काठमाडौं– स्वास्थ्य तथा जनसंख्या मन्त्रालय मातहतका १६ वटा केन्द्रीय अस्पतालका ३ हजार ५ सय २३ जनरल वार्ड विपन्नका लागि नि:शुल्क गरिएको छ।
स्वास्थ्य तथा जनसंख्या मन्त्री मोहनबहादुर बस्नेतको निर्देशन अनुसार मन्त्रालय मातहतका केन्द्रीय अस्पतालका जनरल वार्ड विपन्न, असहाय र बेवारिसे बिरामीका लागि नि:शुल्क गरिएका हुन्।
गत बैसाख २१ गते स्वास्थ्य तथा जनसंख्या मन्त्रालयको जिम्मेवारी सम्हालेपछि मन्त्री बस्नेतको पहिलो प्राथमिकता विपन्न बिरामीले नि:शुल्क उपचार पाउनुपर्ने थियो। कुनै पनि नेपालीले पैसाको अभावमा उपचारबाट बञ्चित हुनु नपरोस् भन्ने उद्देश्यका साथ मन्त्री बस्नेतले सबैभन्दा पहिले वीर अस्पतालबाट ७०० शय्या विपन्नका लागि नि:शुल्क गराएका थिए।
विस्तारै कोशी अस्पताल, कान्तिबाल, प्रसूति गृह, मानसिक अस्पताल, नारायणी अस्पताल, भरतपुर अस्पताल, भेरी अस्पताल र डडेलधुरा अस्पताल लगायत देशभरीका १६ केन्द्रीय अस्पताल र प्रतिष्ठानका जनरल वार्ड नि:शुल्क भएका छन्।
सोमबार स्वास्थ्य मन्त्रालयका आयोजित पत्रकार सम्मेलनमा मन्त्री बस्नेतले देशभरीका स्वास्थ्य विज्ञान प्रतिष्ठान गरी १६ वटा केन्द्रीय अस्पतालका ३५ सय २३ जनरल वार्ड विपन्नका लागि नि:शुल्क गर्ने निर्णय ती अस्पताल र स्वास्थ्य विज्ञान प्रतिष्ठानहरुले गरिसकेको जानकारी दिए।
देशभरीका केन्द्रीय अस्पताल र प्रतिष्ठानहरुका साढे ३ हजार वेड नि:शुल्क भएपछि हजारौं विपन्नको उपचार सहज हुने मन्त्री बस्नेतले बताए। नि:शुल्क गरिएका बेडमा बस्ने बिरामीको उपचार पनि नि:शुल्क गरिने मन्त्री बस्नेतले जानकारी दिए। स्थानीय वडा कार्यक्रमले विपन्न भनि सिफारिस गरेको पत्रका आधारमा अस्पतालहरुले उपचार नि:शुल्क गर्नुपर्ने व्यवस्था गरिएको मन्त्री बस्नेतले बताए।
यसका साथै निजी अस्पतालहरुले पनि विपन्नका लागि १० प्रतिशत शय्या नि:शुल्क गर्नुपर्ने नियमलाई कडाई गर्दै लगिएको मन्त्री बस्नेतले बताए। मन्त्री बस्नेतले भने, ‘देशभरीका सबै केन्द्रीय अस्पतालहरुमा जनरल वार्ड नि:शुल्क गरिएपछि र निजी अस्पतालले पनि १० प्रतिशत शय्यामा विपन्नलाई उपचार नि:शल्क दिने भएपछि विपन्नको उपचारको धेरैजसो समस्या समाधान हुने छ।’
सबै अस्पतालका जनरल वार्ड नि:शुल्क गर्दा लाग्ने खर्चमध्ये केही हिस्सा सम्बन्धितहरुले आन्तरिक व्यवस्था गर्ने र अपुग भएको रकम मन्त्रालयले अनुदानको रुपमा उपलब्ध गराइने मन्त्री बस्नेतले जानकारी दिए। मन्त्री बस्नेतका अनुसार स्वास्थ्यको बजेटमध्ये जुन क्षेत्रमा विनियोजन गरिएको बजेटले प्रतिफल दिइरहेको छैन त्यो क्षेत्रको बजेट आधारभूत स्वास्थ्य सेवामा खर्च गरिने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768821025.png)
-1768820888.png)
-1764146706.png)
