कञ्चनपुर– बालिका निर्मला पन्तको बलात्कारपछि हत्या भयो। एक महिना बितिसक्दा पनि वास्तविक दोषी पक्राउ पर्न सकेका छैनन्। अहिले अनुसन्धान अधिकृत र जिल्ला न्यायाधिवक्ताले संयुक्त रुपमा निर्मला हत्या घटनाको अनुसन्धान गरेका छन्।
यसखाले संयुक्त अनुसन्धान भने २६ वर्षपछि पहिलो पटक हुँदैछ।
कञ्चनपुरका जिल्ला न्यायाधिवक्ता खेमराज ओझा र अनुसन्धान अधिकृत पुष्प ओझा सोमबार संयक्त रुपमा घटनास्थल पुगेर अनुसन्धान थालेको कञ्चनपुरका प्रहरी प्रमुख कुवेर कडायतले जानकारी दिए।
‘२०४९ सालअघि अनुसन्धान अधिकृत र जिल्ला न्यायाधिवक्ताले घटनास्थल पुगेर अनुसन्धान गर्ने गरेका थिए। २०४९ सालयता यसखाले संयुक्त अनुसन्धान यो नै पहिलो हो’, कडायतले भने।
सरकारी मुद्दा सम्बन्धी ऐन २०१७ ले कुनै पनि अपराध अनुसन्धान गर्दा अनुसन्धान अधिकृत र जिल्ला न्यायाधीवक्ता संयूक्त रुपमा जानुपर्ने उल्लेख गरेको थियो। तर, २०४९ सालमा ऐन संशोधन भएपछि त्यो व्यवस्था खारेज भएको थियो। ‘हाल लागू भएको मुलुकी ऐनमा समेत उक्त व्यवस्था छैन’, प्रहरी प्रमुख कडायतले भने, ‘तर, हामीले अनुरोध गरेमा आवश्यकता अनुसार जाने वातावरण बन्छ।’ उनले गम्भीर प्रकृतिका अपराधमा यस्तो गरिने गरेको बताए।
उनले पन्तको हत्या र बलात्कार आरोपमा पक्राउ गरेका दिलीपसिंह बिष्टलाई काठमाडौं पठाइएको बताए। कडायतका अनुसार डिएनए परीक्षण तथा थप स्वास्थ्य चेकजाँचका लागि मंगलबार उनलाई काठमाडौं लगिएको हो। विष्टलाई त्रिवि शिक्षण अस्पतालमा भर्ना गरिएको छ।
उनले बलात्कारपछि हत्या गरेको स्वीकार गरेको प्रहरीको दाबी छ। पक्राउ गर्ने प्रहरी अधिकारीहरुले बिष्ट नै प्रमुख अभियुक्त भएको दाबी गर्दै आएका छन्। डिएनए परिक्षणपछि विस्तृत विवरण खुल्ने प्रहरीको भनाई छ। मानसिक रोगी रहेका बिष्टले हत्या गरेको भनेर प्रहरीले चित्तबुझ्दो प्रमाण दिन भने सकेको छैन। पीडित परिवारले भने नक्कली दोषी खडा गरी प्रहरीले छल्न खोजेको आरोप लगाउँदै आएका छन्।
वास्तविक दोषी पहिचान हुनेमा परिवारको आशंका
मृतक निर्मलाकी कान्छी आमा लक्ष्मी पन्तले अनुसन्धान टोलीले वास्तविक दोषीको पहिचान गर्नेमा आशंका व्यक्त गरिन्।
केन्द्रीय अपराध अनुसन्धान टोली (सिआइबी) र कञ्चनपुर प्रहरीले घटना भएको २६ दिनपछि निर्मलाको बलात्कारपछिको हत्यामा संलग्न रहेको भन्दै सोही नगरपालिका बस्ने दिलिपसिंह बिष्टलाई सार्वजनिक गरेको थियो।
‘एउटा निर्दोष मान्छेलाई ल्याएर सार्वजनिक गरियो। भोलिका दिन अरुलाई दोषी बनाउँदा निर्दोषलाई कसरी दोषी बनाइयो भन्ने प्रश्न चिन्ह खडा हुन जान्छ’, उनले भनिन्, ‘त्यसैले टोलीले सार्वजनिक गरेको अपराधीलाई नै घटनाको मुख्य दोषी बनाइन्छ की भन्ने लागेको छ।’
घटनाको अनुसन्धानका लागि भन्दै गृह मन्त्रालयले हरिप्रसाद मैनालीको नेतृत्वमा पाँच सदस्यीय टोली खटाएको छ। कान्छी आमा लक्ष्मीले टोलीले निष्पक्ष छानबिन गरी वास्तविक दोषीको पहिचान गर्नुपर्ने बताइन्। ‘घटनाको निष्पक्ष छानबिन होस्, वास्तविक दोषी पहिचान गरी कारबाहीको दायरामा ल्याइयोस्’, उनले भनिन्।
‘निर्मला रोशनीको घरमा गएको देख्ने सबै छन्’, उनले भनिन्, ‘तर, फर्किएको कसैले देखेनन्।’
यसअघि निर्मलाकी आमा दुर्गा पन्तले छोरीलाई बोलाउन रोशनी बमको घर जाँदा दुई बजे नै गइसकेको प्रतिक्रिया पाएको बताएकी थिइन्। तर, १० गते ११ बजे घरबाट निस्किएकी निर्मलाको शव भोलिपल्ट बिहान ११ बजे नजिकैको उखुबारीमा भेटिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
