काठमाडौं– मोटरसाइकलको ब्रेक प्याडको रुपमा भित्र्याएर त्रिभुवन अन्तर्राष्ट्रिय विमानस्थलको भन्सारबाट जाँचपास गराइसकेको अवस्थामा बरामद भएको ६० किलो बढीको सुन तस्करी प्रकरणमा अदालती बयान सकिएको छ। काठमाडौं जिल्ला अदालतमा बयान सकिएपछि बुधबार थुनछेक बहस सुरु भएको छ।
काठमाडौं जिल्ला अदालतका सूचना अधिकारी दीपक दाहालका अनुसार अभियोगपत्रसँगै अदालतमा पेस गरिएका सबै प्रतिवादीको बयान सकिएको हो। बयान सकिएपछि जिल्ला न्यायाधीश माधवप्रसाद मैनालीको इजलासमा बहस शुरु भएको छ।
सुरुमा सरकारी बकिलहरुले बहस थालेका छन्। जिल्ला सरकारी वकिल कार्यालय काठमाडौंका प्रमुख अच्युतमणि नेउपानेसहितले बहस गरिहरेका छन्। उनीहरुले अभियोगपत्रको माग बमोजिम थुनामा पठाउनुपर्ने दाबी पेस गरिरहेका छन्।
सुन तस्करी प्रकरणमा नेपाली र विदेशी मानिसहरु भएकाले उनीहरु देश बाहिर जानेदेखि प्रमाण नष्टसम्म गर्न सक्ने भएकाले पक्राउ परेकाहरुलाई थुनामै राखेर मुद्दाको पुर्पक्ष हुनुपर्ने मागदाबी अभियोगपत्रमा गरिएको छ।
साउन २ गते राजस्व अनुसन्धान विभागको टोलीले त्रिभुवन अन्तर्राष्ट्रिय विमानस्थलको भन्सार कार्यालयको गेट बाहिर एउटा ट्याक्सीलाई नियन्त्रणमा लिएर ब्रेक प्याडका रुपमा तस्करी गरी ल्याइएको सुन बरामद गरेको थियो। ब्रेक प्याडका स्वरुपमा बरामद भएको सुन पगालेर जोख्दा ६० किलो ७१६ ग्राम भएको थियो।
सुरुवमा राजस्व अनुसन्धान विभागले नै उक्त तस्करी प्रकरणको अनुसन्धान गरे पनि पछि प्रहरीको केन्द्रीय अनुसन्धान ब्यूरो (सीआईबी)ले गरेको थियो। सीआईबीको अनुसन्धानका आधारमा जिल्ला सरकारी वकिल कार्यालय काठमाडौंले काठमाडौं जिल्ला अदालतमा अभियोगपत्र दायर गरेको थियो।
अभियोगपत्रसँगै प्रतिवादीका रुपमा पेस भएका चिनियाँ नागरिकहरू याओ पुचेङ्ग, लि वेन सुङ्ग, ली नेङकाई, डीङ सेग्फा, जीक्वाङ लिन, टीयान मि र वेन तोङक, तिब्बती मूलका भारतीय नागरिक ५३ वर्षीय थाप्तेन छिरिङ र बेल्जियन नागरिक दावा छिरिङको पनि बयान जिल्ला अदालतले भाषा अनुवादक राखेर लिएको थियो। त्यस्तै, अन्य प्रतिवादीहरुसँग पनि बयान लिएर थुनछेक सुरु गरिएको हो।
अदालती बयानमा अधिकांशले आरोप अस्वीकार गरेका छन्।
राजस्व अनुसन्धान विभाग तथा सीआईबीले गरेको अनुसन्धानका क्रममा पक्राउ परेका २६ जना र ३ जनालाई फरार प्रतिवादी कायम गरेर मुद्दा दायर गरिएको थियो। अदालतमा पेस भएका २६ जना प्रतिवादीको विपक्ष र प्रतिरक्षमा बहस हुने भएकाले थुनछेकको आदेश सुनाउन १ साताभन्दा बढीको समय लाग्ने अदालतको आकलन छ। सरकारी वकिलको बहसपछि प्रतिवादीका पक्षका कानुन व्यवसायीले बहस गर्नेछन्।
मुद्दाको पक्षमा सरकारी वकिलले सम्भवत: बिहीबारसम्म आफ्नो बहस सक्ने अदालतको अपेक्षा छ। त्यसपछि प्रतिवादीहरुको प्रतिरक्षमा कानुन व्यवसायीहरुले बहस गर्नेछन्। मुद्दाको प्रक्ष र विपक्षमा बहस सकिएपछि अदालतले प्रतिवादीहरुलाई तारेख, धरौटी या थुनामा राखेर मुद्दाको पुर्पक्ष गर्ने भन्नेबारे आदेश सुनाउनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
