काठमाडौं– नेपालमा अवैध रहेको ‘वान एक्स बेट’ र क्रिप्टोकरेन्सी कारोबारीको र्याकेटलाई प्रहरीको विशेष टोलीले पक्राउ गरेको छ। अवैध अनलाइन जुवा र क्रिप्टोकरेन्सी कारोबारमा संलग्न भएको आरोपमा काठमाडौं उपत्यका अपराध अनुसन्धान कार्यालयको विशेष टोलीले पाँच जनालाई पक्राउ गरेको हो।
‘अपरेशन वान एक्स टु सेभ युथ एण्ड सिटिजन–२’ नाम दिएर अपराध अनुसन्धान कार्यालयले गरेको विशेष अपरेशनमा काठमाडौंमा यो धन्दा चलाउने गिरोहका ५ जना सदस्यलाई पक्राउ गरिएको छ। पक्राउ परेका पाँचै जनालाई बुधबार प्रहरीले सार्वजनिक गरेको छ।
पक्राउ पर्नेहरुमा कैलालीको लम्कीचुहा नगरपालिका–१० घर भइ काठमाडौं चाबहिल बस्दै आएका २९ वर्षीय दिनेश खड्का, काभ्रेको पाँचखाल नगरपालिका–४ घर भइ चाबहिल नै बस्दै आएकी २८ वर्षीया अनिता धिताल, भक्तपुरको मध्यपुर ठिमी नगरपालिका–४ घर भएका २७ वर्षीय दिपेश श्रेष्ठ, कन्चनपुरको भीमदत्त नगरपालिका–१८ घर भइ काठमाडौं पेप्सीकोला बस्ने २५ वर्षीय दिनेश चन्द र नुवाकोटको ककनी गाउँपालिका–७ घर भइ काठमाडौं नागार्जुन बस्ने २४ वर्षीय आशिष लामिछाने छन्।
यो गिरोहले वान एक्स बेटमार्फत् अनलाइन जुवा (सट्टेबाजी) खेलाउने, रकम संकलन गर्ने र क्रिप्टोकरेन्सीको कारोबार गर्ने गरेको पाइएको अपराध अनुसन्धान कार्यालयका एसएसपी डा मनोज केसीले जानकारी दिए। सट्टेबाजी खेलाउने वान एक्स बेटका एजेन्टहरु काठमाडौंमा रहेर धन्दा सञ्चालन गर्ने गरेको भन्ने सूचना आएपछि अपराध अनुसन्धान कार्यालयले विशेष टोली नै बनाएर अनुसन्धान गरेको थियो। सो क्रममा उपत्यकाका विभिन्न ठाउँबाट पाँच जनालाई पक्राउ गरिएको हो।
1686745311.jpg)
मैजुबहाल, मध्यपुर ठिमी, सानो भर्याङ, बुद्धनगर लगायतका स्थानहरुबाट उनीहरुलाई पक्राउ गरिएको प्रहरीले जनाएको छ। पक्राउ परेकाहरुविरुद्ध मुलुकी फौजदारी अपराधसहिता २०७४ को दफा १२५ को उपदफा ४ बमोजिमको सट्टाबाजी गर्न नहुने कसुरमा कारबाही प्रक्रिया अघि बढाइने प्रहरीले जनाएको छ।
उनीहरुविरुद्ध थप अनुसन्धान तथा कारबाहीका लागि जिल्ला प्रहरी परिसर काठमाडौं र भक्तपुर पठाइएको अपराध अनुसन्धान कार्यालयका एसपी तथा प्रवक्ता रवीन्द्र रेग्मीले बताए।
उनीहरुबाट ४ थान ल्यापटप, ६ थान डायरी, ३४ थान सीमकार्ड, ७ थान मोबाइल, ६ थान नागरिकताको प्रतिलिपि, विभिन्न बैंकका १४ थान चेक बुक, ५ थान एटीएम कार्ड र २ थान राउटर बरामद भएका छन्।
एकै व्यक्तिले चलाउँथे ६३ वटा बैंक खाता, ६४ करोडको कारोबार
