राजनीति

भुटानी शरणार्थी प्रकरण: हिजो मात्रै आएका थिए टोपबहादुर काठमाडौं, १० दिनसम्म कहाँ लुकेका थिए?

नारायण अधिकारी आइतबार, वैशाख ३१, २०८० २२:०८

काठमाडौं– नेपाली नागरिकलाई भुटानी शरणार्थी बनाएर अमेरिका पठाउने भन्दै एक अर्ब रुपैयाँ भन्दा बढी ठगी भएको प्रकरणमा नेकपा एमालेका नेता टोपबहादुर रायमाझी पक्राउ परेका छन्।

सांसदसमेत रहेका एमालेका निलम्बित सचिव तथा पूर्वउपप्रधानमन्त्री रायमाझीलाई बुढानिलकण्ठबाट पक्राउ गरिएको हो। रायमाझीलाई पक्राउ गरिएको पुष्टि उपत्यका प्रहरी कार्यालय रानिपोखरीका एआईजी श्यामलाल ज्ञवालीले गरे।

उनका अनुसार रायमाझीलाई बुढानिलकण्ठस्थित पासिकोटबाट पक्राउ गरिएको हो। प्रहरी स्रोतका अनुसार रायमाझीलाई नारायण पौडेलको घरबाट नियन्त्रणमा लिइएको हो। पौडेल रायमाझीको आफन्त रहेको बुझिएको छ।

पक्राउ पूर्जी जारी भएपछि वैशाख २० गतेबाट रायमाझी सम्पर्कविहीन भएका थिए। वैशाख २० गते अर्घाखाँचीको कार्यक्रम सकेर उनी त्यसैदिन राति काठमाडौं आउने तयारीमा थिए। सोही अनुसार उनले भैरहवाबाट काठमाडौं आउनका लागि हवाई टिकटसमेत काटेका थिए।

तर, छोरा सन्दीप पक्राउ परेपछि उनी सम्पर्कविहीन भएका थिए। सम्पर्कविहीन भएका रायमाझीले पछि प्रहरी नेतृत्वसँग सम्पर्क गर्दै आफू प्रहरीसामु उपस्थित हुने बताएका थिए। रायमाझीले आफैं उपस्थित हुन्छु भनेपछि प्रहरीले तत्कालै पक्राउ गर्ने तदरुकता देखाएन। त्यसयता उनी फरार थिए ।

पक्राउ पुर्जी जारी भएपछि १० दिनसम्म फरार भएका रायमाझी पोखरामा लुकेर बसेको खुलेको छ। रायमाझी पोखरामा लुकेर बसेको सूचना पाएपछि जिल्ला प्रहरी परिसर काठमाडौंको टोली शनिबार पोखरा गएको थियो। तर, रायमाझीलाई नियन्त्रणमा लिन सकेन।

पोखरा गएको टोलीका केही सदस्य आइतबार बिहानै काठमाडौं फर्किएका थिए भने एक टोली पोखरा नै बसेको थियो।

प्रहरी टोली पोखरा आएको सूचना पाएपछि रायमाझी भने पोखराबाट शनिबार काठमाडौं आएको पाइएको छ। रायमाझी काठमाडौं आएर पासिकोटमा बसेको सूचना पाएपछि प्रहरीले उनलाई पक्राउ गरेको हो।

पोखराबाट स्थलमार्ग हुँदै उनी काठमाडौं आएको प्रहरी स्रोतले जानकारी दियो। स्रोतका अनुसार गल्छीबाट नुवाकोटको बाटो हुँदै काठमाडौं छिरेका थिए।

‘हिजै पक्राउ गर्ने तयारी थियो। तर हाम्रो योजना सफल भएन। आज भने रायमाझीलाई ड्रप गर्ने मान्छे पत्ता लगाएपछि उनलाई पक्राउ गरिएको हो’, प्रहरी उच्च स्रोतले नेपाल लाइभसँग भन्यो।

यता रायमाझी भागेर भारत पुगेको हुनसक्ने आशंका गर्दै सीआईबीको एक टोली शुक्रबार भारत गएको थियो। यो प्रकरणमा अहिलेसम्म रायमाझीसहित १३ जना पक्राउ परेका छन्।