काठमाडौं– भारतीय पर्यटकलाई टार्गेट गरेर लुटपाट गर्ने गिरोहका सदस्यलाई प्रहरीले नियन्त्रणमा लिएको छ। काठमाडौं उपत्यका अपराध अनुसन्धान कार्यालयको टोलीले जेठ ७ र ८ गते दुई दिनमा यो गिरोहका पाँच जनालाई पक्राउ गरेको हो।
पक्राउ पर्नेहरुमा डान्सबार सञ्चालकदेखि पठाओ राइडर र पटके लुटेराहरुसम्म छन्। यो प्रकरणमा प्रहरीले नुवाकोटको तारकेश्वर गाउँपालिका–४ घर भएका ३२ वर्षीय पदमबहादुर शाही, कैलालीको धनगढी उपमहानगरपालिका–३ का ३३ वर्षीय पुरन भनिने ओमप्रकाश ऐरी, रामेछापका धनराज गिरी, सुशन गिरी र नुवोकाटका शेरबहादुर तामाङ छन्।
शाही र ऐरीलाई प्रहरीले जेठ ७ गते र बाँकी तीन जनालाई जेठ ८ गते उपत्यका विभिन्न ठाउँबाट पक्राउ गरेको हो। पक्राउ परेकामध्ये शाही डान्सबार सञ्चालक, तामाङ पठाओ राइडर गिरीद्वय र ऐरी पटके लुटेराहरु हुन्। यो गिरोहले पटक–पटक भारतीय पर्यटकलाई टार्गेट गरेर लुटपाट गर्दै आएको अपराध अनुसन्धान कार्यालयले जनाएको छ।
भारतीय नम्बर प्लेटको गाडीमा काठमाडौं घुम्न आएका पर्यटकहरुलाई यो गिरोह नागढुंगादेखि नै रेकी गर्दै लुटपाट गर्ने गरेको प्रहरी अनुसन्धानबाट खुलेको छ। भारतीय नम्बर प्लेटको गाडीमा पर्यटक आएको देखिपछि मोटरसाइकलमा पछि गर्दै हिँड्दै गाडीको गन्तव्यसम्म उनीहरु पुग्ने गरेका थिए।
त्यसपछि सस्तोमा गेष्टहाउस मिलाउनेदेखि, डान्सबार र युवतीको व्यवस्थासमेत गर्ने भन्दै प्रलोभनमा पारेर आफूले भनेको ठाउँसम्म भारतीय पर्यटकलाई पुर्याउने गरेको पाइएको छ।
होटलमा पुर्याएछि बन्धक बनाएर कुटपिट गर्दै लुटपाट गर्ने, डर–धाकधम्की दिने गरेको पाइएको प्रहरीको भनाइ छ। त्यसगरी यो गिरोहले केटी मिलाइदिने भन्दै युवतीकोसमेत प्रयोग गरेर लुटपाट गर्ने गरेको पाइएको छ। होटलको कोठामा केटी लगेर राखिदिने र केटीलाई जथाभावी गरेको भन्दै पुलिस केश गरेर फसाइदिन्छु भन्दै धम्की दिने गरेको खुलेको छ।
यसरी नियन्त्रणमा लिएर उनको साथमा भएको नगद तथा जिन्सी सबै यो गिरोहले लुट्ने गरेको प्रहरीले जनाएको छ। नगद जिन्सी लिइसकेपछि भारतीय बैंकमा रहेको रकमसमेत भारतीय अकाउन्टमै ट्रान्सफर गर्न लगाउने गरेकोसमेत प्रहरी अनुसन्धानबाट खुलेको छ।
त्यसका लागि यो गिरोहले भारतमा रहेका व्यक्तिसँगसमेत समन्वय गरेर काम गर्ने गरेको खुलेको छ। आफ्नो खातामा रकम आएपछि १० प्रतिशत कटाएर बाँकी रकम भारतीय खाता भएका व्यक्तिले यो गिरोहलाई विभिन्न माध्यमबाट नेपाल पठाउने गरेको पाइएको छ।
लुटिसकेपछि यो गिरोहले पुन: स्कर्टिङ गर्दै भारतीयलाई नौबिसेसम्म पुर्याएर फर्कने गरेको पाइएको छ। नौबिसे पुर्याउनुको पछाडि फर्केर काठमाडौं आएर प्रहरीमा उजुरी नहालोस् भन्ने आशय देखिएको छ। गाडीमा तेलसमेत थोरै राख्न लगाउने ताकी फर्केर काठमाडौं आउन नमिलोस्, अर्कोतर्फ भने काठमाडौं आएमा ज्यानसमेत मार्ने धम्की दिएर डाँडा कटाउने गरेको पाइएको अपराध अनुसन्धान कार्यालयले जनाएको छ।
भारतीयलाई टार्गेट गरेर लुटपाट गरिसकेपछि उनीहरु फर्केर पुन: काठमाडौं आएर पुलिस केश नगर्ने भएकाले पनि यो गिरोहले टार्गेटमा भारतीयलाई पारेको प्रहरीले जनाएको छ।
अर्कोतर्फ प्रहरीमा जाहेरी दिए पनि मान्छे पक्राउ पर्ने र मुद्दा चल्न समय लाग्ने भएकाले त्यतिन्जेलसम्म भारतीयहरु काठमाडौं नबस्ने र जाहेरी दिएर भारत गए पनि पक्राउ परेका बेला पुनः जाहेरी सनाखत गर्नुपर्ने भएकाले फर्केर काठमाडौं नआउने हुँदा गिरोहले भारतीय नागरिकलाई टार्गेट गर्दै काठमाडौंमा लुटपाटको आतंक मच्चाएको प्रहरीको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
