काठमाडौं– यतिबेला नक्कली भुटानी शरणार्थी प्रकरणमा चौतर्फी विरोध भइरहेको छ। भुटानी शरणार्थीको सूचीमा नेपाली नागरिकलाई नक्कली शरणार्थी बनाएर अमेरिका पठाउने भन्दै भएको ठगी आरोपमा हाल पूर्व गृहमन्त्री बालकृष्ण खाण, गृह सचिव टेकनारायण पाण्डेलगायत पक्राउ परेका छन् भने पूर्व उपप्रधानमन्त्री टोपबहादुर रायमाझी फरार रहेका छन्।
तर यो प्रकरणमा एकपछि अर्को गर्दै ठूला नेताहरुको संलग्नता देखिएपछि कारबाही नगरी सामसुम पारिन्छ कि भन्ने आशंकामा सरकारलाई दबाब दिन बुधबारदेखि काठमाडौंमा बृहत नागरिक आन्दोलन सुरु भएको छ।
आन्दोलनमा स्वस्फूर्त रुपमा नागरिक अभियान्ता, युवा, वृद्धवृद्धाहरुले आफ्नो सक्रिय सहभागिता जनाए। उनीहरुले ‘हिम्मतका लागि आभार, खुट्टा कमाए खबरदार, पुराना नेता भ्रष्ट छन्, जनता यसमा प्रष्ट छन्, खोइ कर भष्ट्रचारीको पेटमा, नक्कली भुटानी शरणार्थीमाथि भ्रष्टाचार, कति हेरर नबस अख्तियार’ लगायतका नारा लेखिएका प्लेकार्डसहित नाागरिकहरु आन्दोलनमा होमिए।
भ्रष्टाचारविरुद्ध गित, कवितासहित तिखो व्यङ्ग्यप्रहार समेत गरेका थिए। वृहत नागरिक आन्दोलनलाई सम्बोधन गर्दै नागरिक अभियान्ताहरु केदार भक्त माथेमा, डा गोविन्द केसी, सञ्जिव उप्रेती सरकारविरुद्ध नै खनिए।
नेताका लागि भ्रष्टाचार र माछाका लागि पानी उस्तै भइसक्योः माथेमा
आन्दोलनलाई सम्बोधन गर्दै केदार भक्त माथेमाले नेताका लागि भ्रष्टाचार र माछाका लागि पानी उस्तै भएको आरोप लगाए। उनले भने,‘हामीलाई यो उमेरमा सडकमा आउन के रहर? अब त अत्ति नै भयो। सही नसक्नु भयो। अब भ्रष्टाचार कस्तो भइसक्यो भने माछाको लागि पानी जस्तै भइसक्यो।’ उनले भ्रष्टाचार बढ्दै जाँदासमेत प्रश्न नै नगर्ने गरेको बताए।
माथेमाले विभिन्न किसिममा प्रकरण सार्वजनिक हुँदासमेत कारबाही नभएको भन्दै आक्रोश व्यक्त गरे। नागरिकहरु सुस्त भएको फाइदा नेताहरुले उठाएको दाबी माथेमाले गरे। उनले यो काण्ड निराकरण नहुँदासम्म अझै नागरिक आन्दोलन सशक्त हुँदै जाने बताए।
ओली, देउवा र प्रचण्ड महाभ्रष्टाचारी हुन्: केसी
आन्दोलनलाई सम्बोधन गर्दै डा गोविन्द केसीले लोकतन्त्र र गणतन्त्रमा भ्रष्टाचारको बारेमा बहस गर्नु मुलुकका लागि दुर्भाग्य भएको बताए। उनले भ्रष्टाचार अपराध हो र नियन्त्रण गर्छौं भन्नेहरुले नै शुक्ष्म रुपमा भ्रष्टाचार गरिरहेको बताए।
‘जसले भोट दिएर जनप्रतिनिधि बनाए उनीहरुमाथिको बेइमानी हो। जनता माथिको धोका हो’, उनले भने, ‘भुटानी शरणार्थी काण्डमा नेपालीलाई ठगेर देश विदेशमा बिक्री गरिएको छ।’ उनले वास्तविक भुटानी शरणार्थी जान नपाउनु ठूलो अपराध भएको टिप्पणी गरे।
डा केसीले भने,‘ओली, प्रचण्ड र देउवा एकै ड्याङका मुला हुन्। तर ओली जीले अलि ठूलो ग्यांग लिएर गएका छन्। देउवा र प्रचण्डले सानसानो ग्यांग लिएर गएका छन्। यीनै देउवा, प्रचण्ड र ओली महाभ्रष्ट महाअपराधी हुन्।’
डा केसीले शीर्षस्थ नेताहरुले नै देशमा विचौलिया, दलाल, कालाबजारीहरुलाई परिचालन गरिरहेको आरोप लगाए।
अब कर बहिस्कारको मुद्दा उठाउन सक्छौंः उप्रेती
त्यसैगरी नागरिक अभियान्ता सञ्जिव उप्रेतीले हरेक क्षेत्रमा भ्रष्टाचार मौलाएको भन्दै भ्रष्टचारको डंगुरमा बसेर त्यसको अन्त्य नहुने भएकाले त्यस विरुद्ध खबरदारी आवश्यक रहेको बताए। उनले भने,‘सुनकाण्ड, धमिजा काण्ड, ललिता काण्ड जस्ता थुप्रै काण्डहरु सार्वजनिक भए। दोषीहरुलाई उन्मुक्ति दिए। सबैलाई ढाकछोप गर्ने काम भयो। हाम्रो करमाथि भएको भ्रष्टाचारविरुद्ध हामीले खबरदारी गर्नुपर्छ।’ उनले भ्रष्टचारलाई ढाकछोप गर्न आयोग बनाउनुपर्ने व्यङ्ग्यसमेत गरे।
उप्रेतीले जनताको करमाथि भ्रष्टचार भएको भन्दै उनले भने, ‘हाम्रो करमाथि भ्रष्टाचार भइरहेको छ। कर बहिस्कारको मुद्दा उठाउन सक्छौं। यसअघि जिम्मेवार नागरिकका हिसाबले यस्तो अभिव्यक्ति दिएका थिएनौं। हाम्रो करमाथि भ्रष्टचार रोकिनुपर्छ।’ उप्रेतीले यसअघि मुख्य अभियुक्तलाई छुटाउने गरेको स्मरण गर्दै हाल पक्राउ परेका अभियुक्त माथि उचित छानबिन गर्दै दोषीलाई कारबाही नहुँदासम्म खबरदारी गरिराख्नुपर्ने बताए। उनले यो आन्दोलन एक दिनका लागि मात्रै नभएको बताए। उनले ओली, देउवा प्रचण्ड सत्तामा गए पनि आफूहरु सदैव नागरिकहरुको बीचमा रहने दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779634726.png)
-1764146706.png)
-1775812183.jpg)
-1779545841.jpg)
