प्रधानमन्त्री प्रचण्डको चीन भ्रमण असोज पहिलो साता

राजनीति

रासस आइतबार, साउन २१, २०८० १४:००

काठमाडौं– प्रधानमन्त्री पुष्पकमल दाहाल ‘प्रचण्ड’ले आगामी असोज पहिलो साता छिमेकी मुलुक चीनको भ्रमण गर्ने भएका छन्।

आइतबार परराष्ट्रमन्त्री एनपी साउदले असोजको पहिलो साता प्रधानमन्त्री प्रचण्डले चीनको भ्रमण गर्ने जानकारी दिए।

यस्तै आइतबार नै परराष्ट्रमन्त्री साउदले प्रहरी चारित्रिक प्रमाणपत्रलाई पूर्णरुपमा अनलाइनमाध्यमबाट प्रमाणीकरण गर्ने कार्यको शुभारम्भसमेत गरेका छन्।

उनले वर्तमान सरकार सदैव छिमेकी तथा मित्रराष्ट्रसँग सुमधुर सम्बन्ध बनाउने र निरन्तरता दिन पक्षमा रहेको स्पष्ट पारे।

वर्तमान सरकार गठनपछि प्रधानमन्त्री प्रचण्डको फलदायी भारत भ्रमण भएको उल्लेख गर्दै मन्त्री साउदले सो अवसरमा महत्वपूर्ण उपलब्धि हासिल भएको दाबी गरे।

उनले अन्तर्राष्ट्रिय सम्बन्ध परस्पर राष्ट्रिय हित र स्वार्थका आधारमा अघि बढाउँदा नै मुलुक र जनताको हित हुने उल्लेख गर्दै विदेश नीतिका सम्बन्धमा सबै पार्टी र पक्षबीच सहमति हुनुपर्ने धारणा व्यक्त गरे।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।