काठमाडौं- नक्कली भुटानी शरणार्थी प्रकरणमा ‘नेताहरु’लाई जोगाउने शीर्ष नेताहरुले गरेको प्रयास असफल भएको छ। बुधबार नेपाली कांग्रेसका नेता तथा पूर्व गृहमन्त्री बालकृष्ण खाण पक्राउ परेका छन्।
एमाले सचिव टोपबहादुर रायमाझी फरार नै छन्। उनलाई जोगाउने कोशिस गरेको एमाले पछि हटेको छ। उनलाई पार्टीबाट निलम्बन गर्दै पक्राउ गर्ने बाटो सहज बनाइदिएको छ।
भुटानी शरणार्थी प्रकरणका मुख्य अभियुक्तले उनीहरुकोसमेत संलग्नता रहेको बयानका क्रममा बताएका थिए। शरणार्थी बनाएर अमेरिका लैजाने लोभ देखाइएका सर्वसाधारणबाट उठाइएको करौडौं रुपैयाँको ठूलो हिस्सा उनीहरुलाईसमेत बुझाएको बयानमा क्रममा उल्लेख गरेका छन्।
खाणको जोगिने प्रयास असफल
गृहमन्त्री बालकृष्ण खाणसमेत उक्त प्रकरणमा प्रत्यक्ष संलग्न रहेको विचौलियाहरुले बयान दिएका छन्। सुरुमा उनीहरुले खाणकोसमेत नाम खोलेको बयानलाई लिखितमा उतार्नसमेत आनाकानी गरिएको थियो।
प्रहरी स्रोतका अनुसार सानु भण्डारीले गत चैत १३ गते दिएको बयानमा खाणको नाम लिएका थिए। कांग्रेससमेत सरकारमा रहेको समयमा सोही पार्टीका प्रभावशाली नेताको नाम आएपछि ‘बयान नोट’ गर्न हच्किएको आरोप एमालेको थियो।
एमाले अध्यक्ष ओलीले प्रधानमन्त्री पुष्पकमल दाहाल प्रचण्डसँको भेटमा खाणलगायतलाई जोगाएर आफ्ना नेतालाई मात्रै फसाउन खोजिएको भन्दै आपत्ति जनाएका थिए। भेटपछि प्रतिक्रिया दिने क्रममा पनि उनले ‘दोषी उम्काउन खोजिएमा नसहने’ भन्दै चेतावनी दिएका थिए।
यो प्रकरणमा प्रहरीले अनुसन्धान थालेपछि बयान फेर्न खाणका पक्षबाट एक नेता विचौलियाकहाँसमेत पुगेका थिए। नाम नपोल्ने शर्तमा आवश्यक सहयोग गर्न सकिने प्रलोभन खाणका पक्षबाट दिइएको थियो।
खाणलाई पक्राउ गर्नुपर्ने आधार पेस गर्दै मंगलबार नै जिल्ला अदालत काठमाडौंसँग पक्राउ पुर्जीका लागि प्रहरीले अुनरोध गरेको थियो। आफूलाई पक्राउ गर्न प्रहरीले अदालतबाट अनुमति लिन खोजेको सूचना पाएपछि खाणले फरार हुने तयारी गरेको प्रहरीले जनाएको छ। प्रहरी स्रोतका अनुसार खाणले आफू पक्राउ पर्ने आशंकाकाबीच मंगलबार बेलुकी नै मोबाइल अफ गरेका थिए। मंगलबार ८ बजेसम्म एक्टिभ देखिएको खाणको मोबाइल त्यसपछि भने स्विचअफ देखिएको थियो।
मोबाइल अफ हुनु अगाडिसम्म उनको अन्तिम लोकेशन काठमाडौंको कोटेश्वर देखिएको थियो। तर त्यसपछि मोबाइल स्विचअफ गरेर खाण सम्पर्कविहीन बनेका थिए।
प्रहरीको टोलीले मंगलबार रातभर नै खाणको खोजी गरेको थियो। बुधबार बिहान मात्रै उनी चाबहिलस्थित निवासमा रहेको पत्ता लागेको थियो। खाणको निजी घर नभए पनि उनी चाबहिलस्थित घरमा लामो समयदेखि बस्दै आएका थिए।
बुधबार पक्राउ गर्न जाँदासमेत खाण सहजै प्रहरीकहाँ आएनन्। माथिल्लो तलामा रहेको कोठामा चुकुल लगाएर बसेका उनले ढोका नखोलेपछि प्रहरी ढोका फोडेरै भित्र पसेको थियो।
खाणले जोगिने र देउवाले उनलाई जोगाउन गरेको प्रयास तत्कालका लागि असफल भएको छ। खाणका सहयोगी नरेन्द्र केसीलाई प्रहरीले बुधबार पक्राउ गरेको छ। उनलाई ४ दिन हिरासतमा राखेर अनुसन्धान गर्न अदालतले आदेश दिएको छ।
खाणका लागि उनकी पत्नी एवं सांसद मञ्जु खाणलाई पैसा बुझाएको एउटा अडियोसमेत सार्वजनिक भएको छ। उक्त अडियो प्रविधिमार्फत् बनाइएको भन्दै त्यहाँ नाम उल्लेखितमध्ये एक आरजु राणा देउवाले प्रहरीमा उजुरी दिएकी छिन्।
ओलीले भाग्दैनन् भनेका रायमाझी कहाँ छन्?
