काठमाडौं- आउँदो अक्टोबर महिनामा हुन गैरहेको गैरआवासीय नेपाली संघ (एनआरएनए) को ११ औं महाधिवेशनका लागि विभिन्न पदमा उम्मेदवारी घोषणा गर्ने क्रम सुरु भएको छ। शुक्रबार एकै दिन तीन छुट्टाछुट्टै सहरमा अध्यक्ष पदमा उम्मेदवारी घोषणा गरिएको छ।
ललितपुरस्थित होटेल हिमालयमा आयोजित एक कार्यक्रममा जापानमा व्यवसाय गर्दै आएका संघका उपाध्यक्ष महेशकुमार श्रेष्ठले सन् २०२३–२०२५ कार्यकालका लागि अध्यक्ष पदमा उम्मेदवारी घोषणा गरे। उनले ‘समुन्नत नेपाल, सम्मानित गैरआवासीय नेपाली’ नारा तथा पाँच नीतिगत योजनासहितको प्रतिबद्धता पत्र पनि सार्वजनिक गरे।
सन् २०३० सम्म नेपालको अर्थतन्त्र १०० अर्ब डलरको बनाउन एउटा स्पष्ट खाकासहित संघले नेपाल सरकार तथा नेपालको निजी क्षेत्रसँग सहकार्य गर्ने उनले प्रतिबद्धता जाहेर गरे। हाल नेपालको अर्थतन्त्र झन्डै ४० अर्ब डलर बराबर रहेको छ। श्रेष्ठले विदेशमा आर्जन गरेको ज्ञान, सीप, प्रविधि र पुँजीलाई स्वदेशको विकास र समृद्धिका लागि उपयोग गर्न नेपाल सरकारसँग सहकार्य गरी श्रम तथा सीप बैंक स्थापना गर्ने प्रतिबद्धता पनि जनाए।
कतारबाट आर के शर्माको उम्मेद्वारी घोषणा
शुक्रबार नै कतारमा बसोबास गर्ने व्यवसायी राजेन्द्र कुमार (आरके) शर्माले अध्यक्ष पदमा उम्मेदवारी घोषणा गरे। नेपाल महिला समाज कतार र एनआरएनए एनसीसी कतारको महिला विभागद्वारा आयोजित तीज कार्यक्रममा शुभकामना दिँदै उनले उम्मेदवारी घोषणा गरेका हुन्।
शर्माले नेपाललै समृद्ध बनाउन, विदेशमा बस्ने सबै नेपालीलाई जोड्न र मध्यपूर्व लगायतका मुलुकमा काम गर्ने नेपालीहरुको हकहित सुरक्षित गर्न आफूले उम्मेद्वारी दिन लागेको बताए।
उनले १० दिनभित्रमा काठमाडौंमा औपचारिक कार्यक्रम गरेर आफ्नो अजेन्डासहित उम्मेदवारी घोषणा गर्ने पनि बताए।
टोक्योमा डा बद्री केसी
पाँचौं 'ग्लोबल नेपाली हेल्थ कन्फ्रेन्स' मा भाग लिन टोक्यो पुगेका संघका कार्यकारी अध्यक्ष डा बद्री केसीले आफू अर्को दुई वर्ष एकल अध्यक्ष भएर काम गर्न चाहेको बताएका छन्। हाल संघमा तीन जना अध्यक्ष छन्।
एनआरएनए जापानद्वारा आयोजित कार्यक्रमलाई सम्बोधन गर्दै अध्यक्ष केसीले एनआरएनए स्थापनाको २० वर्षमा ८७ मुलुकमा पुगेको र ११० वटा देशमा विस्तार गर्ने सम्भावना रहेको बताए। उनले गैर आवासीय नेपाली नागरिकता छिट्टै कार्यान्वयनमा आउने पनि बताए।
संघकी वर्तमान अध्यक्ष रबिना थापा तथा युवा अभियन्ता विनय अधिकारीले पनि संघको अध्यक्षमा उम्मेदवारी दिने बताएका छन् तर औपचारिक घोषणा भने गरिसकेका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
