काठमाडौं– राष्ट्रिय स्वतन्त्र पार्टी (रास्वपा) केन्द्रीय समितिको बैठक बस्दै छ। पार्टी कार्यालय बसुन्धारामा अपराह्न ५ बजे बस्ने बैठकले सरकारमा जाने वा नजाने तथा समर्थन फिर्ता लिने वा कायम राख्नेबारे निर्णय गर्ने नेताहरुले बताएका छन्।
प्रतिनिधि सभाको उपनिर्वाचनपछि रास्वपामा सरकारमा जाने वा नजाने तथा सरकारलाई दिएको समर्थन फिर्ता लिने वा कायम राख्ने भन्नेबारे छलफल भइरहेको छ। गठबन्धनका दल र प्रधानमन्त्री पुष्पकमल दाहाल प्रचण्ड भने रास्वपालाई सरकारमा सहभागी गराउने पक्षमा छन्।
यसअघि गत सोमबार बसेको बैठकमा सरकारमा सहभागिगताको विषयमा मिश्रित प्रतिक्रिया आएको थियो। केही नेताहरुले सरकारमा सहभागी हुन नहुनेमा जोड दिएका थिए भने केहीले काम गर्न सकिने अवस्था भए र काम गर्ने मन्त्रालय पाइए सरकारमा सहभागी हुनुपर्नेमा जोड दिएका थिए।
माओवादी केन्द्रका अध्यक्ष पुष्पकमल दाहाल प्रचण्ड नेतृत्वमा गत पुस १० गते सरकार गठन हुँदा राष्ट्रिय स्वतन्त्र पार्टी सरकारमा सहभागी भएको थियो। रास्वपा सभापति रवि लामिछाने उपप्रधानमन्त्रीसहित गृहमन्त्री भएका थिए। रास्वपाले त्यतिबेला गृह, शिक्षा र श्रम मन्त्रालय तथा स्वास्थ्य राज्यमन्त्री पाएको थियो।
सभापति लामिछानेले नागरिकता प्रकरणमा संसद र मन्त्री पद गुमाएपछि सरकारबाट बाहिरिएको रास्वपाले समर्थन भने कायमै राखेको थियो। प्रधानमन्त्री प्रचण्डले आफू नेतृत्वमा सरकार गठन हुँदा बनेको एमालेसहितको गठबन्धन ‘त्यागेर’ पुरानै गठबन्धनलाई निरन्तरता दिँदा पनि रास्वपाले सरकारलाई समर्थन दिएको थियो।
तर, वैशाख १० गतेको उपनिर्वाचनपछि भने रास्वपामा सरकारलाई समर्थन मात्रै दिइरहने कि सरकारमा जाने वा समर्थन पनि फिर्ता लिएर प्रतिपक्षमा बस्ने भन्ने बहस सुरु भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
