काठमाडौं– ब्रेक प्याडको रुपमा भित्र्याएर त्रिभुवन अन्तर्राष्ट्रिय विमानस्थलको भन्सारबाट जाँचपास भइसकेको अवस्थामा बरामद भएको ६० किलो बढी सुन तस्करीका लागि ७ वटा कम्पनी खडा गरेको पाइएको छ। सुन तस्करी गर्ने समूहले ६० किलोभन्दा पहिले पनि धेरैपटक सुन तस्करी गरेको पाइएको छ।
प्रहरीको केन्द्रीय अनुसन्धान ब्यूरो (सीआईबी)को अनुसन्धानअनुसार जिल्ला सरकारी वकिल कार्यालय काठमाडौंले काठमाडौं जिल्ला अदालतमा दायर गरेको अभियोगपत्रमा सुन तस्करीबाट आर्जन भएको रकम १४ जनाको बैंक खातामा जम्मा गरेको पाइएको बताइएको छ।
साउन २ गते त्रिभुवन विमानस्थलको भन्सार कार्यालयको बाहिरबाट बरामद भएको सुन रेडी ट्रेड प्रालिका नाममा ब्रेक प्याडका रुपमा भित्र्याइएको थियो। सुन तस्करीका लागि रेडी ट्रेड बाहेक अन्य ६ वटा कम्पनी पनि खोलेको पाइएको अभियोगपत्रमा दाबी गरिएको छ।
सुन तस्करीका लागि लेखनाथ कार्कीको नाममा छुवाग इलेट्रिक्सल सप्लायर्स, रामकुमार भुजेलको नाममा भुजेल इलेक्ट्रिक्क्स सप्लायर्स प्रालि, कुमार बहादुर भुजेलको नाममा हाडा इलेक्ट्रिक सप्लायर्स, रामबहादुर भुजेलको नाममा पवटी इलेक्ट्रिक सप्लायर्स प्रालि, बिकुन्द्र भुजेलको नाममा दोलखा इलेक्ट्रिक सप्लायर्स र सरिता तामाङको नाममा सरिता सप्तायर्स खोलिएको अभियोगपत्रमा उल्लेख छ।
अभियोगपत्रमा सुन तस्करीबाट आर्जित रकम १४ जनाको नाममा राखिएको देखिएको दाबी गरिएको छ। पुष्करराज भट्ट, राजकुमार श्रेष्ठ, राजेन्द्रकुमार राई, सुदर्शन गौतम, दोङ फाङ्ग इन्टरनेशनल, नरेश तामाङ, रामकुमार भुजेल, हर्कराज राई, भुजेल इलेक्ट्रिक सप्लायर्स प्रालि, बिरेन्द्र नेपाली, पुष्पा जोशी, कमल परियार र भुजेल इलेक्ट्रिक प्रालिको नाममा बैंकमा रकम देखिएको अभियोगपत्रमा दाबी गरिएको छ।
क्रिप्टोबाट कारोबार
सुन तस्करीमा संलग्न भएकामध्ये मुख्य अभियुक्त भनिएका दावा छिरिङ, योङ पुचिङ र शिवकुमार सरार्फले अवैध सुन कारोबारबाट प्राप्त रकम क्रिप्टो करेन्सीमा लगानी गरी कारोबार गरेको देखिएको अभियोगपत्रमा दाबी गरिएको छ।
उनीहरुले सुन तस्करीको पैसा विदेश लैजानका साथै राज्य प्रणालीबाट जोगाउनका लागि डिजिटल कारोबारको सहयोग लिएको अभियोगपत्रमा उल्लेख छ। नेपालका क्रिप्टोमा लगानी अवैध मानिएको थियो। तर उनीहरुले नेपाली नागरिकता बनाएर यस्तो कारोबार गरेको अभियोगपत्रमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
