काठमाडौं– अख्तियार दुरुपयोग अनुसन्धान आयोगले काठमाडौं महानगरपालिका कर्मचारीमाथि छानबिन थालेको छ। मेयर बालेन शाहको आग्रहपछि अख्तियारले केही महिना अघिदेखि उनीहरुले बुझाएको सम्पत्ति विवरण अध्ययन थालेको थियो।
अख्तियार उच्चस्रोतका अनुसार मेयर शाहले नै महानगरका कर्मचारीको सम्पत्ति छानबिन गरी गैरकानुनी रुपमा आर्जन गर्नेहरुमाथि कारबाही गर्न भेटेर अख्तियारका आयुक्तहरुलाई आग्रह गरेका थिए। लगत्तै अख्तियारले महानगरमा कर्मचारीहरुले बुझाएको सम्पत्ति विवरण, उनीहरुको बैंक खाता, चल–अचल सम्पत्तिमाथि अध्ययन थालेको थियो।
अख्तियारका अनुसार केही दिनअघि मात्र महानगरका ३२ कर्मचारीलाई अख्तियारले १६ पाने फाराम भराएको छ। प्रारम्भिक अध्ययनमा उनीहरुको सम्पत्ति अस्वभाविक र स्रोत खुल्न नसक्ने देखिएकाले उनीहरुलाई त्यसबारेमा प्रष्ट पार्न विस्तृत विवरण उल्लेख हुने गरी फराम भराइएको हो।
१६ पन्ने फाराममा व्यक्तिगतदेखि सम्पत्तिसम्मका विवरणहरु भर्नुपर्छ। अख्तियारले यसअघि १६ पन्ने फारम भराउँदै आएको थियो। नवीन घिमिरे प्रमुख आयुक्त भएको पालामा भने १३ पन्ने फारमलाई १६ पन्ने पुर्याइएको थियो।
१३ पन्नेबाट १६ पन्ने बनाउने क्रममा सम्पादकहरुसँगको एक अन्तर्क्रिया कार्यक्रममा बोल्दै अख्तियारका तत्कालीन प्रमुख आयुक्त घिमिरेले भनेका थिए, ‘इन्टेलिजेन्स समूहले गरेको अनुसन्धानका क्रममा अकुत सम्पत्ति आर्जन गरेको तथ्यहरू भेटिएमा मात्रै १६ पन्ने विवरण भराइने छ। हचुवाका भरमा कसैलाई पनि १६ पन्ने भराएर दुख दिने काम हुँदैन।’
महानगरमा अहिले करिब २१ सय जना कर्मचारी कार्यरत छन्। तीमध्ये करिब १०० जनालाई अख्तियारले पहिलो चरणमा अनुसन्धानको घेरामा ल्याएको छ। काठमाडौं महानगरपालिकाको विभिन्न महाशाखाका प्रमुख, विभागीय प्रमुख, शाखा प्रमुख, वडा सचिव, केही नगर प्रहरी, राजश्व, नक्सा पास गर्ने विभागका कर्मचारीलाई प्राथमिकता राखेर अख्तियारले अनुसन्धान गरिरहेको छ।
अख्तियारले अहिले माथिल्लो तहका कर्मचारीहरु र खरिदारसम्म जसको धेरै पैसाको कारोबार वा आम उपभोक्तासँग जोडिने हुन्छ तिनिहरुबाट अनुसन्धान थालेको हो। त्यस्तै टेन्डरमा सहभागी हुने कर्मचारी र दैनिक रुपमा सेवाग्राहीसँग जोडिने कर्मचारीहरुलाई विस्तृत विवरण खुल्नेगरी फारम भराएको अख्तियार स्रोतले जनाएको छ।