यो प्रकरणमा पक्राउ परेकामध्ये दिनेश खड्का एक्लैले ६४ करोड रुपैयाँ बराबरको कारोबार गरेको देखिएको छ। उनले राम विलाश डिथारु, तेजबहादुर ठयात खड्का, नवीन चौधरी, अनिता धितालको कागजात प्रयोग गरी ६३ वटा खाता खोलेर सञ्चालन गरेको खुलेको छ।
उक्त खाताहरुमध्ये १२ वटा खातामार्फत् ६३ करोड रुपैयाँको कारोबार देखिएको एसएसपी केसीले बताए। खड्काले जंगल, पुकुन्डोल, पिंकी, पिन्टु, पुन्टी, गुल्लु, चिकुवान, ओनिअनवान नामको कनेक्ट आईपीएस अकाउन्ट खोली कारोबार गर्ने गर्थे। दिनेश यसअघि पनि पक्राउ परेको व्यक्ति भएको खुलेको छ।
उनसहित चार जनालाई राजश्व अनुसन्धान विभागले २०७८ सालमा पक्राउ गरेको थियो। उनको ग्लोबल आईएमई बैंकमा ८ करोड ७९ लाख रुपैयाँको कारोबार देखिएपछि उनी अनुसन्धानको दायरामा तानिएका थिए। त्यतिबेला दिनेशसँगै उनकी दिदी भगवती खड्का, वुवा नरबहादुर खड्का र उनकी केटी साथी अनिता धितालविरुद्ध ३७ लाख ६४ करोडको विगो कायम गर्दै मुद्दा चलाइएको थियो।
1686745308.jpg)
पछि उनी २५ लाख धरौटीमा रिहा भएका थिए। अहिले फेरि दिनेशले यही धन्दा सुरु गरेको आरोपमा पक्राउ परेका छन्। उनी वानएक्स बेटका नेपालस्थित मुख्य एजेन्ट रहेको प्रहरीले जनाएको छ।
कसले कति गरे कारोबार?
पक्राउ परेकी अनिता धितालले भने आफ्नो मोबाइलमा बाइनेन्स खाता खोली अमेरिकन डलर किन्ने गरेको देखिएको छ। अर्का प्रतिवादी दिपेश श्रेष्ठले चारवटा मोबाइल नम्बरमार्फत ई–सेवा आईडी खोली सञ्चालनमा ल्याएका थिए। ती आईडीहरुबाट करोडौंको कारोबार गरेको खुलेको छ।
दिपेशले माछापच्छ्रे बैंक, एनआईसी एसिया बैंक, प्रभु बैंक, सानिमा बैंकमा गरी ५ करोड ५४ लाख ६६ हजार रुपैयाँको बेटिङ तथा क्रिप्टोको कारोबार गरेको अनुसन्धानबाट खुलेको छ।
श्रेष्ठले आफ्नो मोबाइलमा क्रिप्टो करेन्सीको कारोबार गर्नलाई बिनान्स अकाउन्ट खोली कारोबार गरेकोसमेत देखिएकाले उनी क्रिप्टोमासमेत संलग्न रहेको खुलेको छ।
यस्तै दिनेश चन्दको प्रभु बैंकको खाताबाट पनि ४५ लाखको कारोबार भएको देखिएको छ। आशिष लामिछानेले एनआईसी एसिया बैंक, ग्लोबल आईएमई बैंक, सनराईज बैंक, महालक्ष्मी विकास बैंकमार्फत् २ करोड ९८ लाख ९६ हजारको कारोबार गरेका थिए।
पक्राउ परेका पाँचै जनाको विवरण अनुसार हालसम्म ७४ करोड १३ लाख ५० हजार ७१३ रुपैयाँको कारोबार गरेको देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749307650.png)
-1749200817.png)
