काठमाडौं– ‘हाम्रो नै मन्त्री हुनु भएकोले अहिलेको महंगी वृद्धि कसरी भइरहेको छ? कालोबजारी कसरी भइरहेको छ? कार्टेलिङ कसरी भइरहेको छ? यसमा मन्त्रीले अुनगमन गर्नुपर्नेछ। हेर्नुपर्नेछ, म मन्त्रीज्यूलाई आग्रह गर्दछु,’ केन्द्रीय सदस्य रमा कोइराला पौडेलले धारणा रख्नेक्रममा आफ्नै मन्त्रीहरुलाई प्रश्न गरिन्।
मौजुदा सरकारमा अर्थ, उद्योगसहित ९ वटा मन्त्रालय लिएर नेपाली कांग्रेस प्रमुख सत्तासाझेदारका रुपमा रहेको छ। तर जनतालाई प्रत्यक्ष सेवा प्रवाह गर्ने मन्त्रालयको नेतृत्व लिए पनि अपेक्षाकृत लाभ नपाउँदा स्वयं कांग्रेसकै नेता कार्यकर्ता दिग्दारीमा छन्। जुन बागमती किनारमा रहेको सानेपाको केन्द्रीय कार्यालयमा केन्द्रीय सदस्यहरुले अभिव्यक्त गरिरहेका छन्।
अर्का केन्द्रीय सदस्य प्रदीप पौडेलले जनताका दैनिक समस्यामा कांग्रेसले विज्ञप्ति निकालेर पन्छिने गरेको टिप्पणी गरे। उनले पार्टीले आफ्ना मन्त्री र सरकारलाई निर्देशन दिनुपर्ने माग गरे। ‘खाद्यान्नमा महंगी १४ प्रतिशतले बढेको छ। एक बोरा चामलमा ३ सय रुपैयाँसम्म बढेको छ। चाडबाडको नजिकमा हामी छौं। यसमा सरकारले कुनै काम गरेका स्थिति छैन। बैठकको निर्णय प्रेस विज्ञप्तिमा सिमित राख्नु भएन। सरकारलाई निर्दिशत गर्नुपर्यो,’ सांसदसमेत रहेका केन्द्रीय सदस्य पौडेलले भने।
कांग्रेस सरकारमा सहभागी भएको पछिल्लो ६ महिनालाई मूल्यांकन गर्दै पौडेलले अघाडि भने,‘हाम्रो साथीहरु मन्त्रीमण्डलमा हुनुहुन्छ। कुनै पनि साथीले राम्रो काम गरेको भाषण गर्न पाइन। सरकारमा बस्नु उपलब्धि होइन। लोकप्रिय काम गर्न सक्नुपर्छ।’
साथै, उनले बैंकमा पैसा भएर बजारमा नआउनुमा अर्थमन्त्री जिम्मेवार हुनुपर्ने बताए। ‘त्यसैले आज लगानी गर्ने वातावरण किन बनिरहेको छैन। बैंकमा अथाह पैसा छ तर त्यो बजारमा आउन किन सकिरहेको छैन। अर्थमन्त्रालय हाम्रो नेतृत्वमा छ। हामी सहभागी भएको सरकार छ। यो भन्दा आर्थिक संकट अर्को हुनै सक्दैन,’ पौडेलले भने।
केन्द्रीय सदस्य कर्णबहादुर बुढाले महंगीले जनता मारमा परेको कुरा कांग्रेसले बुझेको छ कि छैन भन्दै प्रश्न गरेका छन्। ‘दसैं आएको छ। तिहार आएको छ। बुद्ध धर्म मान्नेहरुको ल्होसार आएको छ। यो अवस्थामा गरिबको चुल्हो बल्ने अवस्था भएको छैन। महंगीले जनता अत्यन्त मारमा पर्ने अवस्था आएको छ। यो हामी नेपाली कांग्रेले बुझ्ने कि नबुझ्ने?’
