कम्बोडियाका प्रधानमन्त्री सामदेक टेचो हुन सेन (फाइल तस्बिर/एपी)
काठमाडौं– प्रधानमन्त्री सामदेक टेचो हुन सेनको नेतृत्वमा रहेको सत्तारुढ कम्बोडियाली पिपुल्स पार्टी (सीपीपी) हालै सम्पन्न आम निर्वाचनमा अत्याधिक बहुमत विजयी भएको छ। प्रभावशाली मानिएका विपक्षी पार्टीहरुलाई पहिले नै विभिन्न मुद्दामा अल्झाएर ‘पाखा’ लगाएपछि गरिएको निर्वाचनले पुन: हुन सेनलाई नै सत्ताको बागडोर सम्हाले अवसर दिएको छ।
प्रधानमन्त्री हुन सेनको सत्ता आगामी ५ वर्षको लागि निरन्तर हुनेछ। निर्वाचन भएको १२५ संसदीय सिटमध्ये प्रधानमन्त्रीको पार्टी सीपीपीले १२० सिटमा जीत हासिल गरेको छ। बाँकी ५ सिट फनसिनपेक पार्टीले जितेको राष्ट्रिय निर्वाचन समिति (एनईसी) बताएको छ।
प्रधानमन्त्री हुन सेन सन् १९८५ देखि निरन्तर सत्तामा छन्। सातौं आमनिर्वाचनमा १८ राजनीतिक दलले प्रतिष्पर्धा गरेका थिए।
सत्तारुढ पार्टी सीपीपीले निर्वाचनमा खसेको कुलमतको ८२.३ प्रतिशत मत प्राप्त गरेको बताइएको छ। ३८ वर्षभन्दा बढी समयसम्म कम्बोडियाको प्रधानमन्त्रीको रूपमा रहेका सेन ७० वर्ष पुगिसकेका छन्। प्रधानमन्त्री सेनले यही अगस्ट २२ मा प्रधानमन्त्रीको शपथ ग्रहण गर्ने बताइएको छ।
अर्को वर्ष फेब्रुअरी २५ मा हुने सिनेटको निर्वाचनपछि सिनेटको अध्यक्षको पद पनि लिनेछन्। कम्बोडियामा भएको निर्वाचनबारे अन्तर्राष्ट्रिय स्तरबाट बढी आलोचनात्मक टिप्पणी आएको छ।
चीनले निर्वाचनलाई स्वागत गरेको छ भने अमेरिकाले न त स्वतन्त्र न निष्पक्ष भनेर टिप्पणी गरेका छ। कतिपय पश्चिमा राष्ट्रहरुले ‘अधिनायकवादी शासन विस्तार’ भनेर टिप्पणी गरेका छन्।
आफ्नो ३८औं वर्षको सत्तामा पुगेका हुन सेनले जिम्बाबेका रोबर्ट मुगाबे र लिबियाका मुअम्मर गद्दाफी जस्ता लामो समय सत्ता र शक्तिमा बसेका व्यक्तिको ‘रेकर्ड’ पनि तोडेका छन्। यससँगै उनी विश्वको लामो समयदेखि राजनीतिक नेतृत्व गरिरहेका नेताहरूको सूचीको शीर्षमा परेका छन्।
प्रधानमन्त्रीको हुन सेनको कार्यकालमा राजनीतिक दमन, अभिव्यक्ति स्वतन्त्रतामा प्रतिबन्ध, असहमतिको दमन, मानवअधिकार हननका आरोप जस्ता विषयलाई लिएर विश्वव्यापी मानवअधिकार संगठनहरूले आलोचना गर्दै आएका छन्।
हालै सम्पन्न निर्वाचनको नेपालका पूर्व प्रधामन्त्री एवं नेपाल कम्युनिस्ट पार्टी एकीकृत मार्क्ससवादी लेनिनवादी (एमाले)का अध्यक्ष केपी शर्मा ओलीले पनि पर्यवेक्षण गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
