काठमाडौं– प्रधानमन्त्री पुष्पकमल दाहाल प्रचण्ड र नेकपा एमालेका अध्यक्ष केपी शर्मा ओली बीच भेटवार्ता भएको छ। दुई नेताबीच प्रधानन्यायाधीश नियुक्ति, संसदीय समिति गठन लगायत विषयमा छलफल भएको बताइएको छ।
शुक्रबार प्रधानमन्त्रीको सिंहदरबारस्थित कार्यकक्षमा प्रचण्ड र ओलीबीच छलफल भएको प्रधानमन्त्रीका प्रेस संयोजक सूर्यकिरण शर्माले बताए। भेटमा सर्वोच्च अदालतका प्रधानन्यायाधीश सिफारिस र संसदीय समिति गठनका बारेमा छलफल भएको हो।
शुक्रबारको भेटमा प्रधानमन्त्री प्रचण्डले संसदीय समिति र प्रधानन्यायाधीश नियुक्तिका विषयमा एमालेको सहयोग खोजेको प्रमुख सचेतक पदमकुमार गिरीले जानकारी दिए। उनले भने, 'प्रधानमन्त्री प्रचण्डले संसदीय समितिको गठन, प्रधानन्यायाधीको नियुक्ति र विचाराधीन विधेयकका विषयमा एमालेको सहयोग माग्नुभएको थियो। हामीले नियमअनुसार अघि बढ्दा अवरोध नहुने बताएका छौं।'
गिरीका अनुसार जवाफमा ओलीले संसदीय समिति गठनलाई प्राथमिकता दिनुपर्ने बताएका थिए। प्रधानन्यायाधीश नियुक्तिका लागि पनि संसदीय सुनुवाइ समिति चाहिने बताउँदै यथाशक्य समितिहरु गठन गरेर संसद्लाई प्रभावकारी बनाउनुपर्नेमा ओलीको जोड थियो।
प्रमुख प्रतिपक्षी दलको नेताका रुपमा एमाले अध्यक्ष ओलीले केही दिन अघि बसेको संवैधानिक परिषदको वैठकमा संसदीय समिति गठन नगरी प्रधानन्यायाधीश नियुक्तिको सिफारिस गर्न नसकिने अडान लिएका थिए। उनको उक्त अडानपछि संवैधानिक परिषद्को बैठक विना निष्कर्ष सकिएको थियो।
संवैधानिक परिषद्को अर्को वैठक बस्नु अघि प्रधानमन्त्री प्रचण्डले प्रमुख प्रतिपक्ष दल नेकपा एमालेलाई मनाउने कोसिस गरेका हुन्। सर्वोच्च अदालत १५ महिनादेखि कामुकै भरमा चल्दै आएको छ। हाल हरिकृष्ण कार्कीले कामु प्रधानन्यायाधीशको जिम्मेबारी सम्हाल्दै आएका छन्। उनको कार्यकाल अब करिब २ महिना बाँकी भएकाले सरकारले छिटै नियुक्ति गर्ने प्रयास गरिरहेको छ।
संवैधानिक परिषद्मा एमालेको बहुमत छ। एमालेबाट निर्वाचित प्रतिनिधि सभाका सभामुख र राष्ट्रिय सभाका अध्यक्ष संवैधानिक परिषद्को सदस्य छन्। यस्तै, प्रमुख प्रतिपक्षी दलको नेताका रुपमा अध्यक्ष ओली पनि परिषद्को सदस्य छन्।
परिषद्मा बहुमत सदस्य भएका कारण प्रधानमन्त्री प्रचण्ड एमालेलाई नमनाइ एक्लै निर्णय गर्नसक्ने अवस्थामा छैनन्। एमालेसँग समझदारी कायम गरेर मात्रै परिषद्को अबको बैठक डाक्ने प्रधानमन्त्री प्रचण्डको तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779770158.png)
-1764146706.png)
-1779545841.jpg)
