फिचर

मिस पवि : टिकटकदेखि टिभीसम्म

समर्पण श्री शनिबार, असार २३, २०८० १३:११

काठमाडौं– हिजो मिस पवि टिकटकमा छाउँथिन्। केही महिनायता उनी टिभीमा (टेलिभिजन) पनि छाउन थालेकी छन्। टिभीमा पवित्रा साकीलाई नाचिरहेको देखेपछि आफन्तहरू खुसी हुँदै भन्छन्, ‘छोरी त हिरोनी भई।’

र कतिले त थप्छन्, ‘हिजो गाउँभरिकालाई हसाउँथी। अब देशभरिकालाई हसाउँने भई।’

टिकटकमा एक वर्षअघि डडेलधुराको एक युवतीले डोटेली भाषा बोलेर भिडिओहरू पोस्ट्याउँथिन्। नौलो भाषा र आकर्षक लवजका कारण टिकटकमा लाखौँ ‘भ्यूज’ जान्थे। एकाएक ती युवती ‘मिस पवि’को नाममा चिनिन थालिन्।

उनले डोटेली भाषालाई नेपालभर फैलाइनन् नै। सुदूरपश्चिमको मौलिक सौन्दर्यलाई पनि लाखौंमाझ परिचित गराइन्। टिकटकस्टारको रुपमा चिनिएपछि मिस पविलाई काठमाडौंबाट म्युजिक भिडिओका अफर आउन थाले। अहिलेसम्म उनले ४० भन्दा बढी म्युजिक भिडिओमा अभिनय गरिसकेकी छन्।

गत बुधबार नेपाल लाइभ स्टुडियोमा पाहुना आएकी थिइन् मिस पवि। हामीसँग गफिँदै गर्दा उनले आफ्ना विगत सम्झन पुगिन्।

०००

विसं २०७३ सालमा एसईई परीक्षा सकेर पवित्रा पहिलो पटक काठमाडौं आएकी थिइन्। काठमाडौं आउनुअघि उनले ठूलो र सुन्दर सहरको कल्पना गरेकी थिइन्। ‘फिल्म खेल्ने कलाकार बस्ने ठाउँ, मन्त्री प्रधानमन्त्री बस्ने ठाउँ कस्तो होला भन्ने कल्पना गर्थेँ, ’ उनी भन्छिन्, ’तर काठमाडौं आइसकेपछि मलाई सहर धेरै फोहोर लाग्यो।’

त्यतिबेला सोचिन्– यस्तो धुलो धुवाँमा मान्छे कसरी बस्न सक्छन्।

उनलाई डडेलधुराको अग्ला पहाड र स्वच्छ हावाले गाउँ बोलाएजस्तो लाग्यो। त्यसपछि उनी कहिल्यै काठमाडौं आउनु नपरोस् भन्ने कामना गर्दै फर्किइन्।

पवित्रा प्लस टु पास गरेर फेसन डिजाइनिङ पढ्न भारतको दिल्ली गइन्। त्यहाँ २ वर्ष बसिन्। त्यही क्रममा विश्वभर कोरोना महामारी फैलियो। पवित्रा पनि कोभिडको सिकार भइन्। ‘न औषधि पाइन्थ्यो न डाक्टर। सहयोग गर्ने पनि कोही थिएनन्। अवस्था नाजुक थियो। म त बाँच्दिनँ होला सोचेँ,’ उनी सम्झिन्छिन्।

त्यतिबेला पवित्राको तौल ८ केजी घटेको थियो। केही निको भएपछि उनी डडेलधुरा फर्किइन्। विस्तारै आमाको स्याहारसुसार र खान्कीले उनको ज्यान तंग्रिँदै गयो।

घरमा हुँदा एकजना साथी थिइन्, जो टिकटक बनाइरहन्थिन्। साथीले भन्थिन्, ‘टिकटक बनाउँ न हामी पनि। मान्छेहरू भाइरल भएर कहाँ पुगिसके।’

तर पवित्रालाई भारइल हुने कुनै मोह थिएन।

विस्तारै दिनहरू एक्लै बिताउनु पर्ने भएपछि उनको साथी नै टिकटक भयो।

सुरुका दिन त उनले मजाक मजाकमै टिकटक बनाइन्। कहिलेकाहीँ डेउडा गीतको पनि टिकटक बनाउँथिन्। एकदिन घटालको मेला गएकी थिइन्। जाँदा र आउँदा धेरै हिँड्नुपरेकाले उनी बेस्सरी थाकेकी थिइन्।

त्यहीबेला दुई जना साथीसँगै उनले डोटेली भाषामा एउटा भिडियो बनाइन्। ‘हिँड्दा हिँड्दै खुट्टा दुख्यो। जाँदा पनि हिँडेर आउँदा पनि हिँडेर आयौँ। आपत् पर्यो, गाडी पनि पाइएन,’ डोटेली भाषामा उनी यही भावमा बोलेकी थिइन्।

‘घर आएर पोस्ट गरेको एकै दिनमा १ लाख भ्यूज पुगेछ। हाम्रो भाषालाई निको मान्दा रहेछन् भन्ने लाग्यो,’ उनी भन्छिन्।

कमेन्टमा धेरै प्रयोगकर्ताले सोधे, ‘यो भाषा कहाँको हो?’

रिप्लाइसँगै उनले डोटेली भाषामा अरु भिडिओ पनि बनाइन्। यसरी उनी एकाएक चर्चित हुन पुगिन्। एकाएक डोटेली भाषाले मानिसहरूलाई आकर्षित गर्न थाल्यो।

‘पहिला त काठमाडौं आउँदा डोटेली भाषा बोल्दा लाज लाग्थ्यो। अब गर्वका साथ बोलिन्नछन,’ पवि आफ्नो टिकट भिडिओको प्रभावबारे सुनाउँछिन्, ‘अहिले कसैले आफ्नो घर डडेलधुरा भन्यो भने पविको गाउँको हो भनेर सोध्छन्।’

०००

सानैदेखि मिस पविलाई म्युजिक भिडिओ खेल्ने रहर थियो। पूरा कहिले हुन्छ, सोचेकी थिइनन्।

टिकटकस्टार भइसकेपछि उनलाई एकदिन काठमाडौंबाट म्युजिक भिडिओ खेल्ने अफर आयो। आफूलाई आएको अवसर उनी हातबाट फुत्किन नदिने सोच गरिन्।

सुरु सुरुमा क्यामेरा फेस गर्न केही कठिन भए पनि विस्तारै बानी पर्दै गयो। त्यसपछि त अहिले सबैभन्दा धेरै खोजिने मोडलमध्येमा पर्छिन् उनी।

काठमाडौं कहिल्यै फर्कन्न भनेर गाउँ गएकी पवि कामको व्यस्तताले यतै बस्न थालिन्। ‘अहिले त बानी पर्यो काठमाडौं। रमाइलो लाग्न थालिसक्यो,’ उनी भन्छिन्।

अहिले उनलाई फिल्मबाट पनि अफर आउन थालिसके। सायद छिट्टै उनी फिल्मको पर्दामा पनि देखिनेछिन्।

मिस पविलाई काठमाडौंबाट धेरै कुरा सिक्नु छ। बुझाइलाई पनि फराकिलो पार्नुछ। उनलाई आफ्नो पहिचान, भेषभुषा र संस्कृतिलाई जोगाउनु छ। ‘हिजो टिकटकबाट चिनाएँ। अब म्युजिक भिडिओ र फिल्मबाट चिनाउन चाहन्छु,’उनी भन्छिन्।