काठमाडौं- मानव तस्करका नाइके भनेर चिनिएका दाङका टोपबहादुर जिसी पक्राउ परेका छन्। जिल्ला प्रहरी कार्यालयको टोलीले बुधबार जिसीलाई घोराहीको भिंग्रेली रिसोर्टबाट पक्राउ परेको हो। यो सँगै टोपबहादुर मानव तस्करको घटनामा तेस्रो पटक पक्राउ परेका हुन्।
२०७७ पुस १९ गते टोपबहादुरविरुद्ध जिल्ला अदालत काठमाडौंले २ वर्ष कैद र १२ लाख जरिवानाको फैसला गरेपछि पनि उनी दाङमा पक्राउ परेका थिए। त्यो भन्दा अघि २०७६ वैशाखमा काठमाडौंमा पक्राउ परेर उनी धरौटीमा रिहा भएका थिए। अहिले पक्राउ परेसँगै उनको यो तेस्रो हिरासत यात्रा हो।
एक विवाहको कार्यक्रममा उनी उक्त रिसोर्टमा पुगेका थिए। अमेरिका पठाउने भन्दै लाखौं रुपैयाँ लिएर ठगी गरेको भन्दै एक वर्षअघि उनीविरुद्ध उजुरी परेको थियो। जिसी मानव तस्करीका कुख्यात व्यक्ति रहेको प्रहरीले बताउँदै आएको छ।
२०७८ असारमा अवैध बाटो हुँदै अमेरिका हिँडेका ७ नेपाली कोलम्बियास्थित क्यारेबियन सागरमा डुंगा दुर्घटनामा परेर बेपत्ता भएका थिए। ती व्यक्तिलाई पनि जिसीले नै अमेरिका पठाएको पाइएको थियो।
त्यसपछि जिसीकी श्रीमती गोमालाई प्रहरीले पक्राउ गरेर अनुसन्धान गरेको थियो। पछि गोमा धरौटीमा रिहा भएकी थिइन्। टोपबहादुर भने फरार नै भएका थिए।
मानव तस्करीको धन्दा
यो घटनाभन्दा केही समयअघि मात्रै दाङ प्रहरीले टोपबहादुर पक्राउ गरेको थियो। पछि उनी धरौटीमा रिहा भएका थिए। धरौटीमा रिहा भएपछि टोपबहादुरले फेरि मानव तस्करीको धन्दा चलाएको डुंगा दुर्घटनापछि सार्वजनिक भएको थियो।
टोपबहादुर र श्रीमती गोमा मिलेर मानव तस्करीको धन्दा चलाउने गरेको प्रहरी अनुसन्धानबाट खुलेको थियो।
नेपालबाट विभिन्न प्रलोभन देखाएर अमेरिकाको आकर्षण देखाउने काममा गोमाले सहयोगी भूमिका खेल्ने गरेको मानव बेचबिखन तथा अनुसन्धान ब्यूरोले जनाएको थियो।
अवैध बाटो हुँदै अमेरिका जानेहरुबाट लिएको रकमसमेत गोमाको बैंक खातामा जम्मा भएको प्रहरी अनुसन्धानबाट खुलेको थियो। नेपालमा बसेर श्रीमती गोमाले काम गर्ने र नेपालभन्दा बाहिरको बन्दोबस्त टोपबहादुरले गर्थे।
डुंगा दुर्घटनापछि प्रहरीले खोजी गर्दा टोपबहादुर युक्रेनमा रहेको खुलेको थियो। त्यसपछि टोपबहादुर पक्राउ गर्न भन्दै इन्टरपोलमार्फत रेड नोटिस नै जारी भएको थियो। रेड नोटिस जारी भएका उनै टोपबहादुर नेपाल आएर विवाह भोजमा सरिक भएका बेला प्रहरीले पक्राउ गरेको हो।
यसअघि पनि टोपबहादुर पक्राउ परेका थिए। दाङकै एक व्यक्तिलाई नेपालबाट अवैध बाटो हुँदै अमेरिका पुर्याएको घटनामा उनी पक्राउ परेका थिए। ती व्यक्तिलाई नेपालबाट जमुनाह नाका हुँदै दिल्ली, रसिया, स्पेन, बोलिभिया, पेरु, निकारागुवा, होन्डुरस, ग्वाटेमाला र मेक्सिको हुँदै जिसीले अमेरिका पठाएका बताइएको छ ।
मासिक ५ हजार अमेरिकी डलर कमाइ हुने र केही समयमा ग्रिनकार्डसमेत पाउने प्रलोभन देखाएर जिसीले ती व्यक्तिलाई अमेरिकाको सपना देखाएका थिए। त्यसपछि ती व्यक्तिले सुरुमा १५ लाख ९७ हजार रुपैयाँ जिसीलाई दिएका थिए। पछि पटकपटक गरी अमेरिका पुग्दासम्म ५५ लाख ९७ हजार रकम ती व्यक्तिले जिसीलाई बुझाएका थिए।
रकम बुझाएपछि २०७३ चैतमा ती व्यक्तिलाई नेपालबाट भारत पुर्याइएको थियो। त्यसपछि विभिन्न देश हुँदै अमेरिका पुर्याइएको थियो। अमेरिकी प्रहरीले ती व्यक्तिलाई पक्राउ गरी १७ महिनासम्म जेल हालेको थियो। पछि दूतावासमार्फत रिहा भएर उनी नेपाल डिपोर्ट भएका थिए। नेपाल फर्केपछि जिसीविरुद्ध मानव बेचबिखनमा ती व्यक्तिले जाहेरी दिएका थिए।
जोहरी परेसँगै घोराही उपमहानगरपालिका-१५ का जिसी २०७६ वैशाख ६ गते मानव बेचबिखन मुद्दामै पक्राउ परेका थिए। उनी ३ महिनापछि असार ४ गते १५ लाख धरौटी तिरी रिहा भएका थिए। जिसीले उच्च अदालतमा जिल्ला अदालतले आदेश गरेको १५ लाख धरौटी फिर्ता गरी पाउँ भनी पुनरावेदन समेत दिएका थिए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
