काठमाडौं– साउन सकिँदै गर्दा देशभर जम्मा ८७ प्रतिशतमात्रै धान रोपाइँ भएको छ। साउन २६ गतेसम्म देशैभर जम्मा १२ लाख ९१ हजार ९६८ हेक्टर अर्थात् ८७ प्रतिशत रोपाइँ भएको कृषि तथा पशुपक्षी विकास मन्त्रालयका प्रवक्ता सब्नम सिवाकोटीले बताइन्।
गतवर्ष (२०७९) को साउन २८ गतेसम्म ९४ प्रतिशत रोपाइँ सकिएको थियो। तर, यसवर्ष मधेश प्रदेश, बागमती प्रदेश र गण्डकी प्रदेशमा मनसुन सुरु हुन ढिलो भएका कारण रोपाइँमा कमी देखिएको सिवाकोटीले बताइन्।
विस्तारै मनसुन सक्रिय भैरहेको तथा रासायनिक मलको उपलब्धता सुनिश्चित हुँदा धान रोपाइँ हुने प्रतिशत क्रमशः बढ्दै गएको उनको भनाइ छ। मध्ये तराईमा साउन मसान्तसम्म नै रोपाइँ हुने गरेको सन्दर्भमा साउन मसान्तसम्ममा ९२ देखि ९५ प्रतिशतसम्म रोपाइँ हुने अपेक्षा गरिएको उनले बताइन्।
कोशी प्रदेशमा हालसम्म ९४ प्रतिशत रोपाइँ भएको छ। सो प्रदेशमा ३ लाख ४० हजार ८२९ हेक्टर क्षेत्रमा रोपाइँ क्षेत्र हो भने ३ लाख २० हजार २०७.१७ हेक्टर क्षेत्रमा मात्रै रोपाइँ भएको छ।
मधेश प्रदेशमा ६८ प्रतिशत रोपाइँ भएको छ। गत वर्ष सो अवधिमा ९३ प्रतिशत रोपाइँ भएको थियो। यस प्रदेशमा ४ लाख ५ हजार ४५० हेक्टर जमिन रोपाइँ क्षेत्र रहेको छ भने २ लाख ७१ हजार ५८९.५हेक्टरमा मात्रै रोपाइँ भएको छ।
बागमती प्रदेशमा ८८ प्रतिशत रोपाइँ भएको छ। सो प्रदेशमा १ लाख १३ हजार ५२३ हेक्टर रोपाइँ क्षेत्र रहेको छ भने ९९हजार ८२१ हेक्टर क्षेत्रमा रोपाइँ भएको छ। गण्डकी प्रदेशमा ९३ प्रतिशत रोपाइँ सकिएको छ। सो प्रदेशमा ९७ हजार ८५१ हेक्टर रोपाइँ क्षेत्र रहेको छ। ९० हजार ५१४.३ हेक्टर क्षेत्रमा रोपाइँ भएको छ।
लुम्बिनी प्रदेशमा अहिलेसम्म ९३ प्रतिशत रोपाइँ सकिएको छ। जहाँ ३ लाख ११ हजार ४२ हेक्टर रोपाइँ क्षेत्र रहेकोमा २ लाख ८८ हजार ९७१ हेक्टरमा रोपाइँ भएको छ।
कर्णालीमा ९८ प्रतिशत रोपाइँ भएको छ। जसमा ४५ हजार ३८७.१२ हेक्टर रोपाइँ क्षेत्र रहेको छ। ४४ हजार ५०५.५७ हेक्टर क्षेत्रमा रोपाइँ सकिएको छ।
सुदूरपश्चिममा ९९ प्रतिशत रोपाइँ सकिएको छ। जहाँ १ लाख ७७ हजार ७६७ हेक्टर रोपाइँ क्षेत्रमध्ये १ लाख ७६ हजार ३५९.५५ हेक्टर जमिनमा रोपाइँ सकिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
