काठमाडौं– महेन्द्रनगरकी बालिका निर्मला पन्तको बलात्कार तथा हत्या घटनाको अनुसन्धानमा प्रहरी नायब उपरीक्षक(डिएसपी)लाई अनुसन्धान अधिकृत तोकिएको छ। डिएसपी कृष्णराज ओझालाई अनुसन्धान अधिकृत तोकेर नयाँ कोणबाट घटनाको अनुसन्धान अघि बढाइएको छ।
यसअघि प्रहरी निरीक्षक(इन्सपेक्टर) एकेन्द्र खड्का अनुसन्धान अधिकृत थिए। गृह मन्त्रालयले जिल्लाका तत्कालिन प्रहरी प्रमुख डिल्लीराज बिष्टलाई निलम्बन गरी डिएसपी ज्ञानबहादुर सेठी र इन्सपेक्टर खड्कालाई हटाउने निर्णय गरिसकेको छ। उनीहरु माथि नै थप अनुसन्धान अघि बढाइएको छ।
डिएसपी ओझा तीन दिनअघि मात्र कञ्चनपुरमा सरुवा भएका हुन्। यसअघि उनी धनगढीस्थित गणमा कार्यरत थिए। गम्भीर किमिसका अपराधमा डिएसपीलाई अनुसन्धान अधिकृत तोक्ने चलन छ।
नयाँ अनुसन्धान टिमले निर्मलाकी साथी रोशनी बम र उनकी दिदी बबिता बमलाई पक्राउ गरिसकेको छ। रोशनीकै घरमा गएका बेला निर्मलाको बलात्कार र हत्या भएको थियो। मृतकका आफन्तले उनीहरुमाथि नै आशंका गरेपनि प्रहरीले पक्राउ गरेर अनुसन्धान नगरेको भन्दै प्रहरीप्रति आक्रोश बढेको थियो।
पक्राउ परेका दुवै जनालाई सोमबार अदालतमा उपस्थित गराइउने कञ्चनपुरका एसपी कुबेर कठायतले बताए। उनीहरुमाथि पोलिग्राफ टेस्ट गराउने समेत तयारी भइरहेको छ।
विगतमा पनि उनीहरुको कल डिटेल अनुसन्धान भएको बताइएपनि प्रहरीले निष्पक्ष अनुसन्धान नगरेपछि प्रश्न उठेको हो।
घटनाको विस्तृत अनुसन्धानका लागि गृह मन्त्रालयले गठन गरेको सहसचिव हरि प्रसाद मैनाली नेतृत्वको छानबिन समितिले घटनास्थलमा अनुसन्धान गरिरहेको छ। समितिले आइतबार मृतकका परिवारसँग छलफल गरेको छ। प्रारम्भिक छानबिनमा प्रहरीको कमजोरी भेटिएपछि एसपी बिष्टलाई निलम्बन गर्ने निर्णयमा गृह पुगेको हो।
एसपी बिष्ट नेतृत्वको टोलीले पन्तको हत्या स्थानीय दिलिपसिंह बिष्टले गरेको भन्दै सोमबार सार्वजनिक गरेका थिए। तर, नक्कली अभियुक्तलाई देखाएर बास्तविक अभियुक्तलाई जोगाउन खोजिएको भन्दै आन्दोलन चर्किएको थियो। शुक्रबारको आन्दोलनमा प्रहरीको गोली लागेर एक युवकको मृत्यु समेत भएको छ।
छोरी हराएको भनेर प्रहरीमा उजुरी गर्न जाँदा तत्काल खोजीका लागि सहयोग नगर्नु, सुरुमा रोशनीको घरमा खानतालासी नगर्नु, प्रहरीले भनेअनुसार घटनास्थलको प्रकृती नहुनु र मानसिक बिरामी रहेका अभियुक्तविरुद्ध प्रशस्त प्रमाण नभएकाले प्रहरीमाथि शंका बढेको हो। पछिल्ला घटनाक्रमले प्रहरीले नियतबश घटनाको अनुसन्धान तोडमोड गरेको हुनसक्ने भएकाले एसपीलाई निलम्बन गरी डिएसपी र इन्सपेक्टरलाई हटाइएको हो। अनुसन्धानमा सिआइबीबाट खटिएका प्रहरी टोली पनि काठमाडौं फर्किसकेको छ।
आइतबार निर्मला हत्याको ठ्याक्कै एक महिना पुगेको छ। एक महिनादेखि उनका आफन्तहरु हत्यारालाई कारबाहीको माग गर्दै आन्दोलित छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
