काठमाडौं- काठमाडौं महानगरपालिकाका मेयर बालेन शाहविरुद्ध युवाहरुले प्रर्दशन थालेका छन्। सडक व्यवसायीका पक्षमा अभियन्ता तथा 'इनफ इज इनफ' अभियानका एक अधिकारी ईसहित प्रविन, चाउ, सौरभ कार्की लगायतका युवाहरू बिहीबारदेखि महानगरको नगर कार्यपालिका कार्यालय रहेको राष्ट्रिय सभागृहअघि प्रर्दशनमा उभिएका हुन्।
उनीहरू यसरी प्रदर्शनमा उभिएकाे ९५ घण्टा बितेकाे छ।
उनीहरूले 'गरी खान देउ', 'बालेन-सुनिता तिमीहरूलाई मत र साथ दिनु गल्ती नै थियो?'लगायतका पम्पलेट बोकेर उभिएर प्रदर्शन गरिरहेका हुन्।
डेढ वर्षअघि स्थानीय निर्वाचनको संघारमा बालेनले ‘गरिबको चमेली बोल्दिने कोही छैन’ जस्तो गीत गाएर फुटपाथ व्यवसायलाई हटाउने होइन, व्यवस्थापन गर्नुपर्छ जस्तो तर्क राखेर पब्लिक सेन्टिमेन्ट बटुलेको तर निर्वाचित भएपछि आफ्नै वाचा बिर्सिएको भन्दै युवाहरूले प्रदर्शन गरेका हुन्।
सडक व्यवसायी, गरिब र सीमान्तकृत वर्गको गास खोसेको भन्दै युवाहरूले मेयर र उपमेयरको कार्यालय अगाडि ‘भद्र’ प्रदर्शन गरिरहेका हुन्।
केही समयअघि युवाहरूले सडक व्यवसायलाई कसरी व्यवस्थित गर्न सकिन्छ भनेर कार्यपत्र पनि बुझाएका थिए। तर मेयर बालेनमा त्यो अनिच्छा देखिएको अभियन्ता ईले बताए। उनले भने, 'मैले निर्णय गरेपछि पछाडि जानुहुन्न, गए कमजोर हुन्छु भन्रे मानसिकता बालेनमा देखियो। गलत भए पनि म सच्चिन तयार छैन भन्ने यो प्रवृत्ति लोकतन्त्रका लागि घातक हो,' ईले बताए।
निर्वाचित भएपछि मेयर बालेनले ठीक विपरीत व्यवहार गरेको बताउँदै उनले ठेलागाडा र साना सडक व्यवसायीलाई उचित व्यवस्थापन गर्न मागसहित भद्र विरोध गरिएको जानकारी दिए।
‘दुई महिनाअघि मेयरको सचिवालयबाट सडक व्यवसाय व्यवस्थापनका लागि पोलिसी फ्रेम वर्क दिन भनिएको थियो’ उनले भने, ‘लिखित रूपमा दिएका पनि थियौं, कुनै सुनुवाइ भएन।’ सचिवालयबाट मागिए पनि मेयरबाट सम्बोधन नभएको उनको भनाइ छ।
युवाहरूले ७७ घण्टा नगर कार्यपालिकाको अगाडि उभिएर विरोध गर्ने तयारी गरेका थिए। उक्त समायवधि सकिएको छ। तर हालसम्म कुनै जवाफदेहिता नआएको भन्दै विरोधको अवधि ४६ घण्टा थपेर १२३ घण्टा पुर्याइएको छ। १२३ घण्टासम्म मेयर उपमेरको कार्यालय अघि उभिएरै विरोध गर्ने अभियन्ता शौरभ कार्कीले जानकारी दिए।
अहिले नियमित रूपमा ९ जना युवा उभिएर विरोध गरिरहेकोमा दिउँसोको समयमा भने उनीहरूलाई साथ दिन अन्य युवाहरू पनि सहभागी हुने गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
