रौतहट– रौतहटको लालबकैया नदीमा शनिबार डुंगा पल्टिँदा ५ जना मात्रै हराइरहेको पुष्टि भएको रौतहट प्रहरीले जनाएको छ। यसअघि माझीहरुको भनाईका आधारमा २१ जना हराइरहेको अनुमान गरिएता पनि अब ५ जना मात्रै बेपत्ता रहेको जिल्ला प्रहरी कार्यालय रौतहटका प्रहरी प्रमुख केदार ढकालले जानकारी दिए।
‘यसअघि माझीहरुका अनुसार ३० जनाभन्दा बढी सवार रहेको र अझै २१ जनाको अवस्था अज्ञात रहेको भनिएको थियो।’, प्रहरी प्रमुख ढकालले भने, ‘उद्दार गरिएका व्यक्ति र हराइरहेको भनि उजुरी आएको आधारमा अब मात्र ५ जनाको अवस्था अज्ञात छ।’
उनका अनुसार दुर्घटनामा परेकामध्ये हालसम्म १६ जना पुरुष र ५ जना महिला गरी कुल २१ जनाको जीवितै उद्धार भइसकेको छ।
हराइरहेकाहरुको हाल स्थानीयहरुको सहयोगमा नेपाली सेना, नेपाल प्रहरी तथा सशस्त्र प्रहरीको टोलीले खोजी कार्य जारी राखेको छ।
नदीमा बाढी आएकोले खोजी कार्यमा केही समस्या भएको ढकालले बताए। ‘वर्षातको समय भएको भएर नदीमा पानीको मात्रा र बहाव पनि बढी छ। तर पनि नदीको गहिराई कम भएकोले हालसम्म गोताखोरको आवश्यकता पर्छ भन्ने लागेको छैन।’, उनले भने,‘तीन वटै तहका सुरक्षा अंग खोजीकार्यमा जुटेका छौं।’
प्रहरी प्रमुख ढकालले डुंगा के कारणले पल्टियो भन्ने तथ्य हालसम्म नखुलेको बताए। उनी भन्छन्, ‘नदीमा बाढी पनि आएको र एउटै डुंगामा ३० भन्दा बढी सवार भएको हामीले बुझेका छौं। त्यसकारण धेरै यात्रु सवार हुनु नै प्रमुख कारण हो भनेर अनुमान गर्नसक्छौं।’
बन्जाराहबाट सदरमुकाम गौरको टिकुलियाघाटतर्फ आउँदै गरेको डुंगा लालबकैया नदीमा शनिबार बेलुका पल्टिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