प्रहरीले खाणभन्दा पहिले एमाले सचिव रायमाझीलाई पक्राउ गर्न खोजेको थियो। त्यहीअनुसार तयारी गरे पनि हालसम्म प्रहरीलाई सफलता मिलिसकेको छैन।
रायमाझीलाई प्रहरीले पक्राउ गर्न खोजेपछि त्यसको ओलीले बचाउ गरेका थिए। उक्त विषयमा प्रचण्डको ध्यानाकर्षणसमेत गराएका थिए। रायमाझीका लागि काटिएको चेकसमेत विचौलियासँगै रहेको उल्लेख गर्दै उनले भनेका थिए, ‘यो तानिएको हो कि तनाएको हो भनेर हामी अध्ययन गर्दैछौं। अध्ययन गरेपछि हामी आफ्नो धारणा बाहिर ल्याउँछौं।’
एकैपटक अहिले ४ वर्षअगाडिका चेक काटेका, चेक जसले काट्यो उसैसँग रहेको भन्दै सरकारको कदमप्रति आशंका जताएका थिए। साथै उनले रायमाझी नभाग्नेसमेत बताएका थिए।
उनको दाबी थियो, ‘एउटा सांसद, एउटा पटकपटक मन्त्री भइसकेको, उपप्रधानमन्त्री भइसकेको, पार्टीको नेता षड्यन्त्रपूर्ण ढंगले बाटामा हिँड्दाहिँड्दै समाउनुपर्ने, त्यस्तो खालको, रहस्यपूर्ण छ। किन, उहाँ भागेर उम्केर कतै जाने खालको मान्छे त होइन।’
तर, रायमाझीलाई लिएर ओलीले गरेको दाबी झुठो सावित भएको छ। रायमाझी अहिलेसम्म प्रहरीको सम्पर्कमा पुगेका छैनन्। बरु देश नै छाडेर बाहिरिएको हुनसक्ने आशंकाहरु सिर्जना भएका छन्। बुधबार रायमाझीले संसद् सचिवालयमा एक पत्र पठाउँदै आफू उपचाररत रहेको बताएका छन्। लगातार १० वटा बैठकमा अनुपस्थित हुँदा निलम्बनमा पर्ने भएकाले उक्त पत्र पठाएका हुन्।
सुरुमा रायमाझीलाई जोगाउन खोजे पनि अहिले एमाले पछि हटेको छ। मंगलबारको सचिवालय बैठकमा अनुसन्धानमा सरकारलाई सघाउने निर्णय गरेको एमालेले बुधबार रायमाझीलाई निलम्बन गरेको छ।
दबाबमा शीर्ष नेताहरु, तल्लो तहमा आशा
नक्कली भुटानी शरणार्थी प्रकरणमा उच्च पदस्थ कर्मचारीका साथै नेताहरु तानिन थालेपछि शीर्ष नेताहरुले भेटवार्ता बढाएका छन्। प्रधानमन्त्री प्रचण्ड, कांग्रेस सभापति शेरबहादुर देउवा र एमाले अध्यक्ष केपी शर्मा ओलीले मंगलबार पनि छलफल गरेका छन्।
उनीहरु आफैंले मात्र नभएर गृहमन्त्री नारायणकाजी श्रेष्ठसँगसमेत छलफल गरेका छन्। निकटस्थ नेताहरु नै प्रकरणमा मुछिएपछि शीर्ष नेताहरु दबाबमा परेका हुन्।
कांग्रेस सभापति देउवाका विश्वास पात्र मानिने खाण पक्राउ परेपछि उनले पदाधिकारी बैठक बोलाएरसमेत छलफल गरेका छन्। पुराना दलका नेताहरुको शासन शैलीमाथि प्रश्न उठिरहेकै बेला यो प्रकरण बाहिरिएको छ। जसले गर्दा आमजन मात्रै होइन, पार्टीकै एक तहका नेता-कार्यकर्तालेसमेत दोषीलाई कारबाही गर्नुपर्ने बताएका छन्।
कांग्रेस नेता खाण पक्राउ परेकै बेला कांग्रेसका युवा नेताहरु गुरुराज घिमिरे, गोविन्द पोखरेल, भुपेन्द्रजंग शाही, रञ्जित कर्णलगायतले गृहमन्त्री श्रेष्ठको कामको प्रशंसा गरेका छन्। दोषी देखिए आफ्नै परिवारको सदस्यसमेत नछाड्न भन्दै उल्टै ढाडस दिएर आएका छन्।
यसैगरी नेकपा एमालेको सचिवालय बैठकमासमेत रायमाझीका पक्षमा एमाले उभिन नहुनेमा अध्यक्ष ओलीलाई नेताहरुले दबाब दिएका थिए। उक्त प्रकरणमा रायमाझीले प्रहरीलाई यथार्थ बताएर सहयोग गर्नुपर्ने एमाले सचिवालयका अधिकांश सदस्यको भनाइ थियो। जसका कारण एमाले रायमाझीलाई निलम्बन गर्ने अवस्थामा पुगेको हो।
गृहमन्त्री श्रेष्ठले दोषीलाई जहाँ गए पनि नछोड्ने प्रतिबद्धता जनाएका छन्। खाडीमा काम गर्न गएका ३० लाख नेपालीलाई स्वदेशमै रोजगारी सिर्जना गर्न भ्रष्टाचारीलाई कारबाही गर्नुको विकल्प नरहेको उनको टिप्पणी छ।
काठमाडौंमा आयोजित निर्मल लामा स्मृति प्रतिष्ठानको कार्यक्रमलाई सम्बोधन गर्दै उनले भने, ‘कोही निर्दोष डराउनुपर्दैन, कोही निर्दोष तानिने छैनन्, कोही दोषी छुट्ने छैनन्। दोषीलाई जहाँ गए पनि छोड्दैनौं, यो हाम्रो प्रतिबद्धता हो।’ कमिसन र भ्रष्टाचारले देश जर्जर बनाएको बताउँदै कारबाही प्रक्रिय तीव्र पार्ने बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779634726.png)
-1764146706.png)
-1775812183.jpg)
-1779545841.jpg)
