काठमाडौं- प्रधानमन्त्री पुष्पकमल दाहाल प्रचण्ड र पूर्वप्रधानमन्त्रीद्वय शेरबहादुर देउवा र केपी शर्मा ओलीले बुधबार अपराह्न भेटवार्ता गरे। प्रधानमन्त्री निवास सिंहदरबारमा भएको भेटमा संसद्सँग जोडिएका विषयमा छलफल भएको दाबी गरिएको छ।
नेपाली कांग्रेसका नेता रमेश लेखकले सुनुवाइ समिति, टीआरसी विधेयक, संवैधानिक परिषद् सम्बन्धी विधेयक तथा संसदीय समितिका सभापति चयन लगायतका विषयमा छलफल भएको बताए। उनको प्रतिक्रियाप्रति एमाले अध्यक्ष ओलीले पनि समर्थन जनाएका छन्।
यसअघि मंगलबार बिहान पनि प्रधानमन्त्री निवास बालुवाटारमा तीन शीर्ष नेताहरुबीच छलफल भएको थियो। बजेट, सरकारको आगामी नीति तथा कार्यक्रम तथा अन्य समसामयिक विषयमा छलफल हुने कार्यसूची बताइएको थियो। तर भेटको विस्तृत विवरण सार्वजनिक भएको छैन।
तीन शीर्ष नेताहरुको भेट मात्रै होइन, यसअघि वैशाख २१, वैशाख २३ र वैशाख २५ मा प्रधानमन्त्री प्रचण्ड र एमाले अध्यक्ष ओलीबीच पनि भेट भएको थियो।
नेताहरुको यस खालको तीव्र भेटघाटको समय सन्दर्भले प्रशस्तै शंकाहरु जन्माएको छ। नेपाली नागरिकलाई नक्कली भुटानी शरणार्थी बनाएर अमेरिका लैजाने भन्दै ठगी गर्ने गिरोहका केही व्यक्ति पक्राउ परेका छन्।
उनीहरुको बयानका आधारमा मुख्य पार्टीका केही शीर्ष नेताहरु पनि तानिएका छन्। अनुसन्धान प्रक्रिया अघि बढ्ला कि नबढ्ला र दोषीमाथि कारबाही होला कि नहोला भन्ने नागरिकमा आशंका व्याप्त भइरहेको बेलामा उनीहरुले भेटलाई तीव्रता दिएका हुन्।
यो प्रकरणमा बुधबार मात्रै कांग्रेस नेता तथा पूर्वगृहमन्त्री बालकृष्ण खाण पक्राउ परेका छन्। एमाले सचिव तथा पूर्वउपप्रधानमन्त्री टोपबहादुर रायमाझीको नाममा गत वैशाख २० गते नै पक्राउ पुर्जी जारी भइसकेको छ। यद्यपि, उनी सम्पर्कविहीन भएका छन्।
केही हप्ताअघिसम्म तीक्त सम्बन्धमा रहेका र भेटघाट पनि सहज नभइरहेको पृष्ठभूमिमा अहिले बढिरहेको भेटवार्ताको क्रमले कतै उनीहरु आरोपितलाई बचाउन र थप व्यक्तिको नाम मुछिन नदिन प्रयत्नशील हुन् कि भन्ने आशंका बढाएको छ। सामाजिक सञ्जालमा भ्रष्टाचारमा राष्ट्रिय सहमति जस्ता शब्दावली प्रयोग गर्दै भेटवार्ताप्रति तीखो प्रतिक्रिया व्यक्त भएका छन्। जसले गर्दा तीन नेताको भेट फरक विषयमा वा उनीहरुले दाबी गरेकै जस्तो सन्दर्भमा भइरहेको भए पनि नागरिकमा भने विश्वास देखिँदैन।
पूर्वडीआईजी हेमन्तबहादुर मल्लले शीर्ष नेताहरुको छटपट र यसअघि अनुहार पनि हेर्न नचाहनेहरुबीचको भेटघाट देख्दा शंका गर्ने ठाउँ प्राप्त भएको बताए। 'अहिले प्रक्राउ परेका मानिसहरु हेर्दा पनि त्यसको कनेक्सन पनि यिनै शीर्ष नेताहरुसँग जोड्न सकिन्छ', उनले भने।
नेताहरुले आरोपित बचाउन खोजेको आशंकाकै बीच बुधबार बृहत् नागरिक आन्दोलनले भद्रकालीमा प्रदर्शनसमेत गरेको छ। प्रदर्शनको मुख्य नारा नै 'भ्रष्टाचार ढाकछोपविरुद्ध नागरिक प्रदर्शन' भन्ने थियो। प्रदर्शनमा सम्बोधन गर्दै केदारभक्त माथेमाले अति नै भएर सडकमा आउनुपरेको बताए। 'सहिनसक्नुभयो। अति नै भयो', भ्रष्टाचारप्रति उनको बुझाइ थियो।
प्रदर्शन कार्यक्रममा सम्बोधन गर्दै चिकित्सा क्षेत्र सुधारको अभियन्ता डा गोविन्द केसीले पनि पार्टीका शीर्ष नेताहरु नै भ्रष्ट भएको बताए। उनले भ्रष्टहरुलाई पनि उनीहरुले नै संरक्षण गरिरहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769611763.png)
-1768981471.jpg)
-1769598146.jpg)
-1764146706.png)
