काठमाडौं– काठमाडौं महागनगरपालिका मेयर बालेन शाहका शिक्षा सल्लाहकार रेशु अर्याल ढुंगानाले पदबाट राजीनामा दिएकी छन्।
महानगरपालिका भित्रको वेथिति मौलाउँदै गएको र क्षेत्राधिकार बाहिर गएर महानगर चल्न थालेपछि पदबाट राजनीमा दिएको अर्यालले जनाएकी छन्।
नेपाल लाइभसँग कुरा गर्दै अर्यालले भनिन्, ‘महानगरपालिकाले गर्ने काम प्रति नै सन्तुष्ट हुन सकिनँ। महानगरपालिकाले नियन्त्रण गर्ने नाममा गैरकानुनी रुपमा अग्रसर हुन थाल्यो। पछिल्ला घटनाहरु हेर्ने हो भने पनि त्यस्तै भइरहेको छ। नगरपालिकाको प्रहरी जान्छ, ड्याङ–ड्याङ, डुङ–डुङ पार्छ। सबै जना ड्याङ–ड्याङ, डुङ–डुङको त्रासमा छन्।’
महानगरले आफ्ना प्राथमिकता नजरअन्दाज गरेर लोकप्रियताका लागि काम गर्न थालेको महशुस भएको उल्लेख गरिन्। 'नगरपालिकाभित्रका करप्सन गर्ने कर्मचारीलाई कारबाही गर्न सकिरहेको छैन। यस्तोमा बढी ध्यान जानुपर्थ्यो। भित्रको करप्सन कन्ट्रोल गरौं भनिरहेका हौं। सरोकारवालासँग संवाद नगरी प्रहरी पठाउने कुरा मन परेको थिएन,' उनले थपिन्।
महानगरपालिकाले आफ्नो अधिकार क्षेत्रभन्दा बाहिर गएर नेपालमा हिन्दी फिल्म बन्द गराएको भन्दै अर्यालले आपत्ति जनाइन्। भारतीय चलचित्र ‘आदिपुरुष’को विषयलाई लिएर महानगर प्रमुख शाहले काठमाडौं महानगर क्षेत्रका हलहरुमा हिन्दी फिल्न चल्न नदिने निर्णय गरेका छन्।
‘पछिल्लो समय महानगरपालिका सिनेमा हल बन्द गराउन तल्लीन छ। अहिले आएर सिनेमा हलमा गरिरहेको बन्देज कुरा छ। मेरो परिवारमै यो कुरा आयो। परिवारबाटै मुद्दा मामिलामा जाने भएपछि म सल्लाहकार भएर बस्न सक्दिनँ। मेयर भएर कुन चिजमा चल्ने वा नचल्ने? उहाँ त्यस्तो भयानक निर्णय गर्न पाउनुहुन्न। अभिव्यक्ति स्वतन्त्रता चाहने व्यक्ति हुँ, त्यसकारण मैले राजनीमा दिएकी हुँ,’ अर्यालले भनिन्।
अर्यालले आफू लोकतन्त्र र विधिको शासनमा विश्वास गर्ने बताउँदै यसबारे सम्वाद नै नगरी निर्णय गरेर नगरपालिकाले हस्तक्षेप गर्ने गरेको बताइन्।
उनले महागरपालिका भित्रका भ्रष्टाचार नियन्त्रण गर्न नसकेको पनि बताइन्। संस्थागत विद्यालयहरुलाई नियममा बाँध्ने कुरामा आफ्नो पूर्ण समर्थन रहेको उनको भनाइ छ। कम गर्ने क्षेत्रमा आफूलाई कुनै पनि अवरोध नभए पनि समाजसँग जोडिएका विषयमा गरिएका गतिविधि चित्त नबुझेको अर्यालले उल्लेख गरिन्। उनले भनिन्, 'समाजसँगको व्यवहार ठीक भएन। निर्णय लिने तरिका भएन । ठेलागाडा, हिसान र सिनेमा व्यवसायी सवैलाई लागु हुने त्यही हो।'
ठेलागाडादेखि सिनेमा हलसम्ममा गैरकानुनी काम भइरहेका भए प्रक्रियागत रुपमा अघि बढ्नु पर्नेमा आफ्नो मत रहेको अर्यालले बताइन्। अर्यालको परिवारले फिल्म हल चलाउने गरेको छ। उनका श्रीमान् भाष्कर ढुंगाना फिल्म क्षेत्रसँग सम्बन्धित व्यवसायमा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786801196.jpg)
-1786602170.png)
