काठमाडौं- सर्वोच्च अदालतको इजलास ५। न्यायाधीशहरु प्रकाशमान सिंह राउत, टंकबहादुर मोक्तान र नहकुल सुवेदीको पूर्ण इजलास।
उक्त इजलासमा सात थान मुद्दा लामो समयदेखि हेर्दाहेर्दै रहेको थियो। मुद्दा हो, भाटभटेनी डिपार्टमेन्ट स्टोरको कर छलीसम्बन्धी।
उक्त मुद्दा आज बिहीबार अन्तिम बहसका लागि पेसी चढ्नुको विशेष कारण पनि थियो। यो मुद्दामा लामो समयदेखि सुनुवाइमा संलग्न भएका तीनमध्ये एक न्यायाधीश असार १ गतेदेखि बिदामा बस्दै थिए। उनी साउनदेखि उमेर हदका कारण अनिवार्य अवकाशमा जाने भएकाले त्यसको एक महिना अघिदेखि बिदामा बस्दैछन्।
आफ्ना बाँकी मुद्दाहरु लेखन र अदालतको अन्य जिम्मेवारी बुझाउनका लागि न्यायाधीशले उक्त समय बिदामा बस्ने गर्छन्। अवकाश हुनुभन्दा एक महिनाअघि मुद्दा नहेर्ने न्यायिक अभ्यास पनि छ। यही कारण यो मुद्दाको आज अन्तिम पेसी हो जसमा सुनुवाइ सकेर फैसला हुनुपर्नेछ। यो मुद्दाको २०८० वैशाख १४ गतेदेखि सुनुवाइ चलिरहेको छ। बहस चलिरहेका कारण मुद्दा हेर्दा हेर्दैमा राखिएको थियो।
२०८० जेठ ४ गते केही बहस बाँकी राखेपछि बिहीबारका लागि पेसी तोकिएको थियो। आज बिहीबार सुनुवाइ हुन नसकेमा असार १ गतेदेखि यो मुद्दाको सुनुवाइका लागि नयाँ न्यायाधीशको इजलास गठन हुनुपर्नेछ। यसमा फेरि सुरुदेखि नै अन्तिम सुनुवाइ सुरु गर्नुपर्ने हुन्छ।
यही कारण न्यायाधीशहरुले बहसका क्रममा कानुन व्यवसायीहरुलाई आफ्ना कुरा छिटो राख्न र समयभित्र सक्न इजलासबाट पटकपटक भन्दै आएका छन्। पहिलो पटक भएको फैसला चित्त नबुझेपछि दोस्रो पटक दायर भएको मुद्दा हो यो।
२०७६ पुस २६ गते नक्कली भ्याट बिल प्रकरणमा लगातार पाँच वर्षसम्म सुनुवाइ गर्दै भाटभटेनीलाई दोषी ठहर गरिएको थियो। तत्कालीन प्रधानन्यायाधीश चोलेन्द्रशमशेर राणा र न्यायाधीश प्रकाशकुमार ढुंगानाको इजलासले अन्तिम फैसला सुनाउँदै पाँच कम्पनीलाई दोषी ठहर गरेको थियो।
प्रधानन्यायाधीश आफैं संलग्न इजलासले भाटभटेनी सुपर मार्केट, अरूण इन्टरकन्टिनेन्टल, शंकर ग्यास, महेश बानियाँ र आईएटी प्रालिलाई दोषी ठहर गरेको थियो।
सर्वोच्चले फैसलाको पूर्णपाठ तयार गरेलगत्तै २०७७ फागुन ३ गते भाटभटेनीले पुनरावेदन मुद्दा दर्ता गरेको थियो। उक्त पुनरावेदनमा पहिलो सुनुवाइ गर्दै सर्वोच्चले २०७७ फागुन १२ गते मिसिल झिकाउने आदेश गर्दै मुद्दाको सुरुवात गरेको थियो।
योसँगै दोस्रो पटक दायर गरेको मुद्दा ब्युँतिएको थियो भने कर कार्यालयलाई कर लगाउनबाट रोकिएको थियो।
बहस सक्दै आज पूर्ण इजलासले यसअघि संयुक्त इजलासबाट भाटभटेनीलाई दोषी ठहर गर्ने निर्णय बदर गर्ने कि सदर भन्नेबारे निर्णय सुनाउनेछ। पूर्णले यसअघिको आदेश सदर गरेमा नक्कली भ्याट बिल जारी गर्दै भाटभटेनीले राजश्व ठगी गरेको ठहर हुनेछ अनि कर कार्यालय थप कर निर्धारण गर्नेछ। यदि बदर गरेमा उसले सफाइ पाउनेछ र कर बुझाउनुपर्ने छैन।
मूल्य अभिवृद्धि कर र आयकरमा भएको कर निर्धारण गैरकानुनी भएको जिकिर गर्दै नक्कली भ्याट बिल प्रकरणमा आफूलाई दोषी ठहर गर्ने फैसला त्रुटिपूर्ण भएको जिकिर भाटभटेनीले गरेको थियो।
भाटभटेनीले दायर गरेको पुनरावेदन चैत १२ गते पेसीमा चढेको थियो। एक पटक संयुक्त इजलासले सुनाएको फैसलालाई चुनौती दिँदै दायर भएको उक्त निवेदनमा न्यायाधीश तेजबहादुर केसी, बमकुमार श्रेष्ठ र मनोजकुमार शर्माको इजलासले मिसिल झिकाउने आदेश गर्दै मुद्दा पुनः ब्युँताइदिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779363027.jpg)
-1764146706.png)