अख्तियारले उक्त फारममा उनीहरुले बुझाएको विवरण र अनुसन्धानका क्रममा देखिएको सम्पत्तिकाबीचमा तुलना गर्ने, उनीहरुका नजिकका व्यक्ति तथा आफन्तहरुको नाममा गरेको कारोबार पनि हेर्ने तयारी अख्तियारले गरेको छ। पहिलो चरणमा फारम भरेका कर्मचारीहरुले महानगरमा सेवा सुरु गरेदेखि उनीहरुको नाममा रहेको बैंक खातासम्मको विवरण अख्तियारले मगाएर अनुसन्धान सुरु गरेको छ।
मेयर बालेन शाहको सचिवालयले पनि अख्तियारले अनुसन्धान गरिरहेको स्वीकार गरेको छ। मेयरमा निर्वाचित भएलगत्तै महानगरको भ्रष्टाचारमा आफूले काम गर्ने वाचा अन्तर्गत भ्रष्टाचारका विषयमा अनुसन्धान गर्ने अख्तियार र राष्ट्रिय सर्तकता केन्द्रलाई आग्रह गरिएको सचिवालयले जनाएको छ।
अख्तियारले पहिलो चरणमा अख्तियारको अनुसन्धानको घेरामा तानिएका कर्मचारीहरुलाई थप बयानमा पनि बोलाउने छ। ‘फारम भर्नेमध्ये कम्तिमा १०–१५ जना कर्मचारीहरुलाई हामी बयानमा बोलाउँछौं’, अख्तियार स्रोतले भन्यो, ‘त्यसमा केही विभागका प्रमुख, नगर प्रहरी र राजश्व तथा ठेक्कामा संलग्न हुने कर्मचारी छन्।’
अख्तियारले यसअघि विशेष अदालतमा भवन निर्माणमा दायर भएको मुद्दासँग जोडिएकाबाहेकका अन्य कर्मचारीमाथि पनि अनुसन्धान गरिरहेको छ। २०७८ मंसिर २९ गते अख्तियारले तत्कालीन मेयर विद्यासुन्दर शाक्यसहितका केही व्यक्तिलाई उन्मुक्ति दिँदै कर्मचारीलाई मात्र भवन निर्माणमा भ्रष्टाचार भएको भन्दै मुद्दा दायर गरेको थियो।
आयोगले गलत लिखत तयारी गरि योग्यता नै नपुगेको निर्माण कम्पनीलाई ठेक्का दिएको भन्दै ५ जना कर्मचारीविरुद्ध भ्रष्टाचार मुद्दा दायर गरेको थियो। अख्तियारले महानगरले ठेक्का दिएको समानान्तर जेभीको भवन निर्माणमा अनुभव नै नभएको उल्लेख गरेको थियो। तर उक्त कम्पनीलाई भने उन्मुक्ति दिइएको थियो।
अख्तियारले महानगरका तत्कालीन निर्देशक भैरवबहादुर बोगटी, खरिद इकाई प्रमुख, निर्देशक बखतबहादुर साउद, उपनिर्देशक सुमन अधिकारी, उपनिर्देशक वीरबहादुर खड्का र इन्जिनियर उमेशकुमार बुढाथोकीलाई प्रतिवादी बनाउँदै मुद्दा दायर गरेको थियो। सरकारी कागज सच्चाउने काम गरी भ्रष्टाचारजन्य काम गरेको भन्दै उनीहरुविरुद्ध मुद्दा दायर गरिएको थियो।
महानगरको टेकुमा कार्यालय भवन निर्माणको ठेक्का दिँदा सेटिङका आधारमा दिएको भनि अख्तियारमा परेको उजुरीमा अनुसन्धान गर्दा भ्रष्टाचार भएको भेटिएको अख्तियारको आरोपपत्रमा दाबी गरिएको छ।
महानगरले भवन निर्माणको बोलपत्रमा ६ वटा कम्पनीको आवेदन परे पनि समानान्तरको मात्रै प्राविधिक प्रस्ताव पास गरिएको थियो। भवनको अनुमानित लागत ७९ करोड ४९ लाख ४ हजार ६ सय २३ रुपैयाँ रहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
