काठमाडौं– सुडानको ओमडरमान सहरमा भएको हवाई आक्रमण हुँदा कम्तीमा २२ जना मारिएका छन्। सुडानको स्वास्थ्य मन्त्रालयलाई उद्धृत गर्दै रोयटर्सले जनाएअनुसार आक्रमणमा दर्जनौं व्यक्ति घाइते भएका छन्।
सुडानमा सरकारी सेना र अर्धसैन्य बल समूह र्यापिड सपोर्ट फोर्स (आरएसएफ)बीच राजधानी खार्तमसहितका शहरी क्षेत्रमा भएका भिडन्तहरुभन्दा यो आक्रमणबाट ठूलो क्षति भएको छ। गत महिनामात्रै भएको हवाई आक्रमणमा खार्तममा ५ बालबालिकासहित १७ जना मारिएका थिए।
अर्धसैन्य बल आरएसएफले यो आक्रमण सरकारी सेनाले गरेको आरोप लगाउँदै ३१ जना मारिएको बताएको छ। आरएसएफले शनिबार जारी गरेको विज्ञप्तिमा घर भत्काइँदा ३१ जनाभन्दा बढीको मृत्यु भएको र दर्जनौं सर्वसाधारण घाइते भएको बताएको छ।
सुडानी सशस्त्र बल (एसएएफ) र आरएसएफ बीचको झडप अप्रिलमा सुरु भएको थियो। यो भिडन्तमा सयौं नागरिक मारिएका छन्।
संयुक्त राष्ट्र संघ इन्टरनेशनल अर्गनाइजेसन फर माइग्रेसन (आईओएम) को तथ्याङ्कअनुसार करिब २८ लाख मानिस सुडानबाट भागेर इजिप्ट, इथियोपिया र लिबिया जस्ता छिमेकी देशहरूमा पासपोर्ट बिना नै पुगेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
