काठमाडौं- प्रमुख तीन दलका शीर्ष नेताहरु पुष्पकमल दाहाल प्रचण्ड, शेरबहादुर देउवा तथा केपी शर्मा ओलीबीच सिंहदरबारमा भएको छलफलमा संसद्का विविध विषयमा छलफल भएको बताइएको छ।
नेपाली कांग्रेसका नेता रमेश लेखकले सुनुवाइ समिति, टीआरसी विधेयक, संवैधानिक परिषद् सम्बन्धी विधेयक तथा संसदीय समितिका सभापति चयन लगायतका विषयमा छलफल भएको बताए।
भेटघाटमा रहेका लेखकले भने, 'अहिलेको भेटको मूल विषय भनेको सदनभित्रकै विषयवस्तुमा केन्द्रित भएर छलफल भएको छ। जस्तो, बजेटको तयारी भइरहेको छ, नीति तथा कार्यक्रम संसद्मा प्रस्तुत हुने कुरा छ। आज सिद्धान्त र प्राथमिकताको कुरा आज सकिन्छ। त्यसपछि हाउसका अरु कामका कुरा अगाडि बढ्छन्।'
एमाले अध्यक्ष केपी शर्मा ओलीले पनि लेखकले भनेकै विषयमा छलफल भएको दाबी गरे।
नेपाली नागरिकलाई भुटानी शरणार्थी बनाएर अमेरिका पठाउने भन्दै ठगी गर्ने गिरोहका कतिपय व्यक्ति पक्राउ परेको र उनीहरुको बयानका आधारमा नेताहरु पनि तानिने क्रम बढेका बेलामा नेताहरुबीचको छलफल तीव्र भएको छ। त्यसैले बुधबारको छलफललाई पनि त्यसैसँग जोडेर हेरिएको थियो।
तीन नेताबीच मंगलबार बिहान पनि छलफल भएको थियो। यसअघि वैशाख २१, २३ र २५ गते प्रधानमन्त्री प्रचण्ड र ओलीबीच पनि भेट भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790409093.jpg)
-1786602170.png)
