काठमाडौं– पठाउनको नाम लेखिएको छ–स्नोभिया अन्सारी। पाउने–लक्ष्मण चौधरी, टेलिफोन नम्बर ९८२८०५१...। ट्रयाकिङ नम्बर– ३९५१८३११०९४०। यो नाम–ठेगानामा फेडेक्स कार्गोमार्फत् अमेरिकाबाट दुबई हुँदै एउटा पार्सल गत फागुन २१ दिउँसो २ बजे काठमाडौंस्थित त्रिभुवन अन्तराष्ट्रिय विमानस्थल आइपुग्छ।
कार्टुनका बक्सभित्र सेता प्लास्टिकले बेरेको अवस्थामा १० वटा पोकाहरु भन्सार कार्यालयको गोदाममा पुग्छन्। संकास्पद ती पोकाहरु पार्सलको नाममा अन्य धन्दा हुनसक्ने भन्दै खोलिन्छन्। १० वटा प्याकेट खोलिएपछि भेटिन्छ–अवैध लागु औषध गाँजा।
अमेरिकीदेखि काठमाडौं आइपुगेको उक्त साढे ४ किलो गाँजा रिसिभ गर्न पुग्छन् पर्साको धोबनी गाउँपालिका–५ का २७ वर्षीय फैज आलम भनिने फैजुलाह शाह र भारतीय नागरिक ३० वर्षीय निमेश अशोकभाइ दयानी।
उनीहरु इभरल्याण्ड काठमाडौं होटलको १०४ नम्बर कोठा बुक गरेर बस्दै आएका थिए। पार्सल आएको सूचना आएपछि रिसिभ गर्न विमानस्थल भन्सार पुग्दा पक्राउ पर्छन्।
पक्राउ परेका फैज आलम फिलिपिन्स जाने भन्दै २ महिनाअघि काठमाडौं आएर नयाँबसपार्कस्थित होटलमा बस्दै आएका थिए। ‘सोही क्रममा चिनजान भएका निमेशले आफूलाई गाइडको रुपमा सहयोग गरिदिन आग्रह गरे र त्यस बापत केही रकम समेत दिने आश्वास दिए,’ आलमको भनाइ छ।
त्यसपछि आलमले आफ्नो सीमकार्ड समेत निमेशलाई दिए। त्यसबापत २ हजार निमेशले आलमलाई दिए। केही दिनपछि निमेशले अर्को प्रस्ताव सुनाए, अमेरिकाबाट नेपालमा सामान मगाउन लागेको प्राप्त गर्ने व्यक्तिको नाम ठेगाना र परिचय खुल्ने आईडी चाहियो। त्यसवापत १० हजार आलमले पाउने भए।
आलमले विभिन्न व्यक्तिका नाम ठेगाना, लाइसेन्स तथा नागरिकताको फोटो खिचेर ह्वाट्सएपमा हाल्दिए । समान अमेरिकाबाट विमानस्थल आइपुग्यो। उनीहरुले चाहिने आवश्यक कागजात कुरियर अफिसबाट लिएर भन्सार गइ सामान लिए। यो क्रम तीन पटकसम्म चल्यो।
चौथो पटक फेरि सामान आएको भन्दै भन्सारमा लिन जानुपर्ने निमेशले बताए। चौथो पटक सामान लिन विमानस्थल भन्सार पुगेका बेला भने उनीहरु पक्राउ परे, साढे ४ किलो गाँजासहित।
पक्राउ परेका भारतीय नागरिक निमेश भने अमेरिका, क्यानडा लगायतका देशहरुबाट चक्लेट, क्याण्डी, खेलौना तथा गेमलगायतका सामानहरु खरिद गरी भारतमा बिक्रि गर्ने योजनामा थिए।
४ महिना अघि मात्र गोटी नाम गरेका व्यक्तिसँग सम्पर्क भएपछि अमेरिकाबाट सामान मगाइदिने कुरा गरेको, तर सामान आयात गर्दा भारतमा भन्सार महँगो पर्ने नेपालबाट सामान मगाउँदा सस्तो पर्ने बताएपछि काठमाडौं आएको निमेशको भनाइ छ।
सोही क्रममा आलमसँग चिनजान भएको र आफूलाई नेपाली राम्रोसँग नआउने भएकाले सहयोग गर्न आग्रह गरेको निमेशको भनाइ छ। पछि गोटीले सामान पाउने व्यक्तिको नाम–ठेगाना पठाउनु भनेकाले आलमको सहयोगमा नाम–ठेगाना पठाएको दाबी निमेशको छ।
यसरी सामान काठमाडौं आइपुगेपछि बसमार्फत् दिल्ली लाने गरेको दाबी उनले गरेका छन्। सोही क्रममा सामान भनेर अमेरिकाबाट गाँजा पार्सल गरेर पठाइएको उनको भनाइ छ। यसअघि पनि यसैगरी गाँजा आउने गरेकोमा गोटीले भने अनुसारका व्यक्तिलाई आफूले गाँजा दिने गरेको निमेश स्वीकार गरेका छन्।
निमेशले गोटी भनेका व्यक्ति भने भारत गुजरातका रहेको बुझिएको छ। उनकै सल्लाहअनुसार आफूले काम गरेको निमेशको भनाइ छ। सामान रिसिभ गरेपछि आफू पनि पटक पटक भारत जाने र गोटीलाई भेट्ने गरेको निमेशले बताएका छन्। त्यसबापतले गोटीले आफूलाई १ लाख २० हजार रुपैयाँ समेत दिएको उनको भनाइ छ।
गाँजासहित आलम र निमेश पक्राउ परेपछि गाँजा तस्करीको पनि नयाँ रुट देखिएको छ। अमेरिकाबाट समेत पार्सलको नाममा गाँजा काठमाडौं ल्याएर यहाँबाट स्थलमार्ग हुँदै भारत पुग्ने गरेको पाइएको छ।
पक्राउ परेका दुबै जनालाई प्रहरीले लागू औषध नियन्त्रण ऐनअन्तर्गतको कसुरमा जिल्ला अदालतमा मुद्दा दर्ता गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787798465.jpg)
-1787832829.png)
-1787832475.jpeg)
-1786602170.png)
-1786513116.png)
