कुटिएका मेयरका पीए भन्छन्- आक्रोशमा स्टाटस लेखेँ, ढुङ्गा भिडबाट अरुले हानेको हो

समाज

नेपाल लाइभ शुक्रबार, भदौ १, २०८० १६:२८

काठमाडौं- डोटीको शिखर नगरपालिकाका मेयर दीर्घबहादुर बलायरबाट कुटिएको बताएका उनका स्वकीय सचिव राजेश ठगुन्नाले आक्रोशमा सामाजिक सञ्जालमा मेयरविरुद्ध स्टाटस लेखेको बताएका छन्। बिहीबार राति मेयर बलायरको कुटपिटबाट स्वकीय सचिव ठगुन्ना घाइते भएका थिए।

उनको टाउकोमा चोट लागेको थियो। केही समयदेखि बिग्रेर थन्किएको एम्बुलेन्स मर्मतको विषयलाई लिएर मेयर र उनका स्वकीय सचिव ठगुन्नाबीच विवाद भएको बताइएको छ। नाताले काका–भतिजा पर्ने उनीहरूबीच नगरपालिकभित्रै हात हालहाल भएको थियो।

ठगुन्नाले सामाजिक सञ्जालमा मेयरविरुद्ध अपशब्द लेख्दै आफूले मेयर बनाएको र हैसियत देखाइदिने बताएका थिए। तर शुक्रबार उनले आक्रोशित भएर उक्त स्टाटस लेखेको र मेयर दीर्घबहादुरसँग सामान्य विवाद मात्रै भएको बताएका छन्। उनले आफूलाई भिडबाट कसैले ढुङ्गा हानेको दाबी गरेका छन्।

‘हिजो राती बिरामीको उद्धार गर्ने क्रममा नगर प्रमुख र मेरा बीचमा सामान्य विवाद भएको थियो। दोहोरो विवादका क्रममा घटना स्थलमा रहेका व्यक्तिहरूले हामीलाई छुट्याउने बेला अकस्मात भीडबाट ढुङ्गा प्रहार भई टाउकोमा सामान्य चोट लागेको थियो,’ उनले भनेका छन्, ‘टाउकोमा चोट लागेपछि मैले आक्रोशित भई सामाजिक सञ्जालमा नगर प्रमुखविरुद्ध आक्रोश व्यक्त गरेको थिए। आक्रोश व्यक्त गर्दा लेखिएका शब्दले नगर प्रमुख र उहाँको पदीय मर्यादामा पर्न गएको असर प्रति क्षमा याचना गर्न चाहन्छु।’

मेयरसँग घरायसी सम्बन्ध भएको र आफू नजिक पनि भएकाले आफूले आक्रोश व्यक्त गरेको उनको भनाइ छ। उनले नगरप्रमुखको सहयोगी भूमिकामा इमान्दारितापूर्वक कटिबद्ध भएर लाग्ने पनि बताएका छन्।

यो पनि : डोटीको शिखर नगरपालिकाका मेयरले कुटे आफ्नै पीए

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

अमरेशकुमारको प्रश्न – गभर्नर नियुक्ति प्रक्रिया देखेर लाज पनि लजाइसक्यो,xरेक कुरामा दलको कार्यकर्ता खोज्ने?

सीटीईभीटीमा प्रवेश परीक्षा नहुने, जीपीएको आधारमा नै विद्यार्थी छनोट

चितवनको पुँजीगत खर्च ४४ प्रतिशत मात्र