फाइल तस्बिर
काठमाडौं– काठमाडौं उपत्यकाको तीन जिल्लाको कमाण्ड गरेको काठमाडौं उपत्यका प्रहरी कार्यालयले चाडवाडलाई लक्षित सुरक्षा योजना बनाएर लागू गरेको छ । दशैं, तिहार, नेपाल संवत र छठलाई लक्षित गरेर सुरक्षा योजना बनाएर लागू गरिएको उपत्यका प्रहरी कार्यालयका प्रवक्ता तथा एसएसपी दीनेशराज मैनालीले बताए।
‘सुरक्षित उपत्यका, हाम्रो प्रतिबद्धता’ अभियानलाई साकार पार्न मातहतको काठमाडौं उपत्यका ट्राफिक प्रहरी कार्यालय रामशाहपथ, काठमाडौं, ललितपुर र भक्तपुरका ३ वटा परिसरहरु तथा काठमाडौं उपत्यका अपराध अनुसन्धान कार्यालय, मिनभवनबाट संयुक्त रुपमा सुरक्षा योजना तयार पारी लागू गरिएको उनले बताए।
सुरक्षा योजना अनुरुप प्रविधि समेतको उच्चतम प्रयोग गरी अति प्रभावकारी तवरले प्रहरी जनशक्ति परिचालन गरी समाजमा शान्ति, सुरक्षा, अमय चयन कायम गरिने मैनालीले बताए।
यस्तो छ उपत्यकाको सुरक्षा योजना
(क) चाडपर्वमा शान्ति, सुरक्षा तथा अमन चयन कार्यका लागि खटिने प्रहरी
१. यो सुरक्षा योजना मिति असोज २१ गतेदेखि बडा दशैँ, शुभ दीपावली, नेपाल सम्वत र छठपर्वसम्म कायम रहने छ ।
२. काठमाडौं उपत्यकास्थित ३ वटै जिल्लाहरुमा पैदल गस्ती, मोवाइल गस्ती, कर्डन, सादा पोशाक, पिकेटिङ, स्ट्राइकिङ, रिजर्भ, सीसीटीभी, वाक थु्र गेट, ड्रोनबाट निगरानी, ट्राफिक व्यवस्थापन, विपद व्यवस्थापन लगायतका प्रो–एक्टिभ पुलिसिङको माध्यमद्वारा चाडपर्वमा प्रभावकारी सुरक्षा व्यवस्था गरिने छ ।
३. बैंक, वित्तीय संस्था तथा नगद र बहुमूल्य गर–गहनाको कारोवार हुने स्थानहरुमा सादा पोशाकमा सञ्चाारका साधन र साना हतियारसहितका प्रहरी सुरक्षाकर्मी खटाई सुरक्षा प्रदान गरिने छ ।
४. यात्रुहरुलाई सहजता प्रदान गर्ने उद्देश्यले उपत्यकाका विभिन्न १५ स्थानमा ट्राफिक प्रहरीसहितको यात्रु सहायता कक्ष स्थापना गरिएको छ ।
५. काठमाण्डौ उपत्यकाका विभिन्न स्थानहरु, मल–मार्टहरु र मुख्य–मुख्य नाकाहरुमा आधुनिक प्रविधिका साथै केनाइन कार्यालयबाट तालीम प्राप्त कुकुरबाट चेकजाँच (डग स्नीफिङ एण्ड सर्च) गरिनेछ ।
६. उक्त कार्यका लागि ५ हजार ८३३ जना प्रहरी सुरक्षाकर्मीहरु परिचालित हुनेछन् ।
ख.सवारी आवागमन कार्यका लागि खटिने ट्राफिक प्रहरी
१. सवारी साधनको टिकटको कालो बजारी बढ्न सक्ने, एउटै टिकट पनि धेरैजनालाई बेचिन सक्ने, आरक्षित सिट अन्य व्यक्तिले ओगट्न सक्ने, यात्रुको चाप अनुसार सवारी साधनको व्यवस्थापनमा कठिनाई हुन सक्ने, छतमा यात्रु र सामान राखिन सक्ने, अपरिचित व्यक्तिले नशालु पदार्थ खुवाई लुट्न सक्ने, लामोदुरीका सवारी साधनहरुमा दुई वटा चालक नराखिन सक्ने, मादक पदार्थ सेवन (मापसे), लागु पदार्थ सेवन (लापसे) गरी सवारी साधन चलाउन सक्ने, तीब्र गतिमा सवारी साधन चलाउन सक्ने जस्ता कार्यबाट सर्वसाधारण यात्रुहरुमा पर्न जाने असुविधा तथा दुर्घटनालाई न्यूनीकरण गरी यात्रुहरुको आवागमन सुरक्षित गराउने ।
२. उक्त कार्यका लागि १ हजार ८ सय जना ट्राफिक प्रहरी सुरक्षाकर्मीहरु परिचालित हुनेछन् ।
(ग) चाडपर्वमा जम्मा खटिने प्रहरी सुरक्षाकर्मीहरुको संख्या ७ हजार ६ सय ३३ हुनेछ ।
प्रहरी सम्पर्कको लागि
– कुनै अवाञ्छित गतिविधि देखिएमा तत्कालै १०० मा प्रहरीलाई खबर गरौँ,
– प्रहरी कन्ट्रोल १००, ०१–४२२८४३५ र ९८५१२८३०२६,
– ट्राफिक प्रहरी कन्ट्रोल–१०३,
– महिला तथा बालबालिका खोज तलास केन्द्र, भृकुटीमण्डप (१०४ ।
निम्न कार्यहरु नगर्न प्रहरीको अनुरोध
१. अपरिचित व्यक्तिले दिएको खानेकुरा नखाऔँ ।
२. नगद, वहुमूल्य सामान, गर गहना र महँगा मोवाइल फोनसहित भीडभाडमा सकेसम्म नजाऔं ।
३. घर तथा पसल बाहिर जानुपरेमा घरको झ्याल ढोका राम्रोसँग बन्द गरेको छ र छैन एकिन गरौं र सकेसम्म साइरन जडित ताल्चा जडान गरौँ ।
४. लामो समय घर पसल छोडी बाहिर जानु परेमा छिमेकी तथा स्थानीय प्रहरीलाई खवर गर्ने गरौँ ।
५. सकेसम्म डिजिटल प्रविधिमार्फत रकमको कारोवार गर्ने गरौं । आफ्नो मोवाइल बैंकिङको वन टाइनम पासपोर्ट (ओटिपी) हरदम गोप्य राखौं । चेकबाट कारोबार गर्नु पर्ने अवस्थामा आफ्नो रकमले खाम्ने अङ्कको मात्र चेक जारी गर्ने गरौं ।
६. सामाजिक सञ्जाललमा आफ्नो व्यक्तिगत तथा यात्राको विवरण अद्यावधिक गर्ने कार्य कदापि नगरौं ।
७. लङ्गुरबुर्जा, तास, जुवा लगायतका हारजित हुने खेल खेल्दा उठिबास हुन सक्नेतर्फ सचेत बनौं ।
८. मादक पदार्थ सेवन (मापसे), लागु पदार्थ सेवन (लापसे) गरी कदापि सवारी नचलाऔं ।
९. ट्राफिक नियमको सदैव पालना गरौं ।
१०. अपराध कार्यलाई भगाऔं ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
