।
काठमाडौं जिल्ला अदालतका न्यायाधीश दुर्गा खड्काको इजलासमा अहिले स्मारिकाको बयान भइरहेको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
