काठमाडौं– कैलालीको टिकापुर घटनामा जन्मकैद सजाय काटिरहेका रेशम चौधरीलाई माफी दिन लागेपछि पीडित मध्येकी एक प्रहरी निरीक्षक केशव बोहराकी श्रीमती शारदा कडायत बोहराले राष्ट्रपति कार्यालयमा निवेदन दिएकी छन्।
उनले आठ जना सुरक्षाकर्मी र एक जना नाबालकको ज्यान लिने गरी भएको टिकापुर घटना नेपाली समाजमा घटेको एउटा अकल्पनीय र दुःखदायी एवम् क्रूर आपराधिक घटना भएको भन्दै माफी दिने पत्र कार्यान्वयन रोक्न माग गरेकी छन्।
‘यो घटनालाई स्मरण गर्दा प्रत्येक नेपालीको शिर लाजले निहुरिन पुग्दछ। यस घटनाको दृश्यलाई पढ्दा प्रत्येकको आँखाबाट नुनिलो वर्षा हुन्छ ’ उनले निवेदनमा भनेकी छन् ‘मृतकले नागरिकको रक्षा गर्ने कर्तव्य निर्वाह गर्दागर्दै भोग्नु परेको चरम यातनामय शारीरिक पिडा र मृत्युवरणको काल्पनिक अनुभूतिले मात्र पनि जो कोहीलाई एक पटक बेहोस बनाउँछ। मृतकका नजिकका मानिसहरूलाई कस्तो दर्द र पीडा बोध भयो होला त्यसलाई शब्दमा उतार्न शायदै सकिएला।’
२०७२ भदौ ७ मा कैलालीको टीकापुरमा रेसम चौधरीको नेतृत्वमा थरुहट समर्थक प्रदर्शनकारीको आक्रमणबाट राष्ट्र सेवामा खटिएका सुरक्षाकर्मी र एक जना बालक सहित ९ (नौ) जनाको बिभत्स हत्या गरेको घटना भएकाले यसलाई माफी दिन नमिल्ने दाबी उनले निवेदनमा गरेकी छन्।
‘यो घटनाको घाउ हामी पीडित र आम जनमानसमा आलो नै छ। त्यही घटनामा सहादत पाउने नेपाल प्रहरीका प्रहरी निरीक्षक केशव बोहराको धर्मपत्नी म शारदा कडायत बोहरा न्यायका लागि बिन्ती गरिरहेकी छु ’ उनले भनेकी छन् ‘ २०७२ भदौ ७ मा हुने उक्त प्रदर्शन शान्तिपूर्ण गर्ने भनी सुरक्षा निकाय लगायत सबैलाई भ्रममा पारी नियोजित रूपमा घरेलु हातहतियारसहित रेशम चौधरी लगायतको अगुवाइमा प्रदर्शन गरेका प्रदर्शनकारीलाई घटनास्थलमा उपस्थित प्रहरी वरिष्ठ उपरीक्षक लक्ष्मण न्यौपाने र मेरा पति प्रहरी निरीक्षक केशव बोहरा लगायतका सुरक्षाकर्मीलाई लखेटी लखेटी बन्चरो,भाला र कुटोले क्षतविक्षत हुने गरि गरेको हत्यालाई कसरी हामी माफ गर्न सक्छौ।’
आन्दोलन शान्तिपूर्ण गर्न सम्झाइ बुझाई गर्दागर्दै सुरक्षाकर्मीका तर्फबाट सामान्य लाठी समेत प्रहार नभएको अवस्थामा चारैतर्फबाट घेराबन्दी गरी घटना भएकाले यसलाई राजनीतिक भनेर माफी दिन नमिल्ने यसअघि अदालतको न्यायीक टिप्पणीहरुमा समेत भनेको उनले दावी गरेकी छन्।
सरकारले हालै मात्र सर्वोच्च अदालतबाट जन्मकैदको सजाय सदर भएका चौधरीलाई बाँकी सजाय माफी दिने गरि प्रक्रिया अघि वढाएको थियो। सरकारले महान्यायाधीवक्ता कार्यालयसँग राय लिँदै माफीका लागि राष्ट्रपति कार्यालयमा पत्र समेत पठाएको छ। राष्ट्रपति रामचन्द्र पौडेलले जेठ १५ गते गणतन्त्र दिवसको दिनमा उनलाई बाँकी सजाय माफी दिने तयारी गरेका छन्। उक्त तयारीले निर्मतापूवर्क हुने हत्याहरुलाई राजनीतिक रुप दिने र कानुनी शासनको बर्खिलाफ हुने दाबी उनले गरेकी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787798465.jpg)
-1787832829.png)
-1787832475.jpeg)
-1786602170.png)
-1786513116.png)
