काठमाडौं– २०० बढी बंगलादेशी पर्यटकहरु चार्डड जहाजबाट नेपाल भ्रमणका लागि आएका छन्।
शुक्रबार मध्याह्न २०० बढी बंगलादेशी नागरिकको टोली नेपाल भ्रमणका लागि आएको हो। बंगलादेशी पर्यटकको स्वागतका लागि नेपाल पर्यटन बोर्डका सदस्यहरु त्रिभुवन अन्तर्राष्ट्रिय विमानस्थल पुगेका थिए। उनीहरुले पर्यटकको स्वागतमा नेपाली पञ्चे बाजासहित स्थानीय पहिचान झल्कने नाचगान प्रस्तुत गरेका थिए।
बंगलादेशबाट सम्भवत: पहिलोपटक एकसाथ यति धेरै पर्यटक नेपाल आएका हुन्। शुक्रबार र शनिबार गरेर बंगलादेशबाट करिव ७०० पर्यटकहरु नेपाल आउने बताइएको छ। पर्यटकहरुको स्वागतका लागि विमानस्थल पुगेका नेपाल पर्यटन बोर्डका प्रवन्धक सूर्य थापाले बंगलादेशबाट होलिडे मनाउनका लागि नेपाल आएको बताए। उनले पछिल्लो ३ वर्षयता बंगलादेशबाट नेपाल आउने पर्यटकको संख्या निरन्तर बढीरहेको बताए।
उनले भने, ‘आज (शुक्रबार) र भोलि (शनिबार) गरेर बंगलादेशको ठूलो टिम नेपाल आउँदैछ। करिव ७०० जति पर्यटकहरु आउँदै हुनुहुन्छ। उहाँहरु होलिडे मनाउनका लागि यहाँ आउनुभएको हो। यसमा पर्यटन बोर्डले स्वागत गरेको हो। पछिल्लो २–३ वर्ष यता बंगलादेशका पर्यटकहरु बढी रहनुभएको छ।’
त्यस्तै, बंगलादेशी पर्यटक शेख अजरफ उद्दिनले नेपाल घुम्नका लागि सही र राम्रो गन्तव्य भएको बताए। उनले नेपालमा स्वागत राम्रो पाएको र नेपाल घुम्न आतुर रहेको बताए।
उनले भने, ‘हामीलाई नेपालमा धेरै राम्रो स्वागत गर्नुभयो। नेपाल घुम्नका लागि हामी एक्साइटेड छौँ। बंगलादेशले नेपाललाई घुम्नको लागि प्राथमिकतामा राखेको छ। नेपाल राम्रो देश पनि घुम्नका लागि। हिमाल, स्थानीय खाना, स्थानीय संस्कृति राम्रो छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
