काठमाडौं– प्रधानमन्त्री पुष्पकमल दाहाल प्रचण्डले अर्थतन्त्रमाथि परेको दबाबलाई समाधान गर्न ‘बोल्ड डिसिजन’को आवश्यकता रहेको बताएका छन्। टालटुले तरिकाबाट अर्थतन्त्रमा देखिको अहिलेको समस्या समाधान नहुने उनको भनाइ छ।
नेपाल उद्योग वाणिज्य महासंघले बिहीवार काठमाडौंमा गरेको ‘राष्ट्रिय आर्थिक बहस: सुधारका लागि सहकार्य’ विषयक कार्यक्रमलाई सम्बोधन गर्दै उनले यस्तो बताएका हुन्। सरकारी कार्यक्रम बनाउने नीति, प्रक्रिया र विधि बजेट निर्माणको प्रक्रिया र विधिमा पनि गम्भीर आत्मसमीक्षा गर्दै पोलिसीमा बोल्ड डिसिजनको आवश्यकता रहेको प्रधानमन्त्रीको भनाइ छ।
उनले निजी क्षेत्र र सार्वजनिक क्षेत्रको सहकार्यमा सरकारले अपनाउँदै आएका नीतिका सन्दर्भमा मेजर अपरेशनतिर जाने गरी सोचिरहेको बताए। अर्थतन्त्र सुधारका टालटुले तरिकाबाट अहिलेका समस्याको समाधान दिगो रुपमा गर्न सम्भव नरहेको उनले उल्लेख गरे। प्रधानमन्त्री प्रचण्डले अझै पनि अर्थतन्त्रको मुल समस्या समाधान हुन नसकेको बताए।
प्रधानमन्त्री प्रचण्डले भने– ‘मैले २०८०/०८१ को नीति तथा बजेट कार्यक्रमका सन्दर्भमा प्रतिनिधि सभामा बोल्दै गर्दा अब कुनै सुधारात्मक उपायले नेपालको अर्थतन्त्रमा वा हाम्रो ऐन, कानुनमा रहेका सीमाहरु वा पोलिसीमा रहेका कमीहरु सुधारको तरिकाद्वारा हल गर्न सकिने मैले देख्दिनँ। त्यसकारण एउटा मेजर अपरेशन जरुरी छ। हामीले अहिलेसम्म अपनाउँदै आएको नीति कति सफल भयो? त्यसले हामीलाई कहाँ ल्याइपुर्यायो? हामीले सरकारी कार्यक्रम बनाउने नीति, प्रक्रिया र विधि बजेट निर्माणको प्रक्रिया र विधिमा पनि गम्भीर आत्मसमीक्षा गर्दै पोलिसीमा बोल्ड डिसिजन आवश्यक छ भनेको थिएँ। तर यसै वर्षको नीति, कार्यक्रम र बजेटका सन्दर्भमा परम्परागत ढंगले चल्दै आएको कुरामा हामीले सुधार गर्न समयको दबाबका कारण सम्भव छैन। हामीले जे गरेका थियौँ त्यही फलो गर्नुको विकल्प छैन। तर अर्को पटक नीति कार्यक्रम बनाउने सन्दर्भमा पनि, बजेट निर्माणको सन्दर्भमा पनि, अर्थतन्त्रमाथि परेको दबाबलाई समाधान गर्न पनि हामीले केही बोल्ड डिसिजन गर्नुपर्नेछ। निजी क्षेत्र र सार्वजनिक क्षेत्रको सहकार्यका सन्दर्भमा पनि हामीले अपनाउँदै आएका नीतिका सन्दर्भमा पनि मेजर अपरेशनतिर जाने गरी सोच्दैछु। अब फेरि नीति कार्यक्रम बनाउने तयारी त सुरु गर्नुपर्छ हामीले अर्को वर्षको भनेर क्याबिनेटमा थोरै चर्चा भयो। बजेटको तयारी पनि गर्नुपर्छ। अर्थतन्त्रमाथि परेको दबाबको सामना गर्ने नीति, उपाय पनि सोच्नुपर्ने हुन्छ। हामीले चर्चा सुरु गरेका छौँ। हामी टालटुले तरिकाले, सुधारका सामान्य तरिकाले अहिलेका समस्याको समाधान दिगो रुपमा गर्न सम्भव छैन। कहीँ न कहीँ हामीले पोलिसी सिफ्ट गर्न जरुरी छ। त्यसो गर्न नसके अफ्ठ्यारो छ। सुधार गर्न त बल गरियो, वित्तीय नीति र मौद्रिक नीतिका बीचमा तालमेल मिलाउन निकै मिहेनत पनि भयो। बैंकको ब्याज केही घटाउने प्रयास पनि भयो। त्यो सामान्य सुधारात्मक जस्तो। सामाजिक क्षेत्रमा सुधार गर्ने कोसिस भयो। विदेशमा रहेका नेपालीका सन्दर्भका पनि कुरा आए। सामाजिक सुरक्षा कोषमा आबद्ध गर्नेकुरा होस्, नागरिकताको समस्या हल गर्ने कुरा होस्, मतदानको अधिकार दिने कुरा होस्, पासपोर्ट लाइसेन्स समस्याका समाधान गर्ने कोसिस गरियो, तर अर्थतन्त्रको मुल समस्या समाधान भएको छैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