केन्द्रीय सदस्य अर्जनुप्रसाद जोशीले जनताले भोगेका समस्या केन्द्रीय समितिको बैठकको छलफलको विषय हुनुपर्ने माग राखे। ‘आम मनिसको जीवन कष्टकर भएको छ। यो छलफलको विषय हुनुपर्छ। महंगीका विषयमा, रोजगारीका विषयमा, युवा पलायनका विषयमा कांग्रेसले छलफल गर्नुपर्छ। विज्ञप्ति निकालेर मात्र हुँदैन,’ उनले पार्टीले विज्ञप्ति निकालेर टार्ने गरेको टिप्पणी गरे।
यस्तै केन्द्रीय सदस्य लक्ष्मी परियारले समस्यामा परेका जनतालाई राहत पुर्याउनुपर्ने माग राखिन्। ‘यो आर्थिक संकटलाई कसरी पार लाउन सक्छौं? चाडबाडको बेलामा जनतालाई कसरी सुलभरुपमा जीवनयापन गर्न सक्छन् भन्ने कुरमा ध्यान दिनुपर्दछ,’ आफ्नो पार्टी सरकारमा रहको स्मरण गर्दै परियारले भनिन्,‘हामी सरकारमा छौं। हाम्रै अर्थमन्त्री हुनुहुन्छ। तीनिहरुलाई कसरी राहत प्रदान गर्न सक्छौं भन्नेमा ध्यान पुर्याउनुपर्छ।’
त्यस्तै, अर्की केन्द्रीय सदस्य कल्याणी रिजालले पनि उद्योगमन्त्री आफ्नै पार्टीको हुँदा पनि कालोबजारी र महंगीले चरम रुप लिएकोमा दु:ख व्यक्त गर्दै अनुगमन नभएको बताइन्। उनले भनिन्,‘महंगी चरमरुपमा बढेको छ। इन्धनको मूल्य पटक–पटक बढेको छ। कालोबजारी मौलाएको छ। अनुगमन छैन। अखाद्य वस्तुको बिक्री बढेको छ। बजार अनुगमन हुनुपर्ने र वस्तुहरु सस्तो र सुलभरुपमा पाउनुपर्ने जनताको माग छ।’
केन्द्रीय गोमाकुमारी भट्टराईले विद्यमान आर्थिक र महंगीको संकटलाई कांग्रेसले हल गर्न कस्तो पहल लिन्छ भन्ने कुरा महत्त्वपूर्ण रहेको उल्लेख गरिन्। ‘जनताहरु निराश छन्। अहिले संकटको अवस्था। महंगी त्यति नै बढिरहेको छ। कालोबजारी बढिरहेको छ। यसलाई नेपाली कांग्रेसले कसरी निकास दिन्छ भनेर जिल्ला जिल्लाबाट साथीहरुले सोधिरहनु भएको छ,’ उनले नेता कार्यकर्ताको चासो पार्टी नेतृत्वलाई साझा गरिन्।
यस्तै आफ्नो मन्त्व्य राख्नेक्रममा सदस्य भिम पराजुलीले देशमा भ्रष्टचार र अनियमितता हुँदा पनि कांग्रेस मौन रहेको आरोप लगाए। ‘आज देशमा भ्रष्टचार र अनियमितता विकराल स्वरुपमा पुग्दा नेपाली कांग्रेस मौन छ भन्ने बुझाइ जनतामा छ,’ पराजुलीले भने।
नेपाली कांग्रेसको असोज ४ गते बिहीबारबाट सुरु भएको केन्द्रीय कार्यसमितिको बैठकमा आइतबार ३२ जना केन्द्रीय सदस्यले आफ्नो धारणा राखेका छन्। यसअघि शुक्रबार ४५ जना र बिहीबार ११ जना केन्द्रीय सदस्यहरुले आफ्नो धाराण राखेका थिए। महामन्त्री गगनकुमार थापाले प्रस्ताव गरेका अजेण्डा वरिपरि रहेर आफ्नो धारणा राख्नेक्रममा अधिकांश केन्द्रीय सदस्यहरु समसामयिक र सरकारले अपेक्षाकृत काम गर्न नसकेकोमा आफ्नो धारणा राखिरहेका छन्।
केन्द्रीय कार्यसमितिको अर्को बैठक ८ गते सोमबार ११ बस्ने गरी स्थगित भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
