कञ्चनपुर- निर्मला पन्तको गत साउन १० गते बलात्कारपछि हत्या भयो। घटनामा दोषी दाबी गर्दै दिलीपसिंह विष्टलाई प्रहरीले ढिलो गरी पक्राउ गर्यो। तर यसपछि भने पीडित र स्थानीय प्रहरीप्रति झनै सशंकित भए। किनकि उनीहरुको दाबी थियो– विष्ट दोषी होइनन्, उनलाई नक्कली अभियुक्तको रुपमा पक्राउ गरेर घटनालाई ढाकछोप गर्न खोजिँदैछ।
एक महिना बितिसक्दा पनि वास्तविक दोषी पक्राउ गर्न नसकेको पीडित परिवारले बताउँदै आएका छन्।
यही बीचमा प्रहरीले अर्का एक युवालाई जबर्जस्ती हत्या अभियोग लगाई पक्राउ गरेको घटना बाहिरिएको छ।
कञ्चनपुर प्रहरीले साउन २१ गते निर्मला हत्या घटनामा संलग्न रहेको आरोपमा सोही ठाउँका स्थानीय चक्रदेव बडूलाई पक्राउ गरेर केही दिनमै छाडेको घटनाले प्रहरीप्रति स्थानीय थप सशंकित बनेका छन्। बडूलाई प्रहरीले निर्मला हत्याको आरोपमा पक्राउ गरे पनि सार्वजनिक मुद्दा दर्ता गरिएको जनाएको छ।
‘निर्मला हत्याको विषयमा सोधपुछ गर्छु भन्दै २१ गते बिहान प्रहरी घरमै आएर लग्यो,’ पीडित बडूले भने, ‘तर, ममाथि सार्वजनिक अपराध अन्तर्गत मुद्दा दर्ता गरी पीडा दिइयो।’
उनी कञ्चनपुर प्रशासनमा ५ हजार धरौटी राखेर ३१ गते रिहा भएका थिए।
‘धरौटीमा रिहा भएको हुँ। तारेख तोकिएको छ,' उनले नेपाल लाइभसँग भने, 'त्यो दिन फेरि हाजिर हुनुपर्छ।’
शव फेला परेको स्थान बडूको घरबाट करिब २ सय मिटर पर रहेकाले प्रहरीले त्यसअघि पनि घरमै आएर सोधपुछ गर्ने गरेको उनले सुनाए।
‘मैले बलात्कार गरी हत्या गरेको हुँ' भन्, कैद सजाय घटाउन पहल गरौंला। नभए तेरो सिंगो परिवारलाई ल्याएर जेलमा कोचिदिन्छौं' भन्दै धम्क्याए,' पीडित बडूले सुनाए, 'तर, मैले 'बरु गोली हानेर मार्नुस्, फाँसी दिनुस्, ४० वर्ष जेलमा कोच्नुस्, तर गर्दै नगरेको अपराध कबोल गर्दिनँ' भनेँ।’ पक्राउपछि सिआइबीबाट आएको बताउने सिभिल ड्रेसका प्रहरीले हरेक दिन राति रक्सीले मातेर धेरै यातना दिने गरेको उनी बताउँछन्। 'तर पछि प्रहरीलाई गालीगलौज गरेको आरोपमा ममाथि सार्वजनिक मुद्दा दर्ता गरिएछ,’ उनले भने।
प्रहरीले बडूसँगै उनकी १५ वर्षीया बहिनी लक्ष्मी र ११ वर्षीय भाइ गौतमलाई पनि पक्राउ गरेको थियो। बहिनी र भाइलाई सोही दिन छाडिए पनि चक्रलाई भने ११ दिनसम्म हिरासतमा मानसिक यातना दिएर राखियो। चार दिनसम्म त परिवारका कसैलाई भेट्नसमेत नदिईएको बडूकी भाउजू द्रौपदी बडूले बताइन्।
‘म बनगाउँ सामान लिन गएको थिएँ। बेलुकी घर पुग्दा नन्द र देवरलाई प्रहरीले पक्राउ गरेर थुनेको थियो,’ उनले त्यो दिन सम्झिँदै भनिन्।’ तीन दिनअघि पनि प्रहरीले सोधपुछका लागि भनेर नियन्त्रणमा लिएको र चार घन्टापछि छोडेको उनको भनाइ छ।
कञ्चनपुरका प्रहरी प्रमुख कुवेर कडायतसँग बुझ्न खोज्दा उनले भने, ‘चक्रमाथि सार्वजनिक अपराध अन्तर्गत मुद्दा दर्ता गरिएको थियो। अहिले धरौटीमा रिहा भएका छन्। उनलाई किन पक्राउ गरिएको थियो भन्ने मैले बुझ्न पाएको छैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
