काठमाडौं- नेपालमा उत्पादन हुने सवारी साधन दर्ता हुने भएको छ। भौतिक पूर्वधार तथा यातायात मन्त्रालयले पुरानो कार्यविधि संशोधन गरी नयाँ व्यवस्था ल्याएपछि नेपालमा उत्पादन हुने सवारी साधन दर्ताको बाटो खुलेको हो।
यसअघि नेपालमा उत्पादन हुँदै आएको ‘यात्री मोटरसाइकल’ दर्तामा समस्या आएको भन्दै गुनासो आएको थियो। प्रधानमन्त्री पुष्पकमल दाहाल प्रचण्डलाई समेत नेपालमा उत्पादित सवारी साधन दर्ता गर्ने वातावरण मिलाउन आग्रह गरेपछि यो विषय अघि बढेको थियो। प्रधानमन्त्री प्रचण्डको निर्देशनपछि मन्त्रालयले तथा यातायात व्यवस्था विभागले वैशाख १३ गते नेपालमा उत्पादित सवारी दर्ताको बाटो खोल्ने निर्णय गरेको हो।
यातायात व्यवस्थापन कार्यविधि निर्देशिका, २०६० को बुँदा नम्बर ११.१ मा नयाँ बुँदा ११.१.९ थप गरी यातायात व्यवस्थापन कार्यविधि निर्देशिका, २०६० संशोधन गरिएको छ।
‘यस निर्देशिकामा अन्यत्र जुनसुकै कुरा लेखिएको भए पनि विदेशबाट पाटपुर्जा पैठारी गरी नेपालमा जडान हुने वा नेपालमा नै उत्पादन हुने सवारीको नयाँ दर्ता, सरुवा दर्ता, हेरफेर दर्ता, लिलाम दर्ता, पुन दर्ता र नामसारी लगायत प्रयोजनका लागि त्यस्तो सवारीको भन्सार प्रज्ञापनपत्र आवश्यक पर्ने छैन,’ मन्त्रालयले जारी विज्ञप्तिमा भनिएको छ।
त्यस्तै यही व्यवस्थाको दुई नम्बर बुँदामा ‘नेपालमा जडान हुने वा उत्पादन हुने सवारीको नयाँ दर्ता, सरुवा दर्ता, हेरफेर दर्ता, लिलाम दर्ता, पुन दर्ता र नामसारी लगायत कार्यका लागि जडानकर्ता वा उत्पादक कम्पनीले भन्सार प्रज्ञापनपत्रको सट्टा मूल्य अभिवृद्धि कर बिजक र प्रचलित कानुनबमोजिम अन्तःशुल्कसम्बन्धी प्रावधान आकर्षित हुने सवारीका हकमा अन्तःशुल्क निकासी फारमसमेत पेस गर्नुपर्नेछ,’ उल्लेख छ।
यसअघि नेपालमा कुनै सवारीसाधन दर्ताका लागि भन्सार प्रज्ञापनपत्र र भन्सार महसुल तिरेको रसिद अनिवार्य थियो। सोही कारण यात्री मोटरसाइकल दर्ता हुन सकेको थिएन। तर यो कार्यविधि बनेपछि भने यात्री तथा नेपालमा उत्पादित सवारीले सहजै दर्ता पाउने भएका छन्।
सोमबार प्रधानमन्त्री तथा मन्त्रिपरिषदको कार्यालयका सचिव गणेशप्रसाद पाण्डेको संयोजकत्वमा बसेको बैठकले यातायात व्यवस्थापन कार्यविधि निर्देशिका, २०६० मा आवश्यक संशोधन गरी नेपालमा उत्पादित सवारीसाधन दर्ता गर्न भौतिक पूर्वाधार तथा यातायात मन्त्रालयले तीन दिनभित्र आवश्यक व्यवस्था मिलाउने निर्णय गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1781158823.png)
-1764146706.png)
