भादगाउँ– भक्तपुरको जिल्ला आयुर्वेदिक स्वास्थ्य केन्द्रमा कर्मचारीको दरबन्दी बटौती हुँदा फिजियोथेरापी सेवा बन्द भएको छ। यसअघि करारमा सेवा गर्दै आएका फिजियोथेरापिस्टको दरबन्दी बागमती प्रदेशअन्तर्गत स्वास्थ्य मन्त्रालयले चालु आर्थिक वर्ष २०८०/८१ मा कटौती गरेपछि सेवा बन्द भएको हो। यसले केन्द्रमा उपचारका लागि बिरामीलाई असुविधा भएको छ।
केन्द्रले सम्पूर्ण स्वास्थ्य सेवा निःशुल्क प्रदान गर्दै आएको छ। औषधिसमेत निःशुल्क वितरण गर्दै आएको केन्द्रले फिजियोथेरापी र अकुपञ्चर सेवासमेत निःशुल्क प्रदान गर्दै आइरहेको जनाएको छ। निःशुल्क सेवाभित्र नपरेका औषधिसमेत आफ्नै फार्मेसीमार्फत् सहुलियत दरमा बिक्री वितरण गर्दै आएको केन्द्रका प्रमुख रहेका डा नरेन्द्रप्रसाद गिरीले बताए।
गत वर्ष फिजियोथेरापिस्टले कारारमा रही सेवा दिँदै आएकामा यस वर्ष उक्त दरबन्दी काटिएपछि सेवा पुनः सञ्चालन गर्न नसकिएको उनले बताए। ‘तलबका लागि बजेट छ। तर मन्त्रालयले यस वर्षको दरबन्दीमा फिजियोथेरापिस्टको दरबन्दी कटौती गरेकाले हाल सेवा पुनः सञ्चालन गर्न सकिएको छैन,’ प्रमुख गिरीले भने। मन्त्रालयमा यस बारेमा जानकारी गराएर दरबन्दीका लागि ताकेता गरिरहेको उनको भनाइ छ।
केन्द्रमा गत आवदेखि फिजियोथेरापी र अकुपञ्चर सेवा सुरु भएको थियो। ती सेवाका कारण आयुर्वेदिक उपचार पद्धति र केन्द्रको सेवामा स्थानीयको आकर्षण बढेको थियो। केन्द्रमा दैनिक १०० भन्दा बढी सेवाग्राहीको चाप हुने गरेको प्रमुख गिरीले बताए।
प्रमुख गिरीका अनुसार अनुसार आव २०७८/७९ मा केन्द्रबाट १४ हजार १४० जनाले सेवा लिएका थिए। यस्तै, २०७९/८० मा १९ हजार ८८० ले सेवा लिएका थिए। फिजियोथेरापी सेवा सुरु भएको छोटो समयमा करिब १ हजार जनाले सेवा लिइसकेका उनले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
