काठमाडौं- राष्ट्रिय मानव अधिकार आयोगले कोशी प्रदेशको नामाकरणको विषयलाई लिएर त्यहाँका विभिन्न जिल्लाहरुमा भएको विरोध प्रदर्शनमा भएका घटनाक्रमप्रति गम्भीर ध्यानाकर्षण भएको जनाएको छ।
सोमबार विज्ञप्ति जारी गर्दै उसले अभिव्यक्ति स्वतन्त्रताको सम्मान गर्न र प्रदर्शनलाई हिंसात्मक बनाउन आग्रह गरेको पनि गरेको छ।
'नागरिकको शान्तिपूर्ण भेला हुने र विचार राख्ने अधिकारको सम्मान गर्न, कुनै व्यक्तिलाई कारबाहीको दायरामा ल्याउँदा कानुनसम्मत विधि र मानव अधिकारमैत्री व्यवहार गर्न, विवादको विषयलाई वार्ता र संवादको माध्यमबाट टुंग्याउन, आम नागरिकले आफ्नो पेशा, व्यवसाय र गतिविधि निर्वाध रुपले गर्न सक्ने गरी भयरहित वातावरण सिर्जना गर्न र मानव अधिकारका मूल्यमान्यता ख्याल गरी प्रदर्शनकारीमाथि संयमित व्यवहार गर्न आयोग नेपाल सरकार, कोशी प्रदेश सरकार, सुरक्षा निकाय तथा सम्बद्ध सबैलाई आग्रह गर्दछ' विज्ञप्तिमा भनिएको छ।
आयोगले आफ्नो मागहरु राख्दा विधिसंगत, शान्तिपूर्ण र मर्यादित ढंगले राख्न, आफ्नो अधिकारको प्रयोग गर्दा अरुको अधिकार प्रभावित हुने गतिविधि नगर्न तथा विरोध प्रदर्शनलाई हिंसात्मक नबनाउन प्रदर्शनकारीहरुलाई अनुरोध पनि गरेको छ।
'राजनीतिक दलहरुले पनि प्रदर्शनलाई हिंसारहित तथा शान्तिपूर्ण बनाउन तथा वार्ता र संवादकै माध्यमबाट समाधान खोज्नका लागि सार्थक भूमिका निर्वाह गर्न आयोग राजनीतिक दलहरुलाई समेत अनुरोध गर्दछ', विज्ञप्तिमा भनिएको छ।
तत्कालीन प्रदेश १ को नाम कोशी प्रदेश राखिएपछि सो प्रदेशमा पहिचानको आधारमा नामाकरण गरिनुपर्छ भन्ने पक्षधरहरुले निरन्तर विरोध प्रदर्शन गर्दै आएका छन्। सो क्रममा एक जनाको ज्यान पनि गइसकेको छ भने कैयौँ घाइते भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
