काठमाडौं- नक्कली भुटानी शरणार्थी बनाएर अमेरिका लैजाने भन्दै गरिएको ठगी प्रकरणमा जिल्ला अदालत काठमाडौंमा बहस जारी रहेको छ। न्यायाधीश प्रेमप्रसाद न्यौपानेको इजलासमा रहेको मुद्दामा प्रतिवादीहरुका कानुन व्यवसायीहरुले बहस गरिहेका छन्।
बुधबारबाट सुरु भएको बहस शुक्रबार पनि जारी रहेको छ। बुधबार र बिहीबार गरी ६ जना प्रतिवादीका कानुन व्यवसायीले बहस गरेका छन्।
मुख्य योजनाकार भनिएका केशव दुलाल, सानु भण्डारी र टंक गुरूङ, सन्देश शर्मा, सागर राई र इन्द्रजित राईको तर्फबाट कानुन व्यवसायीले बहस गरेका छन्। शुक्रबार बाँकी प्रतिवादीका तर्फबाट बहस हुनेछ।
न्यायाधीशले सुरुमा सरकारी वकिललाई ३ दिन र प्रतिपक्षका कानुन व्यवसायीलाई ६ दिनको समय निर्धारण गरेका थिए। निर्धारण गरिएको समय अनुसार अब आइतबार, सोमबार र मंगलबार प्रतिवादीका कानुन व्यवसायीले बहस गर्नेछन्। उनीहरुको बहस सकिएपछि सरकारी पक्षले जवाफी बहस गर्नेछन्। उनीहरुको जवाफ सकिएपछि न्यायाधीशले थुनछेक आदेश सुनाउनेछन्।
नक्कली भुटानी शरणर्थी प्रकरणमा पूर्व उपप्रधानमन्त्री टोपबहादुर रायमाझी, पूर्व गृहमन्त्री बालकृष्ण खाण, बहालवाला सचिव टेकनारायण पाण्डे लगायतका तर्फबाट बहस बाँकी नै रहेको छ।
जिल्ला अदालत काठमाडौंका अनुसार उनीहरु सबैका तर्फबाट कानुन व्यवसायीले वकालतनामा लेखाएका छन् र तोकिएको समयभित्र बहस सक्न भनिएको छ। अदालतले निर्धारण गरेको समयभित्र सबै प्रतिवादीका तर्फबाट बहस सक्न अदालतले निर्देशन गरेको छ।
सरकारी वकिलको कार्यालयले ३० जनालाई प्रतिवादी बनाउँदै मुद्दा दायर गरेको छ। यीमध्ये १८ जनालाई अभियोगपत्रसँगै अदालत पेस गरिएको थियो। बुधबारदेखि बहस गर्ने अधिकांश अभियुक्तका कानुन व्यवसायीहरुले अभियोगपत्रमाथि र सरकारी वकिलको कार्यालयले संगठित अपराध भनी गरेको जिकिर पुग्न नसक्ने तर्क अघि सारेका छन्।
वरिष्ठ अधिवक्ता रमण श्रेष्ठसहितका कानुन व्यवसायीहरुले ठगी भएको भनी दर्ता भएको जाहेरीमै प्रश्न उठाए। त्यस्तै अन्य कानुन व्यवसायीहरुले नक्कली भुटानी शरणार्थी प्रकरणमा संगठित अपराध नभएको जिकिर गरेका छन्। उनीहरुले यो प्रकरणमा पैसाको लेनदेन भएको प्रमाण पेस हुन नसकेकाले प्रमाणित हुन नसक्ने जिकिर गरेका छन्। उनीहरुले आफ्ना प्रतिवादीलाई साधारण तारेख वा धरौटीमा रिहा गर्नुपर्ने दाबी पेस गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
