काठमाडौं– वाणिज्य, आपूर्ति तथा उपभोक्ता संरक्षण विभागको चाडपर्व लक्षित अनुगमन टोलीले काभ्रे उद्योग वाणिज्य संघका अध्यक्षलाई तीन लाख जरिवाना तिराएको छ।
बुधबार काभ्रेस्थित पनौतीमा रहेको राजेन्द्र पसछेको ‘ओम श्री पसछे ट्रेडर्स’मा विभागले छापा मारेको थियो। पसलमा म्याद गुज्रिएको २९ बोरा चामल फेला पारेपछि विभागको टोलीले उक्त चामल बरामद गरी जरिवानासमेत गराएको छ। बरामद गरेको म्याद सकिएको चामल नष्ट गर्दै विभागले पसललाई ३ लाख रुपैयाँ जरिवाना गरेको सूचना अधिकारी आनन्दराज पोखरेलले जानकारी दिए।
उनले ट्रेडर्सबाट ६७ हजार रुपैयाँ बराबरको म्याद सकिएको चामल बरामद गरी नष्ट गरिएको बताए।
विभागले अहिले चाडपर्वलाई लक्षित गर्दै बजार अनुगमन गरिरहेको छ। दैनिक १३ वटा भन्दा बढी टोली पठाएर बजार अनुगमन भइरहेको पोखरेलले बताए। उपभोक्ता संरक्षण ऐन २०७५ विपरीत व्यवसाय गर्ने व्यापारी फेला परे कडाभन्दा कडा कार्बाही गर्ने उनले बताए।
‘चाडपर्वको बेलामा बजारमा महँगी बढ्ने तथा म्याद गुज्रेका वस्तु रिलेबलिङ गरी बिक्री वितरण गर्ने जस्ता प्रवृत्ति बढ्न नदिन हामीले अनुगमन टोलीको संख्या बढाएका छौँ,’ पोखरेलले भने, ‘बजारमा कालोबजारी गर्ने, अखाद्य वस्तु बिक्री गर्ने व्यापारीलाई कडाभन्दा कडा कारबाही गर्ने गरेका छौँ।’
जरिवानाबाट एक दिनमै ४ लाखसम्म संकलन
विभागले गत असोज १० गते ३३ वटा व्यवसायिक पसलहरुको अनुगमन गरेको छ। जसमध्ये २२ वटा पसलहरुलाई सामान्य निर्देशन दिएर कागजात माग गरेको छ। उपभोक्ता संरक्षण ऐनविपरीत व्यवसाय गर्ने ११ वटा पसललाई कारबाहीस्वरुप जरिवाना तिराएको छ। विभागले सोही दिन मात्रै जरिवानाबाट ४ लाख ८५ हजार रुपैयाँ संकलन गरेको थियो।
यस्तै विभागले असोज ९ गते जरिवानावापत एक लाख ५ हजार रुपैयाँ संकलन गरेको छ। ८ गते दुई लाख २५ हजार, ७ गते एक लाख ६० हजार ६ गते ४० हजार, ४ गते ७० हजार ३ गते ५५ हजार , २ गते ८० हजार र १ गते २५ हजार रुपैयाँ बजार अनुगमनबाट संकलन गरेको विभागले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1793102318.png)
-1786602170.png)
